ກະຊວງແຜນການ ແລະ ການລົງທຶນ ປະກາດການຈັດຕັ້ງ ຮອງລັດຖະມົນຕີຄົນໃໝ່

ໃນວັນທີ 10 ທັນວາ 2021 ຜ່ານມາ, ທີ່ຫ້ອງປະຊຸມຂອງ ກະຊວງແຜນການ ແລະ ການລົງທຶນ (ຜທ) ໄດ້ຈັດພິທີປະກາດການຈັດຕັ້ງຮອງລັດຖະມົນຕີ ແລະ ຂັ້ນຄະນະກົມ ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງ ຜທ, ມີພາກສ່ວນກ່ຽວຂ້ອງເຂົ້າຮ່ວມ.

ອິງຕາມການຕົກລົງໃນກອງປະຊຸມຄະນະເລຂາທິການສູນກາງພັກ ຄັ້ງວັນທີ 14 ກັນຍາ 2021, ອີງຕາມໜັງສືສະເໜີຂອງຄະນະຈັດຕັ້ງສູນກາງພັກ ສະບັບເລກທີ 369/ຄຈສພ ລົງວັນທີ 30 ພະຈິກ 2021, ນາຍົກລັດຖະມົນຕີ ອອກຄໍາສັ່ງ: ຍົກຍ້າຍ ທ່ານ ມະໂນທອງ ວົງໄຊ ຮອງລັດຖະມົນຕີກະຊວງແຜນການ ແລະ ການລົງທຶນ ໄປຮັບໜ້າທີ່ໃໝ່ຢູ່ ກະຊວງອຸດສາຫະກໍາ ແລະ ການຄ້າ, ນາຍົກລັດຖະມົນຕີ ອອກດໍາລັດ ແຕ່ງຕັ້ງ ທ່ານ ສະຖາບັນດິດ ອິນສີຊຽງໃໝ່ ເປັນຮອງລັດຖະມົນຕີກະຊວງແຜນການ ແລະ ການລົງທຶນ.

ໃນພິທີດັ່ງກ່າວ, ກະຊວງແຜນການ ແລະ ການລົງທຶນ ຍັງໄດ້ສັບຊ້ອນ ແລະ ແຕ່ງຕັ້ງຂັ້ນຮອງຫົວໜ້າກົມ ຄື: ທ່ານ ຄໍາສາຍ ນັນທະວົງ ຮັກສາການຫົວໜ້າກົມນິຕິກໍາ ໄປເປັນຮອງຫົວໜ້າກົມສົ່ງເສີມການລົງທຶນ, ທ່ານນາງ ລັດຕະນາ ອິນທະພົນ ຮອງຫົວໜ້າຫ້ອງການສົ່ງເສີມປະຕູດຽວ ກົມສົ່ງເສີມການລົງທຶນ ໄປເປັນຮອງຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ທ່ານ ນາງ ນວນລະອອງ ທໍາມະວົງ ເປັນຮອງຫົວໜ້າຫ້ອງການ ກະຊວງ ຜທ, ທ່ານ ພົງສະຫວັນ ລາດທິຈັກ ເປັນຮອງຫົວໜ້າຫ້ອງການ ກະຊວງ ຜທ, ທ່ານ ໄຊຍະວົງ ຈິດຕະວົງ ເປັນຮອງຫົວໜ້າກົມຈັດຕັ້ງ ແລະ ພະນັກງານ ກະຊວງ ຜທ, ທ່ານ ພອນທະວົງ ສິງຫາລາດ ເປັນຮອງຫົວໜ້າກົມກວດກາ ກະຊວງ ຜທ, ທ່ານ ນະຄອນໄຊ ພິມມະຈັນ ເປັນຮອງຫົວໜ້າກົມກວດກາ ກະຊວງ ຜທ, ທ່ານ ຈັນຕະນະພອນ ວົງໄຊ ເປັນຮອງຫົວໜ້າກົມແຜນການ ກະຊວງ ຜທ, ທ່ານ ນາງ ສົມພັດ ສຸວັນນະວົງ ເປັນຮອງຫົວໜ້າກົມປະເມີນຜົນ ກະຊວງ ຜທ, ທ່ານ ທອງດາ ເພັດມະນີວົງ ເປັນຮອງຫົວໜ້າກົມປະເມີນຜົນ ກະຊວງ ຜທ, ທ່ານ ນາງ ອຸດາລອນ ສີໂພວົງ ເປັນຮອງຫົວໜ້າກົມປະເມີນຜົນ ກະຊວງ ຜທ.