ພາກລັດ ແລະ ເອກະຊົນ ຍີ່ປຸ່ນ-ລາວ ຫາລື ເພື່ອສົ່ງເສີມການລົງທຶນ

ວັນທີ 15 ທັນວາ 2021 ນີ້, ກະຊວງແຜນການ ແລະ ການລົງທຶນ (ຜທ) ຮ່ວມກັບ ສະຖານທູດຍີ່ປຸ່ນ ປະຈໍາ ສປປ ລາວ ໄດ້ຈັດກອງປະຊຸມປຶກສາຫາລື ລະຫວ່າງ ພາກລັດ ແລະ ເອກະຊົນ ຍີ່ປຸ່ນ-ລາວ ຄັ້ງທີ 15 ທີ່ກະຊວງ ຜທໂດຍໄດ້ຮັບການຮ່ວມມືຈາກສະພາອຸດສາຫະກຳ ແລະ ການຄ້າຍີ່ປຸ່ນ ປະຈໍາ ສປປ ລາວ (JCCIL), ອົງການສົ່ງເສີມການຄ້າຍີ່ປຸ່ນ ປະຈຳນະຄອນຫລວງວຽງຈັນ (JETRO), ອົງການຮ່ວມມືສາກົນຍີ່ປຸ່ນ ປະຈຳລາວ (JICA), ຫ້ອງການທະນາຄານຮ່ວມມືສາກົນ ປະຈຳບາງກອກ (JBIC) ແລະ ອົງການການເງິນສາກົນ ປະຈຳລາວ (IFC)ໂດຍການເປັນປະທານ ຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງ ຜທ ແລະ ທ່ານ ໂຄບາຢາຊິ ເຄນອິຈິເອກອັກຄະຣາຊະທູດຍີ່ປຸ່ນ ປະຈຳ ສປປ ລາວແລະ ມີພາກສ່ວນກ່ຽວຂ້ອງຂອງສອງຝ່າຍເຂົ້າຮ່ວມໃນຫ້ອງປະຊຸມ ແລະ ເຂົ້າຮ່ວມຜ່ານລະບົບທາງໄກ.

ໃນກອງປະຊຸມ, ໄດ້ປຶກສາຫາລື, ຄົ້ນຄວ້າ ແລະ ຊອກຫາວິທີການແກ້ໄຂບັນຫາທີ່ຕິດພັນກັບການດຳເນີນທຸລະກິດຂອງບັນດານັກລົງທຶນຍີ່ປຸ່ນ ຢູ່ ສປປ ລາວ ແລະ ເພື່ອປັບປຸງສະພາບແວດລ້ອມການລົງທຶນຢູ່ ສປປ ລາວ ໃຫ້ດີຂຶ້ນໂດຍສອດຄອງກັບທິດທາງຂອງລັດຖະບານທີ່ໄດ້ເອົາໃຈໃສ່ອຳນວຍຄວາມສະດວກໃຫ້ແກ່ນັກລົງທຶນ ແລະ ຄຳໝາຍໝັ້ນຂອງລັດຖະບານລາວຕໍ່ບັນດາຄູ່ຮ່ວມໃນເວທີພາກພື້ນ ແລະ ສາກົນ ໂດຍການສຸມໃສ່ປັບປຸງ 3 ໜ້າວຽກໃຫຍ່ ຄື:

1. ປັບປຸງການເຂົ້າເຖິງຂໍ້ມູນຂ່າວສານການລົງທຶນ, ການຍື່ນສະເໜີຂໍລົງທຶນທີ່ສະດວກວ່ອງໄວ ແລະ ມາດຕະການ, ການຈັດຕັ້ງປະຕິບັດການລົງທຶນທີ່ໂປ່ງໃສ,
2. ປັບປຸງ ແລະ ຕັດຂອດຂັ້ນການຍື່ນສະເໜີຂໍລົງທຶນໃຫ້ກະທັດຮັດ,
3. ການສ້າງເງື່ອນໄຂທີ່ອຳນວຍຄວາມສະດວກໃຫ້ແກ່ການລົງທຶນ.

ສໍາລັບກອງປະຊຸມໃນປີນີ້ໄດ້ແບ່ງອອກເປັນສອງກຸ່ມໃຫຍ່ຄື ທຸລະກິດການຄ້າ, ການຂົນສົ່ງ ແລະ ສິ່ງກີດຂວາງໃຫ້ແກ່ການເຂົ້າມາລົງທຶນຂອງທຸລະກິດໃໝ່ໃນປະເທດລາວ. ຂະນະທີ່ຜົນກະທົບຈາກພະຍາດໂຄວິດ-19 ຍັງສືບຕໍ່ແພ່ລະບາດນີ້ເປັນສິ່ງສໍາຄັນຢ່າງຍິ່ງ ທີ່ພາກລັດ ຈະຊ່ວຍຊຸກຍູ້, ຕິດຕາມ ແລະ ແກ້ໄຂບັນຫາຂອງພາກທຸລະກິດເວົ້າລວມ, ເວົ້າສະເພາະແມ່ນບໍລິສັດຍີ່ປຸ່ນເນື່ອງຈາກຈະເປັນການດຶງດູດການລົງທຶນໃໝ່ທີ່ຄາດວ່າຈະເກີດຂຶ້ນໃນໄລຍະການຟື້ນໂຕຂອງເສດຖະກິດຫລັງໂຄວິດ-19.

ເຊັ່ນດຽວກັນໃນກອງປະຊຸມດັ່ງກ່າວ, ລັດຖະບານລາວ ໄດ້ລາຍງານຄວາມຄືບໜ້າຂອງການຈັດຕັ້ງປະຕິບັດ “ຂໍ້ສະເໜີດ້ານນະໂຍບາຍ”ທີ່ຮ່າງໂດຍລັດຖະບານຍີ່ປຸ່ນເພື່ອແກ້ໄຂບັນຫາສໍາຄັນໃນໄລຍະກາງ ແລະ ໄລຍະຍາວເຊັ່ນ: ຄວາມໂປ່ງໃສ, ການປະເມີນຜົນຂອງກົດໝາຍ ແລະ ລະບຽບການຕ່າງໆ, ການຂົນສົ່ງ, ເຂດເສດຖະກິດພິເສດ ແລະ ອື່ນໆ. ປັດຈຸບັນ, ບໍລິສັດຍີ່ປຸ່ນ ຢູ່ ສປປ ລາວ ມີ164 ບໍລິສັດ ທີ່ພວມລົງທຶນຢ່າງຫ້າວຫັນໂດຍສະເພາະໃນຂະແໜງການອຸດສາຫະກໍາການຜະລິດ ເຊິ່ງເປັນການປະກອບສ່ວນສ້າງວຽກເຮັດງານທຳ, ແບ່ງປັນຄວາມຮູ້ການບໍລິຫານ ແລະ ເຕັກໂນໂລຊີການຜະລິດ, ສ້າງຄວາມຈະເລີນເຕີບໂຕຂອງເສດຖະກິດ ແລະ ການພັດທະນາຂອງປະເທດລາວ.