ຮອງລັດຖະມົນຕີກະຊວງການເງິນຕ້ອນຮັບຄະນະທີມງານຂອງ IMF ພື່ອແຈ້ງຈຸດປະສົງ ແລະ ແລກປ່ຽນຄວາມຄິດເຫັນຕໍ່ສະພາບລວມທັງທິດທາງເສດຖະກິດ-ການເງິນ
ວັນທີ 8 ທັນວາ 2021 ນີ້, ຄະນະທີມງານກອງທຶນການເງິນສາກົນ (IMF) ນໍາໂດຍທ່ານ ອະລາດເດຍ ສະກອດ ຫົວໜ້າຄະນະທີມງານກອງທຶນການເງິນສາກົນ (Alasdair Scott, Mission Chief), ພ້ອມດ້ວຍຄະນະທີ່ຈະໄດ້ເຄື່ອນໄຫວເຮັດວຽກທາງໄກ, ເພື່ອຕິດຕາມເສດຖະກິດມະຫາພາກຂອງສປປ ລາວ ປະຈໍາປີ 2021 ໃນມາດຕາ 4, ລະຫວ່າງວັນທີ 6-21 ທັນວາ 2021, ໄດ້ເຂົາພົບປະເຮັດວຽກກັບທ່ານ ປອ ບຸນເຫຼືອ ສິນໄຊວໍຣະວົງ ຮອງລັດຖະມົນຕີກະຊວງການເງິນ, ເພື່ອແຈ້ງຈຸດປະສົງ ແລະ ແລກປ່ຽນຄວາມຄິດເຫັນຕໍ່ສະພາບລວມທັງທິດທາງເສດຖະກິດ-ການເງິນຂອງ ສປປ ລາວ ຜ່ານລະບົບກອງປະຊຸມທາງໄກ.
ໃນການພົບປະກັບດັ່ງກ່າວ,ທ່ານ ປອ ບຸນເຫຼືອ ສິນໄຊວໍຣະວົງ ໄດ້ສະແດງຄວາມຍິນດີ ແລະ ຊົມເຊີຍທີ່ໄດ້ຮ່ວມພົບປະເຮັດວຽກກັບຄະນະທີມງານກອງທຶນການເງິນສາກົນ (Alasdair Scott, Mission Chief), ສະແດງຄວາມເຊື່ອໝັ້ນວ່າຄະນະທີມງານຂອງ IMF ຈະຮ່ວມເຮັດວຽກກັບພາກສ່ວນກ່ຽວຂ້ອງຂອງ ສປປ ລາວ, ກໍຄືກົມກ່ຽວຂ້ອງຂອງກະຊວງການເງິນໃນການເຮັດວຽກຕິດຕາມເສດຖະກິດມະຫາພາກຂອງ ສປປ ລາວ ໃນປີ 2021 ໃຫ້ມີໝາກຜົນ, ໂດຍສະເພາະການປະເມີນສິ່ງທ້າທ່າຍທີ່ອາດເປັນຄວາມສ່ຽງ, ທ່າແຮງໃນການພັດທະນາກໍຄືຂໍ້ແນະນໍາສໍາລັບອົງການກ່ຽວຂ້ອງຂອງ ສປປ ລາວ ເພື່ອນໍາມາຄົ້ນຄວ້າປັບປຸງໃນການດໍາເນີນມາດຕະການທີ່ເໝາະສົມ, ພ້ອມທັງລາຍງານຕໍ່ຄະນະທີມງານໃຫ້ຊາບສະພາບເສດຖະກິດມະຫາພາກດ້ານການເງິນ-ງົບປະມານ ຂອງ ສປປ ລາວ ໃນປີ 2021, ສະພາບການຈັດຕັ້ງປະຕິບັດງົບປະມານປີ 2021 ແລະ ແຜນງົບປະມານປີ 2022 ແລະ ມາດຕະການໃນການຈັດຕັ້ງປະຕິບັດ.
ພ້ອມດຽວກັນນີ້, ໄດ້ຕີລາຄາສູງຕໍ່ການຊ່ວຍເຫຼືອດ້ານວິຊາການຈາກອົງການ IMF, ຊຶ່ງໄດ້ປະກອບສ່ວນປັບປຸງສ້າງຂີດຄວາມສາມາດໃຫ້ແກ່ການຄຸ້ມຄອງການເງິນພາກລັດໃນຂົງເຂດທີ່ສໍາຄັນເຊັ່ນ: ການຮ່າງຍຸດທະສາດກາານເກັບລາຍຮັບ 2021-2025, ວຽກງານສາລະບານບັນຊີ-ງົບປະມານ (Charts of accounts) ແລະ ອື່ນໆ.
ພ້ອມນີ້, ກະຊວງການເງິນຍັງໄດ້ສົ່ງພະນັກງານເຂົ້າຮ່ວມໃນຊຸດຝຶບຮົມສໍາມະນາທີ່ຈັດໂດຍສູນຝຶກອົບຮົມໃນພາກພື້ນຂອງ IMF (CDOT) ໃນຫົວຂໍ້ຕ່າງໆທີ່ສໍາຄັນເຊັ່ນ: ການຄຸ້ມຄອງເສດຖະກິດມະຫາພາກ, ຂໍ້ມູນສະຖິຕິການເງິນ, ການວິໄຈດ້ານໜີ້ສິນ, ແລະ ການບໍລິຫານຄັງເງິນນໍາອີກດ້ວຍ.
