ອັດຕະປື ອະໄພຍະໂທດປ່ອຍຕົວນັກໂທດ ໃນໄລຍະການແພ່ລະບາດຂອງພະຍາດໂຄວິດ-19
ແຫລ່ງຂ່າວຈາກແຂວງອັດຕະປືລາຍງານວ່າ: ວັນທີ 10 ທັນວາ 2021 ນີ້ ຢູ່ຄ້າຍຄຸມຂັງ-ດັດສ້າງ, ກອງບັນຊາການປ້ອງກັນຄວາມສະຫງົບ ແຂວງ ໄດ້ຈັດພິທີປະກາດໃຫ້ອະໄພຍະໂທດປ່ອຍຕົວນັກໂທດ ໃນໄລຍະປ້ອງກັນ, ສະກັດກັ້ນ ແລະ ຄວບຄຸມການແພ່ລະບາດພະຍາດໂຄວິດ-19 ໂດຍທ່ານ ພັອ ບັນດິດ ສີວິໄລ ຮອງກອງບັນຊາການປ້ອງກັນຄວາມສະຫງົບແຂວງ, ຫົວໜ້າຄ້າຍຄຸມຂັງ-ດັດສ້າງ,ພ້ອມດ້ວຍພະ ແນກການອ້ອມຂ້າງແຂວງ, ຜູ້ຕ້ອງຫາ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີໄດ້ຜ່ານດຳລັດຂອງປະທານປະເທດ ສປປ ລາວ ວ່າດ້ວຍການອະໄພຍະໂທດປ່ອຍຕົວນັກ ໂທດ ໃນໄລຍະປ້ອງກັນ,ສະກັດກັ້ນ ແລະ ຄວບຄຸມການແພ່ລະບາດຂອງພະຍາດໂຄວິດ-19, ສໍາລັບຢູ່ແຂວງອັດຕະປື ປະທານປະເທດອອກລັດຖະດໍາລັດປະຈຳປີ 2021 ຕົກລົງອະໄພຍະໂທດປ່ອຍຕົວນັກ ໂທດ 16 ຄົນ, ຍິງ 1 ຄົນ, ຜູ້ຕ້ອງຫາດັ່ງກ່າວກ່ຽວຂ້ອງຄະດີຄ້າຂາຍຢາເສບຕິດ.
ການອະໄພຍະໂທດປ່ອຍຕົວນັກໂທດ ເປັນການປະຕິບັດຕາມ ລັດຖະດຳລັດຂອງປະທານປະເທດ ສະບັບເລກທີ 212/ປປທ, ລົງວັນທີ 18 ຕຸລາ 2021 ທັງເປັນການປະຕິບັດນະໂຍບາຍມະນຸດສະທຳ ຂອງ ພັກ-ລັດ ເພື່ອສຶກສາອົບຮົມນັກໂທດ ໃຫ້ເຫັນໄດ້ແນວທາງນະໂຍບາຍອັນຖືກຕ້ອງ ແລະ ເປັນທຳຂອງພັກ-ລັດ, ເຮັດໃຫ້ນັກໂທດບຸກໜ້າບືນຕົວຝຶກຝົນຫລໍ່ຫລອມດັດສ້າງຕົນເອງ ໃຫ້ກາຍເປັນພົນລະເມືອງດີຂອງຊາດ, ຂອງສັງຄົມ ທັງເຮັດໃຫ້ສາກົນຮັບຮູ້ເຂົ້າໃຈຕໍ່ແນວທາງນະໂຍບາຍດ້ານມະນຸດສະທຳຂອງພັກ ແລະ ລັດ.
