ໝາກກ້ວຍນ້ຳ ແລະ ໝາກກ້ວຍຫອມ ກິນອັນໃດໄດ້ປະໂຫຍດກ່ວາກັນ ?
December 11, 2021 - 5:00 PM
ໝາກກ້ວຍເປັນໝາກໄມ້ທີ່ມີປະໂຫຍດຕໍ່ສຸຂະພາບ, ແຕ່ໝາກກ້ວຍກໍມີຫລາຍສາຍພັນ ທັງກ້ວຍຫອມ, ກ້ວບນ້ຳ, ກ້ວຍໄຂ່, ກ້າວງ້າວ ແລະອື່ນໆ ເຄີຍສົງໄສບໍ່ວ່າໝາກກ້ວຍແຕ່ລະສາຍພັນນອກຈາກຮູບຮ່າງ, ກິ່ນ ແລະ ລົດຊາດຈະແຕກຕ່າງກັນແລ້ວ ສານອາຫານໃນໝາກກ້ວຍແຕ່ລະຊະນິດຈະແຕກຕ່າງກັນຫລືບໍ່ ?
ໝາກກ້ວຍ ບໍ່ວ່າຈະເປັນສາຍພັນໃດກໍຕາມ ຈະອຸດົມໄປດ້ວຍສານອາຫານທີ່ມີປະໂຫຍດຮ່ວມກັນຫລາຍກ່ວາ 22 ຊະນິດ ຈາກຂໍ້ມູນດ້ານໂພຊະນາການຂອງໝາກກ້ວຍ ພົບວ່າໝາກກ້ວຍແຕ່ລະຊະນິດເຕັມໄປດ້ວຍສານອາຫານທີ່ມີປະໂຫຍດຕໍ່ຮ່າງກາຍ, ມີຄຸນສົມບັດຫລັກຄືກັນ 5 ຊະນິດດ້ວຍກັນ ຄື :
- ກິນໝາກກ້ວຍແລ້ວມີຄວາມສຸກ : ເພາະໝາກກ້ວຍມີສານທຣິບໂຕເຟນ ເຊິ່ງເປັນສານຕັ້ງຕົ້ນໃນການຜະລິດຮໍໂມນເອັນດໍຟິນ ທີ່ຊ່ວຍໃຫ້ຮູ້ສຶກມີຄວາມສຸກ, ກິນໝາກກ້ວຍແລ້ວຈຶ່ງອາລົມດີ ຫາກກິນກ່ອນອອກກຳລັງກາຍຈະເຮັດໃຫ້ມີຄວາມສຸກກັບການອອກກຳລັງກາຍໄປນຳ.
- ເປັນອາຫານທີ່ໃຫ້ພະລັງງານເຕັມປ່ຽມ : ເພາະອຸດົມໄປດ້ວຍວິຕາມິນ B6 ແລະ B12, ວິຕາມິນ C, ທາດການຊຽມ, ໂປຕັສຊຽມ, ແມັກນີຊຽມ ແລະ ນ້ຳຕານ ໆລໆ ເພີ່ມພະລັງງານໃຫ້ຮ່າງກາຍໄດ້ຄົບຖ້ວນ.
- ຕໍ່ສູ້ກັບຄວາມເຄັ່ງຄຽດ ຊ່ວຍໃຫ້ຫລັບສະບາຍ : ເພາະໝາກກ້ວຍມີສານທຣິບໂຕເຟນ ນອກຈາກຈະກະຕຸ້ນໃຫ້ຮ່າງກາຍຜະລິດຮໍໂມນເອັນດໍຟິນແລ້ວ ຍັງປ່ຽນເຊໂຣໂທນິນ ເຊິ່ງເປັນສານທີ່ຊ່ວຍເຮັດໃຫ້ຮູ້ສຶກສະຫງົບ ແລະ ຜ່ອນຄາຍ ກິນໝາກກ້ວຍແລ້ວຈຶ່ງຊ່ວຍຜ່ອນຄາຍຄວາມເຄັ່ງຄຽດ, ກິນກ່ອນເຂົ້າແລງເຮັດໃຫ້ຫລັບສະບາຍ ແລະ ຕ້ານອາການຊຶມເສົ້າໄດ້.
