Pfizer ເຜີຍ ຢາເມັດແພັກໂລວິດມີທ່າອ່ຽງຮັບມື ເຊື້ອໂອມິຄຣອນໄດ້ ມີປະສິດທິພາບ 89% ຊ່ວຍຫລຸດການນອນໂຮງໝໍ-ເສຍຊີວິດ
ວັນທີ 14 ທັນວາ 2021, ທີມຜູ້ຜະລິດ ແລະ ພັດທະນາວັກຊີນປ້ອງກັນໂຄວິດຂອງ Pfizer ເປີດເຜີຍວ່າ: ຢາເມັດຕ້ານໂຄວິດແພັກໂລວິດ (Paxlovid) ມີທ່າອ່ຽງຮັບມືເຊື້ອໂອມິຄຣອນໄດ້ ໂດຍຜົນການທົດສອບຮອບສຸດທ້າຍພົບວ່າ: ມີປະສິດທິພາບ 89% ໃນການຊ່ວຍຫລຸດໂອກາດການນອນໂຮງໝໍ ແລະ ເສຍຊີວິດໃນຜູ້ທີ່ມີຄວາມສ່ຽງສູງທີ່ອາດຈະມີອາການຮຸນແຮງພາຍຫລັງການຕິດເຊື້ອ ໂດຍສະເພາະກຸ່ມຜູ້ທີ່ມີນ້ຳໜັກເກີນ ຫລື ກຸ່ມຜູ້ສູງອາຍຸ.
ຂະນະທີ່ການສຶກສາເບື້ອງຕົ້ນອີກອັນໜຶ່ງພົບວ່າ: ຢາເມັດແພັກໂລວິດຍັງມີສ່ວນຊ່ວຍຜູ້ທີ່ມີຄວາມສ່ຽງຕໍ່າທີ່ຈະມີອາການຕິດເຊື້ອຮຸນແຮງນຳເຊັ່ນກັນເຊັ່ນ: ຜູ້ທີ່ເຂົ້າຮັບການສັກວັກຊີນປ້ອງກັນໂຄວິດແລ້ວແຕ່ຕໍ່ມາຕິດໂຄວິດ ເຊິ່ງຢາເມັດນີ້ມີປະສິດທິພາບ 70% ໃນການຊ່ວຍຫລຸດໂອກາດການນອນໂຮງໝໍ ແລະ ເສຍຊີວິດໃນກຸ່ມຜູ້ທີ່ມີຄວາມສ່ຽງຕໍ່າໄດ້.
ນັກວິທະຍາສາດເບິ່ງວ່າ: ຢາເມັດແພັກໂລວິດຈະເປັນໜຶ່ງໃນທາງເລືອກສຳລັບຜູ້ທີ່ຫາກໍຕິດໂຄວິດ ແລະ ກຳລັງຊອກຫາວິທີຫລຸດຄວາມຮຸນແຮງທີ່ອາດຈະເກີດຂຶ້ນພາຍຫລັງການຕິດເຊື້ອ ໂດຍ JPMorgan Chase & Co. ຄາດການວ່າ: ຢາເມັດຕ້ານໂຄວິດຂອງ Pfizer ນີ້ຈະມີມູນຄ່າການຊື້ຂາຍ 1,8 ໝື່ນລ້ານໂດລາສະຫະລັດ ໃນປີ 2022.
ກ່ອນໜ້ານີ້, ອັລເບິດ ບົວຣ໌ລາ ຜູ້ບໍລິຫານຂອງ Pfizer ສະແດງຄວາມໝັ້ນໃຈວ່າ: ຢາເມັດແພັກໂລວິດຈະສາມາດຮັບມືເຊື້ອໂອມິຄຣອນໄດ້ ເນື່ອງຈາກຢາມຸ້ງເປົ້າໃສ່ສ່ວນອື່ນໆຂອງເຊື້ອໄວຣັສ ເຊິ່ງເປັນແອນໄຊທີ່ໃຊ້ສຳລັບການຈຳລອງແບບ ບໍ່ໄວຕໍ່ການກາຍພັນ. ຂະນະທີ່ວັກຊີນປ້ອງກັນໂຄວິດຈະມຸ້ງເປົ້າໃສ່ໂປຣຕີນຂັດຂວາງທີ່ໄວຣັສໃຊ້ໃນການບຸກລຸກເຊລຂອງມະນຸດ ເຊິ່ງໂປຣຕີນນັ້ນກາຍພັນຊ້ຳແລ້ວຊ້ຳອີກຕະຫລອດໄລຍະການແຜ່ລະບາດ.
ອ້າງອີງ:
- https://www.wsj.com/articles/pfizer-says-its-covid-19-pill-likely-works-against-omicron-11639482302?mod=e2tw
- https://www.wsj.com/articles/pfizer-says-covid-19-pill-is-89-effective-in-preliminary-assessment-11636109100?mod=article_inline
- https://www.reuters.com/business/healthcare-pharmaceuticals/pfizer-says-covid-19-pill-near-90-effective-final-analysis-2021-12-14/
