ກົມ ວສ-ປສ ທົດສອບປະສິດທິພາບເສື້ອເກາະກັນກະສຸນ

ໃນວັນທີ 3 ທັນວາ 2021, ຢູ່ທີ່ສະໝາມຍິງປືນສາກົນ 199 ກົມວິທະຍາສາດ-ປະຫວັດສາດ (ວສ-ປສ) ການທະຫານໄດ້ດຳເນີນການທົດສອບກວດກາປະສິດທິພາບຂອງເສື້ອເກາະກັນກະສຸນ A762, ໂດຍການເຂົ້າຮ່ວມຂອງສະຫາຍ ພົນຈັດຕະວາ ວຽງໄຊ ສົມວິຈິດ ປະທານສະພາວິທະຍາສາດຂັ້ນລາງຫົວໜ້າກົມວິທະຍາສາດປະຫວັດສາດ-ການທະຫານ, ມີຄະນະສະພາວິທະຍາສາດຂັ້ນລາງ, ມີກົມສູ້ຮົບ, ກົມກຳລັງພົນ, ກົມອົບຮົມພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ສະຫາຍພັນໂທ ສັນຕິ ຫຼ່ຽມ ຜີ ຮອງຫົວໜ້າພະແນກວິທະຍາ ສາດກົມວິທະຍາສາດ-ປະຫວັດສາດການທະຫານໄດ້ໃຫ້ຮູ້ວ່າ: ໂຄງການຄົ້ນຄວ້າເສື້ອເກາະກັນກະສຸນເເມ່ນໜຶ່ງໃນບັນດາໂຄງການຄົ້ນຄວ້າທີ່ກົມ ວສ-ປສ ການທະຫານໄດ້ມີການປະດິດສ້າງ ແລະ ໄດ້ຮັບອະນຸມັດຈາກກະຊວງປ້ອງກັນປະເທດຕາມຂໍ້ຕົກລົງ ເລກທີ 1256/ກປທ ລົງວັນທີ 26 ກຸມພາ 2020.

ຕະຫຼອດໄລຍະຫຼາຍເດືອນກົມ ວສ- -ປສ ການ ທະຫານແມ່ນໄດ້ດໍາເນີນການອອກແບບແລະທົດລອງຍິງກະສຸນແທ້ມາຫຼາຍຄັ້ງ, ໄດ້ທົດລອງຜະລິດແຜ່ນເກາະກັນກະສຸນອອກມາຫຼາຍປະເພດມີບາງປະເພດກໍມີປະສິດທິພາບຕາມເປົ້າໝາຍການຄິດໄລ່ໄວ້ແລະມີບາງປະເພດກໍບໍ່ໄດ້ຕາມເປົ້າໝາຍ. ດັ່ງນັ້ນເພື່ອເປັນການຮັບຮູ້ ແລະ ຢັ້ງຢືນທາງດ້ານປະສິດທິພາບຂອງເສື້ອເກາະກັນກະສຸນລຸ້ນ A762 ເຊິ່ງມີປະສິດທິພາບໃນການປ້ອງກັນກະສຸນອາວຸດປືນຂະໜາດ 7,62 ມມ ລົງມາ, ປືນ AKM, M 16 ແລະ ປືນສັ້ນເກືອບທຸກຊະນິດ.

ເສື້ອເກາະ A762 ມີຂະໜາດ 25×30 ຊັງຕີແມັດ, ມີນໍ້າໜັກ 5,37 ກິໂລກຣາມທີ່ເປັນເສື້ອເກາະໃນລຸ້ນດຽວກັບຂອງຕ່າງປະເທດຈະມີນໍ້າໜັກ7,5 ກິໂກຣາມຂຶ້ນໄປ.

ດັ່ງນັ້ນໃນມື້ນີ້ພວກເຮົາຈຶ່ງໄດ້ນໍາເອົາຜະລິດຕະພັນຈາກການຄົ້ນຄວ້າປະສິດທິພາບໃນ ການປ້ອງກັນອາວຸດປືນຮາບລຸ້ນ A762. ໃນນັ້ນ, ມີປືນ AKM, M16 ແລະ ປືນສັ້ນເກືອບທຸກຊະນິດ ສໍາລັບການທົດລອງຍິງແມ່ນໄດ້ນໍາໃຊ້ຫຸ່ນຍົນຕິດປືນAKM ເພື່ອຍິງເປົ້າໝາຍແທນຄົນຍິງໃນໄລຍະ 10 ແມັດ ເຊິ່ງເປັນໄລຍະຫ່າງທີ່ມີປະສິດທິພາບທີ່ສຸດ.

ທັງນີ້ກໍເພື່ອຮັບປະກັນໃນການກະກຽມມອບຜະລິດຕະພັນເສື້ອເກາະກັນກະສຸນໃຫ້ແກ່ກະຊວງປ້ອງກັນປະເທດເພື່ອນໍາໄປມອບໃຫ້ກົມວິຊາສະເພາະໄດ້ນໍາໃຊ້ເຂົ້າໃນວຽກງານຕົວຈິງຢ່າງມີປະສິດທິພາບ
ສູງ.

ຂ່າວ: ກອງທັບປະຊາຊົນລາວ