ທ່ານ ຮຸນເຊນ ສັ່ງທຳລາຍອາວຸດອາເມລິກາ ຕອບໂຕ້ອາເມລິກາຫ້າມຂາຍອາວຸດໃຫ້ ຊີ້ຄົນໃຊ້ອາວຸດອາເມລິກາມັກເສຍໄຊສົງຄາມ

ທ່ານ ຮຸນເຊນ ສັ່ງກອງທັບກຳປູເຈຍທຳລາຍອາວຸດສັນຊາດອາເມລິກາ ຕອບໂຕ້ອາເມລິກາສັ່ງຫ້າມຄ້າຂາຍອາວຸດໃຫ້ກຳປູເຈຍ, ຊີ້ໃຜໃຊ້ອາວຸດອາເມລິກາສ່ວນຫລາຍເສຍໄຊສົງຄາມທັງໝົດ.

ວັນທີ 11 ທັນວາ 2021, ສຳນັກຂ່າວເອເອັຟພີ ລາຍງານວ່າ: ທ່ານ ຮຸນເຊນ ນາຍົກລັດຖະມົນຕີກຳປູເຈຍ ອອກຄຳສັ່ງໄປຫາກອງທັບກຳປູເຈຍເມື່ອວັນທີ 10 ທັນວາ ໃຫ້ທຳລາຍອາວຸດທີ່ຜະລິດຈາກອາເມລິກາ ຫລື ໃຫ້ເກັບເຂົ້າສາງ ຫລັງລັດຖະບານອາເມລິກາມີຄຳສັ່ງຫ້າມຂາຍອາວຸດໃຫ້ກຳປູເຈຍ ໂດຍໃຫ້ເຫດຜົນເລື່ອງສິດທິມະນຸດ ແລະ ຂໍ້ກັງວົນກ່ຽວກັບອິດທິພົນຂອງຈີນໃນກຳປູເຈຍ.

ນາຍົກລັດຖະມົນຕີ ຮຸນເຊນ ໂພສຄຳສັ່ງດັ່ງກ່າວໃນເຟສບຸກ ລວມທັງລະບຸວ່າ: ຄຳສັ່ງຫ້າມຂາຍອາວຸດຂອງລັດຖະບານອາເມລິກາເປັນຄືຂໍ້ຄວາມເຕືອນເຖິງຜູ້ນຳກຳປູເຈຍລຸ້ນຕໍ່ໄປວ່າ: ຖ້າຢາກມີອິດສະຫລະພາບທາງການທະຫານຢ່າໃຊ້ອາວຸດຂອງອາເມລິກາ. ຜູ້ນຳກຳປູເຈຍຍັງຊີ້ວ່າ: ຄົນທີ່ໃຊ້ອາວຸດຂອງອາເມລິກາສ່ວນຫລາຍຈະເສຍໄຊສົງຄາມ ໂດຍຄາດວ່າອາດຈະໝາຍເຖິງກໍລະນີອັບການິດສະຖານ.

ໃນຕອນນີ້ອາເມລິກາກຳລັງຕິດຕາມການເຄື່ອນໄຫວບໍລິເວນຖານທັບເຮືອຣຽມຂອງກຳປູເຈຍທີ່ອາເມລິກາລະບຸວ່າ: ຈີນກຳລັງເຂົ້າໄປປັບປຸງເພື່ອໃຊ້ເປັນຖານທັບເຮືອ ເພື່ອໃຊ້ເປັນພື້ນທີ່ຍຸດທະສາດໃນທະເລຈີນໃຕ້. ເຖິງຢ່າງໃດກໍຕາມ, ທາງການກຳປູເຈຍປະຕິເສດວ່າ: ຂໍ້ກ່າວຫາຂອງລັດຖະບານອາເມລິກາວ່າບໍ່ມີເຫດຜົນ ແລະ ທາງການກຳປູເຈຍຈະບໍ່ຍອມໃຫ້ປະເທດໃດໃຊ້ຖານທັບຣຽມເປັນພື້ນທີ່ທາງການທະຫານ.

ອ້າງອີງ: https://www.channelnewsasia.com/…/cambodia-hun-sen…

https://www.wionews.com/…/china-continues-construction…