ຄະນະຮັບຜິດຊອບກຽມແຜນເປີດປະເທດ ຫາລືຕ້ອນຮັບນັກທ່ອງທ່ຽວ

ໃນກອງປະຊຸມຄະນະຮັບຜິດຊອບກະກຽມແຜນເປີດປະເທດ ເພື່ອຕ້ອນຮັບນັກທ່ອງທ່ຽວທີ່ຈັດຂຶ້ນໃນຕອນເຊົ້າວັນທີ 15 ທັນວາ 2021 ທີ່ໂຮງແຮມແລນມາກ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ສຈ.ປອ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີໂດຍທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາ ລັດຖະມົນຕີ, ຮອງລັດຖະມົນຕີ, ຜູ້ຕາງໜ້າບັນດາກະຊວງ, ຂະແໜງການ, ພາກທຸລະກິດແລະພາກສ່ວນກ່ຽວຂ້ອງເຂົ້າຮ່ວມນັ້ນ ຊີ້ໃຫ້ເຫັນວ່າ: ມາເຖິງປັດຈຸບັນ, ແຕ່ລະຂະແໜງການກໍຄືພາກທຸລະກິດຂັ້ນສູນກາງແລະ ຂັ້ນແຂວງ ມີຄວາມຮັບຜິດຊອບສູງຕໍ່ການກຽມຄວາມພ້ອມເປີດປະເທດເພື່ອຕ້ອນຮັບນັກທ່ອງທ່ຽວ.

ທ່ານ ສຈ.ປອ ກິແກ້ວ ໄຂຄຳພິທູນຮອງນາຍົກລັດຖະມົນຕີ ກ່າວໃນກອງປະຊຸມວ່າ:ການເປິດປະເທດເພື່ອຕ້ອນຮັບນັກທ່ອງທ່ຽວ ເປັນໜຶ່ງໃນນະໂຍບາຍຂອງລັດຖະບານເພື່ອແກ້ໄຂຜົນທົບດ້ານເສດຖະກິດຂອງປະເທດ ຍ້ອນການລະບາດພະຍາດ ໂຄວິດ-19ແລະ ກໍເປັນສິ່ງທີ່ສັງຄົມສົນໃຈ ແລະ ມີຫລາຍຄໍາເຫັນແຕກຕ່າງກັນ. ແນວໃດກໍ່ຕາມ, ພວກເຮົາໃນຖານະທີ່ໄດ້ຮັບການມອບໝາຍຈາກລັດຖະບານໃຫ້ຮັບຜິດຊອບວຽກງານດັ່ງກ່າວຕ້ອງໄດ້ເປັນເອກພາບກັນສູງເພື່ອອະທິບາຍຊີ້ແຈງໃຫ້ສັງຄົມເຂົ້າໃຈກ່ຽວກັບແຜນການ, ຂັ້ນຕອນຕ່າງໆ ລວມເຖິງນິຕິກຳທີ່ກ່ຽວຂ້ອ ໃນການເປີດປະເທດຂອງສປປ ລາວ ເພື່ອ ຕ້ອນຮັບນັກທ່ອງທ່ຽວ.ໃນການຈັດຕັ້ງປະຕິບັດຕົວຈິງຕ້ອງໄດ້ດຳເນີນໄປເປັນກ້າວໆດ້ວຍຄວາມລະມັດລະວັງ ພວກເຮົາບໍ່ສາມາດເປີດປະເທດພ້ອມກັນໄດ້ບາດດຽວ. ອີງໃສ່ມາດຕະການຄວບຄຸມການລະບາດຂອງພະຍາດໂຄວິດ-19 ພວກເຮົາ ຕ້ອງໄດ້ຄົ້ນຄວ້າກໍານົດການເປີດປະເທດຢ່າງຮອບຄອບ ແລະ ມີແຜນການລະອຽດຮັດກຸມ, ມີການໂຄສະນາປະຊາສໍາພັນໃຫ້ສັງຄົມເຂົ້າໃຈເລິກເຊິ່ງໃນການຈັດຕັ້ງປະຕິບັດ ແລະໃຫ້ນັກທ່ອງທ່ຽວຮັບຮູ້ເຖິງຂໍ້ມູນຕ່າງໆກ່ອນເຂົ້າປະເທດ. ເຖິງວ່າວຽກງານດັ່ງກ່າວຈະພົບຄວາມຫຍຸ້ງຍາກ ແຕ່ພາຍໃຕ້ການນໍາພາຂອງພັກ-ລັດຖະບານ ເຊື່ອໝັ້ນວ່າ ພວກເຮົາຈະຕ້ອງຜ່ານຜ່າວິກິດນີ້ໄປພ້ອມກັນ ເພື່ອກ້າວໄປເຖິງເປົ້າໝາຍທີ່ກໍານົດໄວ້. ດັ່ງນັ້ນ,ທຸກຂະແໜງການທັງພາກລັດ ແລະ ພາກທຸລະກິດຕ້ອງເປັນເອກະພາບ, ມີຄວາມຮັບຜິດຊອບສູງຮ່ວມກັນຈຶ່ງສາມາດບັນລຸວຽກງານທີ່ສຳຄັນນີ້ໄດ້.

