ສື່ຢືນຢັນ 6 ນັກເຕະສະເປີ ກັບເຈົ້າຫນ້າທີ່ທີມ 2 ຄົນ ຕິດໂຄວິດ

ສື່ກິລາບານເຕະຊື່ດັງ Football.London ໃນປະເທດອັງກິດ ລາຍງານວ່າ ທັອດແນມ ຮັອດສະເປີ ທີມດັງໃນການແຂ່ງຂັນພຣີເມຍລີກ ອັງກິດ ມີນັກເຕະໃນທີມທີ່ຜົນກວດເຊື້ອໂຄວິດ-19 ເປັນບວກ ທັງຫມົດ 6 ຄົນ, ລວມເຖິງເຈົ້າຫນ້າທີທີມອີກ 2 ຄົນ ຈາກການກວດເມື່ອວັນຈັນທີ່ຜ່ານມາ.

ກ່ອນຫນ້ານີ້ ມີຂ່າວວ່າ : ສະເປີ ພວມພົບກັບບັນຫາໃຫຍ່ເລື່ອງນັກເຕະ ແລະ ເຈົ້າຫນ້າທີ່ທີມຕິດເຊື້ອໂຄວິດຫລາຍຄົນ ກ່ອນທີ່ສື່ດັງຂອງອັງກິດຈະລາຍງານຜົນກວດເບື້ອງຕົ້ນວ່າ ຄົນທີ່ຕິດເຊື້ອໃນທີມສະເປີ ມີນັກເຕະ 6 ຄົນ ແລະ ເຈົ້າຫນ້າທີ່ທີມອີກ 2 ຄົນດັງກ່າວ ໂດຍທັງຫມົດຈະຕ້ອງເຂົ້າຮັບການກວດເຊື້ອແບບ PCR ອີກຄັ້ງຫນຶ່ງໃນວັນອັງຄານ ກ່ອນຈະມີການຕັດສິນໃຈວ່າຈະດຳເນີນການແນວໃດຕໍ່ໄປ.

ທັງນີ້ ຫາກນັກເຕະ ຫລື ເຈົ້າຫນ້າທີທີມ ສະເປີ ຄົນໃດມີຜົນກວດແບບ PCR ເປັນບວກ ຈະຕ້ອງກັກໂຕ 10 ວັນ ຕາມມາດຕະການຂອງລັດຖະບານອັງກດ ເຊິ່ງຫາກມີຜົນກວດເປັນບວກຫລາຍຄົນ ອາດສົ່ງຜົນກະທົບຕໍ່ເກມທີ່ ສະເປີ ຈະເປີດບ້ານຕ້ອນຮັບ ແຣນ ໃນເກມ ຢູຟາ ຢູໂຣປາ ຄອນເຟີເຣນ ລີກ ໃນວັນພະຫັດນີ້ ລວມເຖິງເກມລີກນັດໄປຢາມ ໄບຣຕັນ ທ້າຍອາທິດນີ້ນຳອີກ.