ໂຕແທນ ມາກຊິຍາລ ຢືນຢັນນັກເຕະພ້ອມຍ້າຍຫນີ ແມນຢູໄນເຕັດ ເດືອນມັງກອນນີ້

ໂຕແທນສ່ວນຕົວຂອງ ອອງໂຕນີ ມາກຊິຍາລ ກອງຫນ້າໂຕສຳຮອງຂອງ ແມນເຊສເຕີ ຢູໄນເຕັດ ເປີດເຜີຍວ່ານັກເຕະຂອງລາວຕ້ອງການທີ່ຈະ້ຍ້າຍອອກຈາກສະໂມສອນໃນໄລຍະຕະຫລາດຊື້-ຂາຍນັກເຕະເດືອນມັງກອນນີ້ ຕາມລາຍງານຈາກ ສະກາຍ ສະປອດ.

ດາວຍິງທີມຊາດຝຣັ່ງ ບໍ່ຄ່ອຍພໍໃຈກັບສະຖານະພາບປັດຈຸບັນຂອງຕົນໃນທີມ ແມນເຊສເຕີ ຢູໄນເຕັດ ເນື່ອງຈາກລາວບໍ່ໄດ້ຮັບໂອກາດໃນການລົງສະຫນາມຢ່າງຕໍ່ເນື່ອງ ເຮັດໃຫ້ນັກເຕະພວມພິຈາລະນາເລື່ອງການຍ້າຍທີມໃນຕະຫລາດຊື້-ຂາຍນັກເຕະຫນ້າຫນາວນີ້ທີ່ພວມຈະມາເຖິງນີ້.

ມາກຊິຍາລ ລົງຫລິ້ນເປັນໂຕຈິງພຽງ 2 ນັດ ແລະ ລົງຫລິ້ນໃນຖານະຕົວສຳຮອງອີກ 5 ນັດ ໃນການແຂ່ງຂັນພຣີເມຍລີກອັງກິດລະດູການນີ້ ລວມທັງຍັງໄດ້ລົງຫລິ້ນໃນ ຢູຟາ ແຊ໊ມປຽນລີກ ຮອບແບ່ງກຸ່ມພຽງ 2 ເກມ ເຊິ່ງຫນ່ຶງໃນນັ້ນຄືກັນໄດ້ລົງຫລິ້ນເປັນໂຕຈິງໃນນັດທີ່ພົບກັບ ບີຢາເຣອັນ.

ຟີລິບເປ ແລມໂບລີ ຕົວແທນສ່ວນຕົວຂອງກອງຫນ້າອາຍຸ 26 ປີ ເປີດເຜີຍກັບ ສະກາຍ ສະປອດ ເຖິງເຮື່ອງນີ້ວ່າ : “ອອງໂຕນີ ປາຖະຫນາທີ່ຈະຍ້າຍທີມໃນເດືອນມັງກອນນີ້ ລາວມີຄວາມຕ້ອງການລົງຫລິ້ນ ລາວບໍ່ຕ້ອງການຢູ່ກັບສະໂມສອນຕໍ່ ແລະ ຂ້ອຍຈະເຈລະຈາເລື່ອງນີ້ກັບທາງສະໂມສອນໂດຍໄວທີ່ສຸດ’’.

ມາກຊິຍັລ ຍ້າຍຈາກ ໂມນາໂກ ມາຍັງຖິ່ນໂອນແທຣບຟອດ ເມື່ອປີ 2015 ໂດຍເຫລືອສັນຍາກັບທີມອີກ 3 ປີ ຫລັງຈາກທີ່ຫາກໍຕົກລົງຕໍ່ສັນຍາໃຫມ່ໄປເມື່ອປີ 2019 ທີ່ຜ່ານມາ.