ກຳປູເຈຍພົບຜູ້ຕິດເຊື້ອໂຄວິດ ສາຍພັນໂອມິຄຣອນຄົນທຳອິດຂອງປະເທດ ເດີນທາງມາຈາກການາ

ວັນທີ 14 ທັນວາ 2021, ເມື່ອເວລາ 00:00 ໂມງ ກະຊວງສາທາລະນະສຸກກຳປູເຈຍ ປະກາດການກວດພົບຜູ້ຕິດເຊື້ອໂຄວິດສາຍພັນໂອມິຄຣອນຄົນທຳອິດຂອງປະເທດ ໂດຍເປັນຜູ້ເດີນທາງມາຈາກປະເທດການາ ທາງຕາເວັນຕົກຂອງທະວີບອາຟຣິກາ.

ຖະແຫລງການລະບຸວ່າ: ຜູ້ຕິດເຊື້ອເປັນຜູ້ຍິງຊາວກຳປູເຈຍອາຍຸ 23 ປີ ໂດຍສະຖາບັນປາສເຕີຂອງກຳປູເຈຍຢືນຢັນວ່າ: ຜູ້ຕິດເຊື້ອມີຜົນກວດເຊື້ອໂຄວິດສາຍພັນໂອມິຄຣອນເປັນບວກ, ຜູ້ຕິດເຊື້ອຄົນນີ້ກຳລັງຖືພາ 15 ອາທິດ ເດີນທາງຈາກການາມາເຖິງກຳປູເຈຍເມື່ອວັນທີ 13 ທັນວາ ໂດຍແວ່ຕໍ່ເຮືອບິນ 2 ຄັ້ງ ຢູ່ເມືອງດູໄບ ສະຫະລັດອາຣັບເອມິເຣດ ແລະ ນະຄອນຫລວງບາງກອກ ຂອງໄທ ກ່ອນຈະພົບວ່າມີຜົນກວດໂຄວິດເປັນບວກລະຫວ່າງກວດພະຍາດແບບໄວຢູ່ສະໜາມບິນນາໆຊາດພະນົມເປັນ.

ປັດຈຸບັນຜູ້ຕິດເຊື້ອເຂົ້າຮັບການປິ່ນປົວໃນສະຖານປິ່ນປົວຜູ້ຕິດເຊື້ອພະຍາດໂຄວິດໃນນະຄອນຫລວງພະນົມເປັນແລ້ວ.

ອ້າງອີງ:

ສຳນັກຂ່າວຊິນຮົວ