ການບໍລິການ ການລົງທຶນປະຕູດຽວ ຍັງບໍ່ທັນບັນລຸໄດ້ຕາມນະໂຍບາຍ ແລະ ກົດໝາຍກໍານົດ

ໃນໂອກາດເຂົ້າຮ່ວມກອງປະຊຸມພົບປະລະຫວ່າງຄະນະລັດຖະບານກັບພາກທຸລະກິດໂດຍການເປັນປະ ທານຂອງທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ ໃນວັນທີ 16 ທັນວາ 2021 ທີ່ຫໍປະຊຸມແຫ່ງຊາດນະຄອນຫລວງວຽງຈັນ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນ ຕີກະຊວງແຜນການ ແລະ ການລົງທຶນ ລາຍງານແຜນການປັບປຸງການບໍລິການການລົງທຶນປະຕູດຽວຕິດ ພັນກັບການແບ່ງຂັ້ນຄຸ້ມຄອງຍັງບໍ່ທັນສາມາດບັນລຸໄດ້ຕາມນະໂຍບາຍ ແລະ ກົດໝາຍກໍານົດໂດຍສະ ເພາະ ຫລັກການວ່ອງໄວ, ໂປ່ງໃສ ແລະ ຍຸຕິທໍາ.

ທ່ານ ສອນໄຊ ສີພັນດອນ ລາຍງານວ່າ: ສປປ ລາວ ມີນະໂຍບາຍສົ່ງເສີມການລົງທຶນຂອງພາກ ເອ ກະຊົນ ຊຶ່ງແຕ່ປີ 1988 ເຖິງປັດຈຸບັນ, ການລົງທຶນຂອງພາກເອກະຊົນໃນຂະແໜງການຕ່າງໆ ເຊັ່ນ: ພະ ລັງງານ-ບໍ່ແຮ່, ອຸດສາຫະກໍາ, ກະສິກໍາ-ປ່າໄມ້ ແລະ ການບໍລິການ ການລົງທຶນເພີ່ມຂຶ້ນຢ່າງຕໍ່ເນື່ອງ ສະ ແດງອອກໄດ້ອະນຸມັດໂຄງການລົງທຶນຂອງພາກເອກະຊົນພາຍໃນ ແລະ ຕ່າງປະເທດ 4.775 ໂຄງການ ລວມມູນຄ່າກວ່າ 45 ຕື້ໂດລາສະຫະລັດ ຊຶ່ງໄດ້ປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມ ກໍ່ຄືການສ້າງລາຍຮັບງົບປະມານແຫ່ງລັດ, ການສ້າງວຽກເຮັດງານທໍາ ແລະ ການພັດທະນາຊົນນະບົດຂອງ ສປປ ລາວ ໄດ້ດີສົມຄວນ. ການບໍລິການການລົງທຶນປະຕູດຽວ ຖືວ່າເປັນພື້ນຖານນະໂຍບາຍສໍາຄັນຂອງລັດຖະບານ ທີ່ໃຊ້ເປັນເຄື່ອງມືສົ່ງເສີມ ແລະ ດຶງດູດການລົງທຶນເອກະຊົນພາຍໃນ ແລະ ຕ່າງປະເທດເຂົ້າໃນການພັດທະນາເສດຖະກິດ-ສັງຄົມຂອງປະເທດໜຶ່ງ, ຫລາຍປະເທດທົ່ວໂລກປະສົບຜົນສໍາເລັດໃນການ ດຶງດູດການລົງທຶນພັດທະນາເສດຖະກິດ-ສັງຄົມຂອງຕົນໂດຍການນໍາໃຊ້ນະໂຍບາຍດັ່ງກ່າວມີປະສິດທິ ພາບສູງ. ສໍາລັບສປປ ລາວ ນະໂຍບາຍດັ່ງກ່າວ, ໄດ້ກໍານົດແຈ້ງຢູ່ໃນມະຕິ IX, X ແລະ XI ຂອງສູນກາງພັກ ແລະ ລັດຖະບານ ກໍ່ໄດ້ຜັນຂະຫຍາຍເຂົ້າສູ່ພາກປະຕິບັດຕົວຈິງໂດຍກໍານົດໄວ້ໃນກົດໝາຍວ່າດ້ວຍການສົ່ງເສີມການລົງທຶນສະບັບປັບປຸງປີ 2016. ຜ່ານການຈັດຕັ້ງປະຕິບັດເຖິງວ່າໄດ້ມີນິຕິກໍາ ແລະ ກົນໄກແລ້ວ, ແຕ່ຍັງບໍ່ທັນບັນລຸໄດ້ຕາມນະໂຍບາຍ ແລະ ກົດໝາຍກໍານົດໂດຍສະເພາະຫລັກການວ່ອງ ໄວ, ໂປ່ງໃສ ແລະ ຍຸຕິທໍາ.

