ຫົວໃຈມີບັນຫາ, ອາເກວໂຣ ຫລັງນ້ຳຕາປະກາດຢຸດຫລິ້ນບານເຕະອາຊີບໃນອາຍຸພຽງ 33 ປີ
ວັນທີ 15 ທັນວາທີ່ຜ່ານມານີ້ ເຊີຄີໂອ ອາເກວໂຣ ຖະແຫລງຂ່າວຮ່ວມກັບ ໂຈນ ລາປໍຕາ ປະທານສະໂມສອນບາເຊໂລນາ ທີ່ຄຳນູ ສະຫນາມແຂ່ງຂອງທີມຍັກໃຫຍ່ແຫ່ງເວທີ ລາລີກາ ສະເປນ ໂດຍປະກາດທັງນຳ້ຕາວ່າ ລາວຈຳເປັນຕ້ອງເລີກຫລິ້ນບານເຕະອາຊີບພຽງເທົ່ານີ້ ເນື່ອງຈາກບັນຫາດ້ານສຸຂະພາບ.
ກ່ອນຫນ້ານີ້ ອາເກວໂຣ ມີອາການແຫນ້ນຫນ້າເອິກ ຈົນຖືກປ່ຽນຕົວອອກໃນນາທີທີ 41 ລາ ລີກາ ສະເປນ ທີ່ບາເຊໂລນາ ເປີດບ້ານສະເຫມີກັບ ອາລາເບສ 1-1 ເມື່ອວັນທີ 30 ຕຸລາ ເຊິ່ງການວິເຄາະເບື້ອງຕົນລະບຸວ່າມີອາການຫົວໃຈເຕັ້ນຜິດຈັງຫວະ ຕ້ອງພັກປິ່ນປົວຢ່າງຫນ້ອຍ 3 ເດືອນ.
ແຕ່ຈາກການກວດເພີ່ມຕື່ມໃນເວລາຕໍ່ມາພົບວ່າ ບັນຫາທີ່ເກີດຂຶ້ນກັບ ອາເກວໂຣ ມີຄວາມຊັບຊ້ອນກວ່າທີ່ຄິດ ເຊິ່ງແຫລ່ງຂ່າວລະບຸວ່າ ຫມໍໄດ້ສະເຫນີທາງເລືອກໃນການແຂວນສະຕັດຢຸດຕິອາຊີບນັກເຕະໃຫ້ລາວພິຈາລະນາແລ້ວ ເນື່ອງຈາກອາການຂອງລາວມີຄວາມສ່ຽງຕໍ່ການຫລິ້ນກິລາອາຊີບ.
ທັງນີ້ ເຊີຄີໂອ ອາເກວໂຣ ຫາກໍຍ້າຍມາຢູ່ກັບ ບາເຊໂລນາ ເມື່ອເດືອນກໍລະກົດ ຫລັງຫມົດສັນຍາຈາກ ແມນເຊສເຕີ ຊິຕີ ທີ່ລາວຫລິ້ນມາດົນເຖິງ 10 ປີ ຕັ້ງແຕ່ປີ 2011-2021 ຈົນກາຍເປັນດາວຍິງສູງສຸດຂອງສະໂມສອນ ດ້ວຍຜົນງານ 260 ປະຕູ ຄວ້າແຊ໊ມພຣີເມຍລີກ ອັງກິດ 5 ສະໄຫມ, ເອັບເອ ຄັບ 1 ສະໄຫມ, ລີກຄັບ 6 ສະໄຫມ, ຄອມມູນີຕີຊິລ 3 ສະໄຫມ ແລະ ຮອງແຊ໊ມ ຢູຟາ ແຊ໊ມປຽນລີກ ລະດູການຜ່ານມາ.
ນອກຈາກນີ້ ອາເກວໂຣ ຍັງຕິດທີມຊາດອາເຈນຕີນາ ເຖິງ 101 ນັດ ຍິງໄປ 42 ປະຕູ ໂດຍຄອງຕຳແຫນ່ງດາວຍິງສູງສຸດຕະຫລອດການອັນດັບ 3 ຂອງອາເຈນຕີນາ ຖັດຈາກ ລີໂອເນລ ເມສຊີ ແລະ ກາບຣຽລ ບາຕິສຕູຕາ.
ແນວໃດກໍຕາມ ອາເກວໂຣ ພັດມີບັນຫາບາດເຈັບຕະຫລອດ ຕັ້ງແຕ່ໄລຍະກ່ອນເປີດລະດູການແລະ ຫາກໍສົມບູນກັບມາອີກຄັ້ງ ໂດຍໄດ້ລົງສະຫນາມໃຫ້ບາເຊໂລນາ ພຽງ 5 ນັດ ລວມທຸກລາຍການ ແລະ ເປັນ 11 ຄົນທຳອິດ ພຽງ 2 ຄັ້ງ ຍິງໄປ 1 ປະຕູ ກ່ອນເຂົ້າຮັບການປິ່ນປົວອາການຜິດປົກກະຕິຂອງຫົວໃຈ.