ທ່ານ ສຈ.ປອ ກິແກ້ວ ໄຂຄຳພິທູນຮອງນາຍົກລັດຖະມົນຕີ ຢໍ້າວ່າ:ພາຍຫລັງກອງປະຊຸມ ສະເໜີໃຫ້ບັນດາທ່ານໃນຄະນະຮັບຜິດຊອບວຽກງານດັ່ງກ່າວນີ້ທີ່ປະຈຳຢູ່ບັນດາກະຊວງ ກວດກາຄືນວຽກງານ ມີບັນຫາໃດຍັງຄ້າງຄາຄວນຮີບດ່ວນແກ້ໄຂ, ໃຫ້ປະສານງານກັນຕໍ່ນື່ອງ, ກຳນົດນິຕິກໍາລະອຽດ, ບໍ່ຊ້ຳຊ້ອນ ແລະ ບໍ່ມີຫລາຍຂັ້ນຕອນ, ເປັນເອກະພາບສາມາດຈັດຕັ້ງປະຕິບັດໄດ້ ບົນພື້ນຖານຮັບປະກັນມາດຕະການຄວບຄຸມການລະບາດຂອງພະຍາດໂຄວິດ-19 ຢ່າງຮັດກຸມ.ສໍາລັບຂົງເຂດທ່ອງທ່ຽວ ພາກທຸລະກິດຕ້ອງເປັນເຈົ້າການສົມທົບກັບພາກສ່ວນທີ່ກ່ຽວຂ້ອງ ແລະ ແຂວງເປົ້າໝາຍເພື່ອກໍານົດຈຸດບໍລິການໃນເຂດທ່ອງທ່ຽວສີຂຽວໂດຍຄຳນຶງເຖິງຄວາມສາມາດຄຸ້ມຄອງ ແລະ ຄວາມພ້ອມຂອງພາກສ່ວນກ່ຽວຂ້ອງ, ຕ້ອງໄດ້ມີຄວາມຮັບຜິດຊອບສູງ ແລະ ເປັນເຈົ້າການໂຄສະນາສື່ສານ ໃຫ້ນັກທ່ອງທ່ຽວ ຮັບຊາບລາຍລະອຽດກ່ອນເຂົ້າປະເທດ ເປັນຕົ້ນ ຂັ້ນຕອນການຂໍອະນຸຍາດວີຊ່າ, ຂັ້ນຕອນເຂົ້າເຖິງຂໍ້ມູນໂດຍສະເພາະການເຂົ້າມາທ່ອງທ່ຽວໃນເຂດທ່ອງທ່ຽວສີຂຽວ ຈະມີສະຖານທີ່ບໍລິການ, ສິ່ງອຳນວຍຄວາມສະດວກ ແລະ ສັນຍະລັກຕ່າງໆທີ່ກໍານົດຢູ່ໃນເຂດທ່ອງທ່ຽວແນວໃດ (ເພື່ອໃຫ້ນັກທ່ອງທ່ຽວຮູ້ວ່າອະນຸຍາດໃຫ້ໄປໄດ້ຫລືບໍ່) ສິ່ງທີ່ສໍາຄັນທີ່ສຸດແມ່ນມາດຕະການປ້ອງກັນການແພ່ລະບາດຂອງພະຍາດໂຄວິດ-19 ເພື່ອສ້າງຄວາມເຊື່ອໝັ້ນໃຫ້ແກ່ນັກທ່ອງທ່ຽວ, ສໍາລັບນັກທ່ອງທ່ຽວທີ່ຈະເຂົ້າມາຕ້ອງໄປຕາມລາຍການທີ່ກໍານົດ, ນຳໃຊ້ການບໍລິການໂຮງແຮມ, ຮ້ານອາຫານ ແລະສະຖານທີ່ທ່ອງທ່ຽວຕາມທີ່ໄດ້ກຳນົດໃນລາຍການທີ່ໄດ້ສະເໜີມາໂດຍຜ່ານການຮັບຮອງຂອງຂະແໜງການກ່ຽວຂ້ອງເທົ່ານັ້ນ. ເພື່ອຮັບປະກັນໃຫ້ການເປີດປະເທດເພື່ອຕ້ອນຮັບນັກທ່ອງທ່ຽວສຳເລັດຕາມຄາດໝາຍ, ສະເໜີໃຫ້ຂະແໜງການກ່ຽວຂ້ອງສຸມໃສ່ການສັກວັກຊິນປ້ອງກັນພະຍາດໂຄວິດ-19 ໃຫ້ປະຊາຊົນ, ຜູ້ປະກອບການບໍລິການທ່ອງທ່ຽວໃຫ້ຄົບຕາມກໍານົດໂດຍສະເພາະເຂດທີ່ໄດ້ກຳນົດໃຫ້ນັກທ່ອງທ່ຽວໄປຢ້ຽມຢາມ ແລະ ໃຊ້ບໍລິການຕ່າງໆ, ຈະມີມາດຕະການແນວໃດເພື່ອຊ່ວຍເຫລືອນັກທ່ອງທ່ຽວເວລາຕິດເຊື້ອເຫລົ່ານີ້ເປັນຕົ້ນ. ມອບໃຫ້ກະຊວງຖະແຫລງຂ່າວ,ວັດທະນະທໍາ ແລະ ທ່ອງທ່ຽວເປັນເຈົ້າການສົມທົບກັບພາກສ່ວກ່ຽວຂ້ອງທັງພາກລັດ ແລະ ຜູ້ປະກອບການສືບຕໍ່ຜັນຂະຫຍາຍແຜນຟື້ນຟູການທ່ອງທ່ຽວຈາກການລະບາດຂອງພະບາດໂຄວິດ-19 ທີ່ຮັບຮອງແລ້ວ. ມອບໃຫ້ສະພາການຄ້າ ແລະ ອຸດສາຫະກໍາແຫ່ງຊາດສົມທົບກັບພາກສ່ວນກ່ຽວຂ້ອງເປັນເຈົ້າການປັບປຸງ ຜັນຂະຫຍາຍແຜນຈັດຕັ້ງປະຕິບັດສຳລັບເຂດທ່ອງທ່ຽວລາວສີຂຽວ ເພື່ອການທ່ອງທ່ຽວທີ່ປອດໄພຈາກພະຍາດໂຄວິດ-19 ຢູ່ ສປປ ລາວ ແຕ່ລະໄລຍະໃຫ້ລະອຽດ ປະເມີນຜົນເປັນແຕ່ລະໄລຍະ ແລະ ລາຍງານຂັ້ນເທິງຢ່າງຕໍ່ເນື່ອງ ເພື່ອຊີ້ນໍາການປັບປຸງບັນຫາທີ່ຄ້າງຄາໃຫ້ທັນສະພາບການເຮັດໃຫ້ພວກເຮົາສາມາດບັນລຸວຽກງານດັ່ງກ່າວ ປະກອບສ່ວນຊ່ວຍແກ້ໄຂສະພາບເສດຖະກິດຂອງປະເທດເຮັດໃຫ້ສັງຄົມໄດ້ກັບມາດຳລົງຊີວິດປົກກະຕິແບບໃໝ່ຕາມນະໂຍບາຍຂອງລັດຖະບານ.