ຄລອບ ຖືກໃຈ 2 ນັກເຕະພຣີເມຍລີກ ກຽມດຶງເສີມທີມປີໃຫມ່ນີ້

ວັນທີ 11 ທັນວາທີ່ຜ່ານ ຫນັງສືພິມ “ເອກໂຄ’’ ລາຍງານຂ່າວວ່າ “ລີເວີພູລ’’ ສະໂມສອນໃຫຍ່ແຫ່ງເວທີ ພຣີເມຍລີກ ອັງກິດ ພວມພິຈາລະນາຄວ້າ ຈາຣອດ ໂບເວນ ປີກຊາວອັງກິດຂອງທີມ ເວສແຮມ ຢູໄນເຕັດ ແລະ ຣາຟິນຢາ ປີກທີມຊາດບຣາຊິລ ຂອງທີມ ລິດສ ຢູໄນເຕັດ ມາສູ່ຖິ່ນ ແອນຟິລ ໃນລະດູການຫນ້າ.

ທັງນີ້ ເຈີເກັນ ຄລອບ ຜູ້ຈັດການທີມລີເວີພູລ ພວມຊອກຫາການເສີມທີມຕຳແຫນ່ງກອງຫນ້າ ເນື່ອງຈາກ ໂມຮາເຫມັດ ຊາລາ ພວມຈະຫມົດສັນຍາກັບທີມໃນປີ 2023 ແລະ ການເຈລະນາຕໍ່ສັນຍາສະບັບໃຫມ່ກໍບໍ່ມີຄວາມຄືບຫນ້າແຕ່ຢ່າງໃດ ນອກຈາກນີ້ ທັງ ຊາລາ ລວມເຖິງ ຊາດີໂອ ມາເນ ກໍອາຍຸໃກ້ຈະ 30 ແລ້ວ ດັ່ງນັ້ນ ການນຳນັກເຕະໄຟແຮງ ແລະ ມີຄວາມສົດໃຫມ່ມາໃນໄລຍະປີໃຫມ່ນີ້ຈຶ່ງຖືເປັນເລື່ອງສົມເຫດສົມຜົນ ແລະ ໂບເວນ ກັບ ຣາຟິນຢາ ຄື 2 ເປົ້າຫມາຍຂອງພວກເຂົາ.