ທ່ານ ສອນໄຊ ສີພັນດອນ ກ່າວຕື່ມວ່າ: ການຕໍາໜິສົ່ງຂ່າວຂອງພາກທຸລະກິດ ແລະ ການຕີລາຄາຂອງສາກົນ ໂດຍສາເຫດທີ່ໃຫ້ມີຂໍ້ຄົງຄ້າງ ສົ່ງຜົນກະທົບໃສ່ປະສິດທິພາບຂອງການຈັດຕັ້ງປະຕິບັດກົນໄກການບໍລິການການລົງທຶນປະຕູດຽວໄດ້ແກ່ຄວາມເຂົ້າໃຈຕໍ່ບົດບາດບໍລິຫານມະຫາພາກຂອງບັນດາຂະແໜງ ການກ່ຽວຂ້ອງຕໍ່ການສົ່ງເສີມ ແລະ ຄຸ້ມຄອງການລົງທຶນຄວາມເປັນເອກະພາບກັນຍັງບໍ່ທັນສູງເທົ່າທີ່ຄວນ; ການຄຸ້ມຄອງການລົງທຶນຂອງພາກເອກະຊົນ, ບັນດາຂະແໜງການ ແລະ ທ້ອງຖິ່ນຍັງບໍ່ທັນເຂົ້າໃຈເລິກ ເຊິ່ງ; ຄວາມສັກສິດຕໍ່ບົດບາດຂອງຫ້ອງການບໍລິການການລົງທຶນປະຕູດຽວໃນການເປັນເສນາທິການໃຫ້ແກ່ລັດຖະບານໃນການດຶງດູດ ແລະ ສົ່ງເສີມການລົງທຶນຍັງບໍ່ທັນສູງ ແລະ ການປະສານງານລະຫວ່າງຂະແໜງການກ່ຽວຂ້ອງໃນການເຮັດບົດບາດມະຫາພາກເພື່ອຊຸກຍູ້, ສົ່ງເສີມ ແລະ ຄຸ້ມຄອງການລົງທຶນຂອງພາກເອກະຊົນຕາມແນວທາງນະໂຍບາຍ ຍັງບໍ່ທັນປະສານກັນຢ່າງກົມກຽວ ແລະ ປະສິດທິພາບ-ປະສິດທິຜົນສູງເທົ່າທີ່ຄວນ; ການຄົ້ນຄວ້າ ແລະ ປະກອບຄໍາເຫັນຂອງຂະແໜງວິຊາການຍັງຊັກຊ້າເກີນກວ່າກົດໝາຍກໍານົດຄືກິດຈະການໃນບັນຊີຄວບຄຸມ 8 ວັນລັດຖະການ ແລະ ກິດຈະການສໍາປະທານ 30 ວັນລັດຖະການ, ແຕ່ຕົວຈິງໃຊ້ເວລາສະເລ່ຍຫລາຍກວ່າ 6 ເດືອນ; ການຈັດຕັ້ງປະຕິບັດການໃຫ້ນະໂຍບາຍສົ່ງເສີມການລົງທຶນຕາມຂະແໜງການຍັງພົບຄວາມຫຍຸ້ງຍາກ ແລະ ໃຊ້ເວລາຄົ້ນຄ້ວາກັບໄປກັບມາຍ້ອນລະບຽບການກໍານົດອອກບໍ່ທັນຄົບຊຸດຈະແຈ້ງ; ການຍື່ນຄໍາຮ້ອງ ຍັງມີຈໍານວນໜຶ່ງບໍ່ຜ່ານປະຕູດຽວ; ການປະກອບສໍາເນົາຄໍາຮ້ອງຂໍລົງທຶນ ແລະ ການກໍານົດມາດຖານຂໍ້ມູນທີ່ຕ້ອງການຂອງຂະແໜງການເພື່ອຄົ້ນ ຄວ້າຍັງບໍ່ທັນສາມາດສະໜອງໃຫ້ແກ່ນັກລົງທຶນຢ່າງຄົບຊຸດໃນຈຸດດຽວໄດ້; ນອກຈາກຄວາມຊັກຊ້າທີ່ເກີດຈາກການບໍລິການຂອງພາກລັດແລ້ວຍັງເກີດຂຶ້ນຈາກການຈັດຕັ້ງປະຕິບັດຕາມກົດໝາຍ ລະບຽບການຂອງນັກລົງທຶນເອງເຊັ່ນ: ຖືເບົາການປະຕິບັດຕາມເອກະສານທາງການ, ຜູ້ລົງທຶນຂາດປະສົບປະການ, ບໍ່ມີຄວາມພ້ອມດ້ານທຶນຮອນ, ມີຂໍ້ຂັດແຍ່ງລະຫວ່າງຜູ້ລົງທຶນດ້ວຍກັນ ແລະ ອື່ນໆ; ການຕິດຕາມ ແລະ ການຄຸ້ມຄອງໂຄງການຍັງເຮັດບໍ່ທັນໄດ້ດີ ບໍ່ທັນເປັນລະ ບົບຕໍ່ເນື່ອງສອດຄ່ອງກັບນິຕິກໍາ, ຍັງມີລັກສະນະໂຍນຄວາມຮັບຜິດຊອບໃຫ້ແກ່ກັນລະຫວ່າງຂະແໜງການກັບຂະແໜງການ ແລະ ລະຫວ່າງສູນກາງກັບທ້ອງຖິ່ນດັ່ງນີ້ເປັນຕົ້ນ. ທ້າຍເດືອນຕຸລາ 2021, ກະຊວງແຜນການ ແລະ ການລົງທຶນໃນນາມຄູ່ສັນຍາຂອງບັນດາໂຄງການໄດ້ເຮັດໝັງສືມອບສິດການຕິດຕາມກວດກາ ແລະ ຄຸ້ມຄອງບັນດາໂຄງການລົງທຶນພາກເອກະຊົນໃນຂະແໜງບໍ່ແຮ່ໃຫ້ບັນດາແຂວງແລະ ນະຄອນຫລວງວຽງຈັນເພື່ອຊີ້ນໍາ ແລະ ເປັນເຈົ້າການສົມທົບກັບພາກສ່ວນກ່ຽວຂ້ອງຂອງແຂວງ ແລະ ນະຄອນຫລວງວຽງຈັນເພື່ອລົງຕິດຕາມກວດກາ ແລະ ຄຸ້ມຄອງການລົງທຶນຂອງບັນດາໂຄງການລົງທຶນໃນຂະແໜງບໍ່ແຮ່ຕົວຈິງ ເພື່ອແກ້ໄຂໃຫ້ທັນສະພາບການທີ່ເກີດຂຶ້ນແຕ່ລະໄລຍະ.

ພ້ອມນີ້ເພື່ອອໍານວຍຄວາມສະດວກໃຫ້ແກ່ການລົງທຶນ, ຫລຸດຜ່ອນບັນດາຂອດຂັ້ນການພິຈາລະນາອະນຸມັດຂອງຂະແໜງການພາກລັດເຮັດໃຫ້ກົນໄກການພິຈາລະນາອະນຸມັດການລົງທຶນກະທັດຮັດແລະ ສົ່ງເສີມການລົງ ທຶນໃຫ້ເປັນເອກະພາບ, ໂປ່ງໃສ, ວ່ອງໄວ, ທັນກໍານົດເວລາ ມີປະສິດທິພາບ ແລະ ປະສິດທິຜົນສາມາດແຂ່ງຂັນ ແລະ ດຶງດູດການລົງທຶນທີ່ມີຄຸນນະພາບໄດ້; ເພື່ອເພີ່ມທະວີການສ້າງຄວາມເຂັ້ມແຂງແກ່ອົງການຈັດຕັ້ງລັດແຕ່ຂັ້ນສູນກາງລົງຮອດທ້ອງຖີ່ນຕາມທິດ 3 ສ້າງຂອງພັກ ແລະ ລັດຖະບານ ຊຶ່ງຈໍາເປັນຕ້ອງໄດ້ປັບປຸງການສົ່ງເສີມ ແລະ ຄຸ້ມຄອງການລົງທຶນໃຫ້ມີປະສິດທິພາບມີຈຸດສຸມເປັນຍຸດທະສາດກກວ່າເກົ່າ.