ຍາມຝົນຂໍໃຫ້ນັກຂັບຂີ່ຄຳນຶງເຖິງ ຈັນຍາບັນຂອງຕົນຫລາຍຂຶ້ນ
ເພື່ອນຜູ້ອ່ານທີ່ຮັກແພງ, ກໍດັ່ງພວກເຮົາພວມປະສົບໃນໄລຍະນີ້ເປັນໄລຍະລະດູຝົນທີ່ສົ່ງຜົນກະທົບບໍ່ໜ້ອຍແກ່ການໃຊ້ລົດໃຊ້ຖະໜົນ ແລະ ການໄປມາຫາສູ່ກັນຂອງປະຊາຊົນເຮົາ ໂດຍສະເພາະຢູ່ນະຄອນຫລວງວຽງຈັນ ສະພາບຝົນຕົກດັ່ງກ່າວໄດ້ສົ່ງຜົນໃຫ້ເສັ້ນທາງຫລາຍສາຍເປ່ເພເປັນບວກເປັນຂຸມ ແລະ ມີນ້ຳຖ້ວມຂັງເປັນຈຳນວນບໍ່ໜ້ອຍ ສົ່ງຜົນກະທົບໃຫ້ການສັນຈອນໄປມາພົບຄວາມຫຍຸ້ງຍາກ ແລະ ມີສະພາບແອອັດເກີດຂຶ້ນ. ໃນຂະນະຜູ້ຂັບຂີ່ຈຳນວນໜຶ່ງພັດບໍ່ຄຳນຶງເຖິງຈັນຍາບັນຂອງຕົນ ຂີ່ລົດໄວແຊງໜ້າແຊງຫລັງຢ່າງບໍ່ມີລະບຽບ, ຢຽບນ້ຳຢຽບຕົມຟົ້ງໃສ່ຜູ້ອື່ນ ໂດຍສະເພາະແມ່ນຜູ້ຂັບລົດຈັກ-ລົດຖີບໄດ້ຮັບຄວາມເສຍປຽບ, ບາງຄັ້ງລົດໃຫຍ່ແລ່ນຜ່ານໄປແລ້ວຢຽບນ້ຳຟົ້ງໃສ່ຈົນປຽກໄປເຕັມໂຕ ແລະ ບໍ່ພໍເທົ່ານັ້ນ ບາງຄົນຍັງຝ່າຝືນລະບຽບຈະລາຈອນລ່ວງປ້າຍຫ້າມແຊງກັນໄປຢ່າງບໍ່ມີລະບຽບ ເຮັດໃຫ້ການສັນຈອນແອອັດ ແລະ ຕິດກັນເປັນສາຍຍາວຢຽດ ກໍເນື່ອງມາຈາກນັກຂັບຂີ່ຈຳນວນໜຶ່ງບໍ່ຄຳນຶງເຖິງຈັນຍາບັນ ແລະ ລະບຽບການຈະລາຈອນ.
ໃນບົດຂຽນສະບັບນີ້, ທ່ຽງທຳກໍຂໍຮຽກຮ້ອງໃຫ້ນັກຂັບຂີ່ທັງຫລາຍຈົ່ງເພີ່ມຄວາມມີສະຕິໃນການປະຕິບັດລະບຽບການຈະລາຈອນດີຂຶ້ນ, ຖ້າທຸກຄົນຫາກຄຳນຶງເຖິງຈັນຍາບັນຂອງຕົນແລ້ວກໍຈະຊ່ວຍໃຫ້ການໃຊ້ລົດໃຊ້ຖະໜົນມີຄວາມເປັນລະບຽບຮຽບຮ້ອຍ ແລະ ສະດວກສະບາຍດີຂຶ້ນ. ພ້ອມນັ້ນເບື້ອງເຈົ້າໜ້າທີ່ຈະລາຈອນກໍຕ້ອງໄດ້ເພີ່ມທະວີຄວາມຮັບຜິດຊອບໃນການປະຕິບັດໜ້າທີ່ຄວບຄຸມ ແລະ ລະບາຍການຈະລາຈອນໃຫ້ດີກວ່າເກົ່າ.
