ຄວາມຫວັງຂອງ ສປປ ລາວ ກັບເສັ້ນທາງລົດໄຟຄວາມໄວສູງ ລາວ-ຈີນ

ໂດຍ: ທິດກໍ່າ

ນັບແຕ່ເສັ້ນທາງລົດໄຟຄວາມໄວສູງ ລາວ-ຈີນ ໄດ້ເປີດຮັບໃຊ້ບໍລິການມວນຊົນມາແຕ່ວັນທີ 4 ທັນວາ 2021 ໄດ້ພຽງ 5 ວັນກໍມີຜູ້ໄປໃຊ້ບໍລິການເຖິງ 5.500 ກວ່າຄົນ ສະແດງວ່າມື້ໜຶ່ງມີເຖິງ 1.000 ກວ່າຄົນ. ຄາດກະວ່າໃນຂັ້ນຕໍ່ໄປ ຫລື ໃນອະນາຄົດຍາວນານ ຖ້າການແຜ່ລະບາດຂອງພະຍາດໂຄວິດ-19 ຫາກເບົາບາງລົງ ຫລື ໝົດໄປຈາກໂລກໃບນີ້ ປະເທດຊາດຂອງພວກເຮົາກໍສາມາດເປີດປະເທດໄດ້ຢ່າງສະດວກສະບາຍ ຄາດວ່ານັກທ່ອງທ່ຽວທັງພາຍໃນ ແລະ ຕ່າງປະເທດກໍຈະຫລັ່ງໄຫລເຂົ້າມາສຳຜັດກັບລົດໄຟຄວາມໄວສູງ ລາວ-ຈີນ ໄປທ່ຽວພາກເໜືອຂອງລາວຢ່າງຫລວງຫລາຍ. ນອກຈາກການບໍລິການຂົນສົ່ງໂດຍສານແລ້ວ ຍັງມີຂະບວນແກ່ສິນຄ້າເຂົ້າ-ອອກຜ່ານທາງລົດໄຟສາຍນີ້ຢ່າງຄຶກຄັກ ແລະ ຫລາຍພັນໂຕນຕໍ່ມື້.

ແຕ່ແນວໃດກໍຕາມ, ພາຍຫລັງເປີດເສັ້ນທາງລົດໄຟຄວາມໄວສູງ ລາວ-ຈີນ ຄັ້ງປະຫວັດສາດໄປແລ້ວ ກໍມີຫາງສຽງວິພາກວິຈານໄປຫລາຍສິ່ງຫລາຍຢ່າງຫລາຍແງ່ຫລາຍມຸມ ມີທັງທາງບວກ ແລະ ທາງລົບ ເປັນຕົ້ນຫລາຍຄົນກໍເວົ້າວ່າ ລາຄາປີ້ລົດໄຟແພງໂພດ, ບາງຄົນກໍວ່າ ພາຍຫລັງເປີດສາຍທາງລົດໄຟປຸບ ຈີນກໍແກ່ສິນຄ້າເຂົ້າມາຂາຍຢູ່ລາວປັບ. ນອກຈາກນັ້ນ ສື່ຂອງຕ່າງຊາດກໍວິເຄາະໄປໃນຫລາຍດ້ານ, ແຕ່ຜ່ານການຕິດຕາມເບິ່ງແລ້ວກໍຖືວ່າສ່ວນຫລາຍແມ່ນຍິນດີຊົມເຊີຍທີ່ລາວມີລົດໄຟຄວາມໄວສູງ. ອີກຈຳນວນໜຶ່ງ ໂດຍສະເພາະສື່ໃນບາງຊ່ອງຂອງປະເທດໄທໄດ້ວິຈານວ່າລາວເປັນໜີ້ຈີນຖ້ວມຫົວ, ລາຄາປີ້ລົດໄຟກໍແພງ ຄົນລາວບໍ່ມີປັນຍາຊື້ປີ້ໄດ້ ເພາະຄົນລາວຍັງທຸກຍາກ ລາຍຮັບຍັງຕໍ່າ ວ່າຊັ້ນ !

ແຕ່ແນວໃດກໍດີ, ຕາມທິດກໍ່າວ່າ ການທີ່ລາວມີລົດໄຟຄວາມໄວສູງນັ້ນມັນດີແລ້ວ ຂໍຍົກໂປ້ໃຫ້ລັດຖະບານລາວໃນຍຸກປັດຈຸບັນ ເພາະຫລາຍເຊັ່ນຫລາຍຊາດລາວເຮົາບໍ່ທັນເຄີຍມີລົດໄຟຄວາມໄວສູງແບບນີ້ ແລະ ທັງສອດຄ່ອງກັບແນວທາງນະໂຍບາຍຂອງພັກ ແລະ ລັດຖະບານທີ່ຫັນເປັນອັນທັນສະໄໝເທື່ອລະກ້າວ ເຊິ່ງເລີ່ມແຕ່ມະຕິ 8 ຫາມະຕິຄັ້ງຄັ້ງທີ 11 ກໍໄດ້ກຳນົດແຈ້ງແລ້ວ. ສ່ວນໃນເລື່ອງທີ່ວ່າປີ້ລົດໄຟແພງນັ້ນ ຕາມທິດກໍ່າວ່າ ມັນພໍດີເໝາະສົມແລ້ວ ເພາະມັນກໍມີສອງປະເພດລາຄາໃຫ້ເລືອກ, ແຕ່ຖ້າວາງລາຄາຖືກຫລາຍກວ່ານີ້ ລົດເມສາຍເໜືອຈະເຈັ້ງໄປໃນຕົວ ເພາະບໍ່ມີຄົນໄປໃຊ້ບໍລິການ.

ສະຫລຸບແລ້ວ ການເດີນທາງໃນປະເທດລາວໃຫ້ມີຫລາຍທາງເລືອກ ໃຜຕ້ອງການໄປຮອດໄວກໍຂີ່ຍົນ, ໃຜບໍ່ຢາກຂີ່ຍົນກໍຂີ່ລົດໄຟຄວາມໄວສູງ ແຕ່ໃຜຢາກໄປອ່າວຊ້າລາຄາຖືກກໍຂີ່ລົດໂດຍສານສຳຜັດກັບທຳມະຊາດເມືອງລາວສວຍງາມອຸດົມຮັ່ງມີໄປດ້ວຍທຳມະຊາດ, ມີພູເຂົາ, ແມ່ນ້ຳລຳເຊ ປານເທວາເສກສັນປັ້ນແຕ່ງ. ສ່ວນພວກວິຈານໄປໃນທາງລົບນັ້ນກໍສຸດແລ້ວແຕ່ເຂົາຊິວ່າ ເພາະຢູ່ຄົນລະມຸມ ກິນແກງຄົນລະໝໍ້ ກິນເຂົ້າຄົນລະຕິບ.