ປກສ ເມືອງຄູນຄໍາ ກັກໂຕຜູ້ຖືຫາ 2 ຄົນ ແລະ ຄັນຊາອັດແທ່ງນໍ້າໜັກ 352 ກິໂລ
ອີງຕາມການລາຍງານຂ່າວຄວາມສະຫງົບ ໃຫ້ຮູ້ວ່າ: ໃນວັນທີ 15 ທັນວາ 2021, ເຈົ້າໜ້າທີ່ ປກສ ເມືອງຄູນຄໍາ ແຂວງຄໍາມ່ວນ ໄດ້ສະກັດລົດນິດສັນນາວາລາ ທີ່ຂົນສົ່ງຄັນຊາອັດແທ່ງ ຈໍານວນ 9 ເປົາ ນໍ້າໜັກ 352 ກິໂລ ພ້ອມກັບຢາບ້າຈໍານວນໜຶ່ງ ແລະ ກັກຕົວຜູ້ຖືກຫາ 2 ຄົນ.
ເຈົ້າໜ້າທີ່ ປກສ ເມືອງຄູນຄໍາ ເປີດເຜີຍວ່າ: ພາຍຫລັງທີ່ໄດ້ຮັບແຈ້ງຄວາມຈາກພົນລະເມືອງດີໃນວັນທີ 14 ທັນວາ 2021 ວ່າ: ຈະມີການຂົນສົ່ງຢາເສບຕິດ ມາແຕ່ເມືອງຄໍາເກີດ ແຂວງບໍລິຄໍາໄຊ ໂດຍຜ່ານ ເມືອງຄູນຄໍາ ແຂວງຄໍາມ່ວນ ຈຶ່ງໄດ້ລາຍງານຕໍ່ຄະນະພັກຄະນະກອງບັນຊາການ ປກສ ເມືອງ ຄູນຄໍາ ແລ້ວປະສານສົບກັບໜ່ວຍງານສະກັດກັ້ນ ແລະ ຕ້ານຢາເສບຕິດ ແລະ ກອງຈະລາຈອນ-ມອດໄຟ ບັນຈຸກໍາລັງລົງຕິດຕາມເປົ້າໝາຍດັ່ງກ່າວ; ມາຮອດເວລາ 6:40 ໂມງຂອງວັນທີ 15 ທັນວາ 2021 ຈຶ່ງໄດ້ພົບເຫັນລົດກະບະ ຍີ່ຫໍ້ NISSAN ສີຂາວໝາຍເລກທະບຽນ ກກ 6855 ຄໍາມ່ວນ ໄດ້ຂັບຂີ່ມາແຕ່ທາງ ຫລັກ 20 ເມືອງຄໍາເກີດ ແຂວງບໍລິຄໍາໄຊ ຈະມຸ້ງໜ້າໄປທາງແບ່ງບ້ານວຽງຄໍາ ເມືອງປາກກະດິງ ແຂວງບໍລິຄໍາໄຊ ແລະ ພໍມາຮອດປ້ອມສາມແຍກກອງລໍ ເຈົ້າໜ້າທີ່ຕໍາຫລວດ ປກສ ເມືອງຄູນຄໍາ ຈຶ່ງໄດ້ສະແດງຕົວສະກັດລົດຄັນດັ່ງກ່າວພ້ອມທັງກັກຕົວຜູ້ຂັບ ແລະ ຂີ່ 2ຄົນຢູ່ໃນ ແລ້ວນໍາເຂົ້າໄປຫ້ອງການກອງບັນຊາການ ປກສ ເມືອງຄູນຄໍາ ສົມທົບກັບອົງການໄອຍະການປະຊາຊົນເຂດ 1 ປະຈໍາເມືອງຄູນຄໍາ, ອໍານາດການປົກຄອງບ້ານຄູນແກ້ວ ແລະ ພາກສ່ວນກ່ຽວຂ້ອງ ເພື່ອຮ່ວມກັນກວດຄົ້ນພະຫະນະ (ລົດ) ຍີ່ຫໍ້ NISSAN ຄັນດັ່ງກ່າວ.
ຜ່ານການກວດຄົ້ນຕົວຈິງ ພົບເຫັນເຄື່ອງຂອງກາງຢາເສບຕິດ ປະເພດຄັນຊາແຫ້ງ (ອັດແທ່ງ) ຈໍານວນ 9 ເປົາ ມີນ້ຳໜັກ 352 ກິໂລ ແລະ ກວດຄົ້ນຕົວ ທ້າວ ຄໍາຮອນ ພົບເຫັນຢາເສບຕິດ ປະເພດຢາບ້າ ຈໍານວນ 12 ເມັດ ຢູ່ຖົງໂສ້ງເບື້ອງຂວາຂອງຜູ້ກ່ຽວ.
ຜ່ານການສືບສວນ-ສອບສວນເບື້ອງຕົ້ນ ຮູ້ວ່າ: ຜູ້ຂັບຂີ່ຊື່ ທ້າວ ຄໍາຮອນ ອາຍຸ 36 ປີ ປະຈຸບັນຢູ່ບ້ານຫ້ວຍແກ້ວ ເມືອງຄໍາເກີດ ແຂວງບໍລິຄໍາໄຊ ແລະ ທ້າວ ສຸວັນໂນ ອາຍຸ 25 ປີ ຢູ່ບ້ານນາບົງ ເມືອງທ່າແຂກ ແຂວງຄໍາມ່ວນ ສ່ວນລົດແມ່ນອອກຊື່ ທ້າວ ສຸວັນໂນ; ຈາກນັ້ນຈຶ່ງໄດ້ສົ່ງພວກຖືກຫາ ພ້ອມດ້ວຍເຄື່ອງຂອງກາງຢາເສບຕິດ ປະເພດຄັນຊາແຫ້ງ (ອັດແທ່ງ) ຈໍານວນ 352 ກິໂລ, ຢາບ້າ ຈໍານວນ 12 ເມັດ ແລະ ລົດກະບະ ໃຫ້ກອງບັນຊາການ ປກສ ແຂວງຄໍາມ່ວນ ສືບຕໍ່ດໍາເນີນການສອບສວນຂະຫຍາຍຜົນຕາມຂັ້ນຕອນຂອງກົດໝາຍຕໍ່ໄປ.
