ຜູ້ຈັດການທີມໃນພຣີເມຍລີກ ກັງວົນນັກເຕະບໍ່ສີດວັກຊີນອາດຖືກຫ້າມລົງສະຫນາມ ຫລັງໂຄວິດເລີ່ມລະບາດຫນັກອີກເທື່ອຄັ້ງຫນຶ່ງ

ບັນດາຜູ້ຈັດການທີມ ແລະ ຜູ້ບໍລິຫານໃນພຣີເມຍລີກ ມີຄວາມກັງວົນໃຈ ຢ້ານຖືກລົງໂທດຫ້າມລົງແຂ່ງຂັນ ນັກເຕະທີ່ຍັງບໍ່ສີດວັກຊີນ. ຫລັງສະຖານະການເລີ່ມກັບມາຫນ້າເປັນຫ່ວງ ແລະ ສະຖິຕິກ່ອນຫນ້ານີ້ ມີນັກເຕະທີ່ສີດຄົບ 2 ເຂັມ ພຽງ 68%.

ເດິະ ຊັນ ສື່ຊື່ດັງໃນປະເທດອັງກິດ ລາຍງານຂ່າວວ່າ : ບັນດາຜູ້ຈັດການທີມໃນເວທີພຣີເມຍລີກ ອັງກິດ ພວມກັງວົນວ່າ ລີກສູງສຸດແຫ່ງອັງກິດ ອາດມີການບັງຄັບໃຊ້ມາດຕະການປ້ອງກັນການຕິດເຊື້ອໂຄວິດ-19 ດ້ວຍການຫ້າມນັກເຕະທີ່ບໍ່ໄດ້ຮັບການສີດວັກຊີນລົງສະຫນາມ ຫລັງສະຖານະການການແພ່ລະບາດໃນອັງກິດເລີ່ມກັບມາຫນ້າເປັນຫ່ວງອີກເທື່ອຫນຶ່ງ.

ພາຍໃຕ້ສະຖານະການໃນເວລານີ້ ສົ່ງຜົນໃຫ້ລັດຖະບານອັງກິດປະກາດກຽມໃຊ້ມາດຕະການ ໂຄວິດ ແພລນ ບີ ເຊິ່ງເປັນແຜນ 2 ໃນການຮັບມືກັບການແພ່ລະບາດ ໂດຍຫນຶ່ງໃນມາດຕະການທີ່ກ່ຽວຂ້ອງກັບແວດວົງບານເຕະ ຄືການທີ່ແຟນບານຕ້ອງສະແດງຫລັກຖານການຮັບວັກຊີນ ຫລື ວັກຊີນ ພາສປອສ ກ່ອນເຂົ້າສະຫນາມຊົມເກມ ນອກຈາກນີ້ ຍັງມີຄວາມກັງວົນວ່າ ຫາກໂຕເລກຜູ້ຕິດເຊື້ອຍັງເພີ່ມສູງຂຶ້ນເລື້ອຍໆ ອາດນຳມາເຊ່ິງມາດຕະການປິດສະຫນາມແຂ່ງຂັນອີກເທື່ອຫນຶ່ງ ໃນໄລຍະຄຣິສມາສຕໍ່ເນື່ອງເຖິງປີໃຫມ່ນຳອີກ.

ຂະນະດຽວກັນສື່ດັ່ງກ່າວຍັງລະບຸອີກວ່າ : ບັນດາຜູ້ຈັດການທີມ ລວມເຖິງຜູ້ບໍລິຫານຂອງທີມໃນພຣີເມຍລີກ ພວກມກັງວົນອາດມີການນຳມາດຕະການການຫ້າມນັກເຕະທີ່ບໍ່ໄດ້ສີດວັກຊີນລົງສະຫນາມ ຫລັງຂໍ້ມູນທີ່ມີການເປີດເຜີຍຈາກລີກສູງສຸດອັງກິດ ເມື່ອໄລຍະເດືອນຕຸລາທີ່ຜ່ານມານັ້ນ ມີນັກເຕະໃນພຣີເມຍລີກ ທີ່ຮັບວັກຊີນຄົບ 2 ໂດສໄປແລ້ວພຽງ 68% ສ່ວນທີ່ສີດແລ້ວ ມີ 81% ແລະ ຍັງບໍ່ມີຄວາມແນ່ນອນວ່າ ໃນໄລຍະເວລາຜ່ານ ອັດຕາຂອງນັກເຕະທີ່ເຂົ້າຮັບວັກຊີນຈະເພີ່ມຂຶ້ນຂະຫນາດໃດ ເຖິງຫລາຍທີມຈະພະຍາຍາມກະຕຸ້ນນັກເຕະຂອງຕົນເອງໃຫ້ເຂົ້າຮັບການສີດວັກຊີນຢ່າງເຕັມທີ່ກໍຕາມ.