ລະນຶກວັນເສຍສະລະຊີວິດຂອງວິລະຊົນສີທອງ

ກ່ອນໜ້ານີ້ 61 ປີ(15 ທັນວາ 1960) ເປັນມື້ທີ່ສະຫາຍ ສີທອງ ໄດ້ເສຍສະລະຊີວິດໃນສະມໍລະພູມປ້ອງກັນຕົວເມືອງວຽງຈັນຢ່າງພິລະອາດຫານ. ຕະຫລອດຊີວິດຂອງສະຫາຍໄດ້ອຸທິດໃຫ້ແກ່ປະເທດຊາດ ສົມແລ້ວທີ່ເປັນລູກຮັກຫລານແພງຜູ້ປະເສີດຂອງປະຊາຊົນລາວບັນດາເຜົ່າ, ເປັນພະນັກງານ-ເປັນນັກຮົບຜູ້ອົງອາດກ້າຫານຂອງກອງທັບລາວອິດສະລະກໍຄືກອງທັບປະຊາຊົນລາວໃນປັດຈຸບັນ.

ສະຫາຍ ສີທອງ ເກີດເມື່ອວັນທີ 9 ສິງຫາ 1925 ຢູ່ບ້ານນາຫອຍປັງ ຕາແສງບ້ານໄຮ່ ເມືອງນາຊາຍທອງ ແຂວງວຽງຈັນ (ປັດຈຸບັນແມ່ນເມືອງສັງທອງນະຄອນຫລວງວຽງຈັນ) ເປັນລູກຂອງພໍ່ຊຽງມີ, ແມ່ໂສພາ, ມີນ້ອງຮ່ວມອຸທອນດຽວກັນ 2 ຄົນຄື ນາງ ບຸນຮອງ ແລະ ທ້າວ ກອງສີ. ເມື່ອຫວນຄືນປະຫວັດການເຄື່ອນໄຫວຂອງສະຫາຍ ສີທອງ ເຫັນວ່າ: ວັນທີ 8 ມັງກອນ 1947, ສີທອງ ພ້ອມດ້ວຍໝູ່ຈຳນວນໜຶ່ງໄດ້ຈາກບ້ານນາຫອຍປັງຢ່າງປິດລັບເຂົ້າເປັນທະຫານ “ລາວອິດສະລະ” ຢູ່ເຂດທີ່ໝັ້ນແຫ່ງໜຶ່ງ. ວັນທີ 24 ເມສາ 1949 ໄດ້ເປັນທະຫານສັງກັດຢູ່ກອງຟ້າງຸຸ່ມ ແລະ ຖືກບັນຈຸສັບຊ້ອນເຂົ້າໃນກຳລັງປະກອບອາວຸດຢູ່”ກອງຮ້ອຍ10″. ຕົ້ນປີ 1950 ໄດ້ຖືກສົ່ງໄປຮຽນການເມືອງ-ການທະຫານເພື່ອຮຽນຮູ້ສິລະປະຍຸດຍຸດທະວິທີການສູ້ຮົບ. ວັນທີ 3-17 ກັນຍາ 1950, ຄະນະກອງຮ້ອຍ 10 ໄດ້ມອບໝາຍໜ້າທີ່ໃຫ້ສະຫາຍ ສີທອງ ນຳພານັກຮົບປະສົມລາວ-ຫວຽດນາມ ໝວດທີໜຶ່ງໄປສະກັດຕີສັດຕູຢູ່ເຂດບ້ານນາປໍຫລັກ 52 ເມືອງໂພນໂຮງ ແລະ ໄດ້ຮັບໄຊຊະນະ. ວັນທີ 18 ກໍລະກົດ 1951, ຄະນະພັກແຂວງວຽງຈັນໄດ້ຕົກລົງໃຫ້ສະຫາຍ ສີທອງ ໄປຍົກລະດັບການເມືອງ-ການທະຫານຢູ່ ສສ ຫວຽດນາມ ແລະ ສະຫາຍໄດ້ເຂົ້າເປັນສະມາຊິກຊາວໜຸ່ມຕະລຸມບອນ ທັງໄດ້ປະກອບສ່ວນຕີຕ້ານສັດຕູ ແລະ ຈັກກະພັດຜູ້ຮຸກຮານຢ່າງພິລະອາດຫານຕະຫລອດມາ.

ສະຫາຍ ສີທອງ ກຳເນີດໃນຄອບຄົວຊາວໄຮ່ນາ, ເປັນຜູ້ທີ່ມີທັດສະນະໜັກແໜ້ນ, ສະຫລຽວສະຫລາດໃນການນຳພາສູ້ຮົບ ແລະ ສູ້ຮົບມີໄຊ, ຮູ້ຈັກໝູນໃຊ້ກຳລັງປະສານສົມທົບກັບພູມີປະເທດ ເພື່ອຕໍ່ສູ້ກັບສັດຕູ, ມີມານະຈິດ ແລະ ເຊື່ອໝັ້ນອຸດົມການປະຕິວັດຢ່າງໜັກແໜ້ນ. ເຖິງວ່າສະຖານະການຫຍຸ້ງຍາກຄັບຂັນພຽງໃດກໍເດັດດ່ຽວອາດຫານຜ່ານຜ່າເພື່ອໄຊຊະນະ ເຊິ່ງໄດ້ກາຍເປັນການອຸທິດຊີວິດອັນອົງອາດກ້າຫານ ແລະ ພຶດຕິກຳອັນລ້ຳເລີດຂອງໃນພາລະກິດປະຕິວັດ. ພ້ອມນັ້ນ ກໍກາຍເປັນແບບຢ່າງອັນດີງາມເປັນແວ່ນແຍງອັນໃສແຈ້ງໃຫ້ແກ່ພະນັກງານ, ສະມາຊິກພັກ ແລະ ປະຊາຊົນລາວບັນດາເຜົ່າ.