- ຊ່ວຍຫລຸດຄວາມຕຸ້ຍ ແລະ ຊ່ວຍເລື່ອງຄວາມງາມ : ນອກຈາກຄຸນຄ່າທາງສານອາຫານແລ້ວ ໝາກກ້ວຍຍັງມີໄຟເບີຫລາຍ ກິນກ່ອນກິນເຂົ້າເຮັດໃຫ້ຮູ້ສຶກອີ່ມໄວ ສິ່ງສຳຄັນນ້ຳຕານໃນໝາກກ້ວຍຈະຖືກດູດຊຶມເຂົ້າສູ່ກະແສເລືອດງ່າຍ ເຮັດໃຫ້ຮ່າງກາຍມີພະລັງງານພຽງພໍ ຈຶ່ງຫລຸດຄວາມຢາກອາຫານໄດ້ ເຮັດໃຫ້ກິນເຂົ້າຕໍ່ຄາບຫລຸດປະລິມານລົງ ແລະ ຍັງມີເບຕ້າແຄໂຣທີນ, ວິຕາມິນ ແລະ ສານຕ້ານອະນຸມູນອິດສະລະຊ່ວຍຕ້ານຄວາມເຖົ້າ ເຮັດໃຫ້ຜິວສຸຂະພາບດີ ກ້ຽງງາມສົດໃສ.
- ມີສັບພະຄຸນສາມາດປ້ອງກັນ ແລະ ປິ່ນປົວພະຍາດໄດ້ຫລາຍຊະນິດ : ຫລັກໆຄື ໝາກກ້ວຍຍ່ອຍງ່າຍ, ໄຟເບີຫລາຍ ຈຶ່ງຊ່ວຍກະຕຸ້ນການຂັບຖ່າຍ ເຮັດໃຫ້ຫລຸດຄວາມສ່ຽງການເກີດພະຍາດມະເຮັງລຳໄສ້ ແລະ ໃນທາງການແພດຍັງໄດ້ຮັບການຢັ້ງຢືນວ່າເປັນໝາກໄມ້ຊະນິດດຽວທີ່ສາມາດປ້ອງກັນ ແລະ ຫລຸດຜ່ອນອາການເຈັບປ່ວຍຂອງພະຍາດຕ່າງໆໄດ້ບໍ່ຕ່ຳກ່ວາ 10 – 15 ພະຍາດ ທີ່ເຮັດໃຫ້ໝາກກ້ວຍແຕ່ລະສາຍພັນມີຄວາມໂດດເດັ່ນແຕກຕ່າງກັນໄປກໍຄື ປະລິມານສານອາຫານທີ່ມີບໍ່ເທົ່າກັນໃນໝາກກ້ວຍແຕ່ລະສາຍພັນ ແລະ ໝາກກ້ວຍທີ່ກິນແລ້ວມີປະໂຫຍດຕໍ່ຮ່າງກາຍຫລາຍທີ່ສຸດ ມີສານອາຫານສູງທີ່ສຸດ ຕ້ອງຍົກໃຫ້ໝາກກ້ວຍນ້ຳ.
- ຍ້ອນຫຍັງໝາກກ້ວຍນ້ຳຈຶ່ງມີປະໂຫຍດຫລາຍກ່ວາໝາກກ້ວຍຫອມ ? ຂໍ້ດີຂອງໝາກກ້ວຍຫອມນອກຈາກກິ່ນທີ່ຫອມເປັນຕາແຊບແລ້ວ ຂະໜາດຂອງໜ່ວຍໃຫຍ່ກິນແລ້ວອີ່ມໄວ ຍັງມີປະລິມານໂປຕັສຊຽມ ແລະ ແມັກນີຊຽມຫລາຍກ່ວາໝາກກ້ວຍຊະນິດອື່ນ ຈຶ່ງຊ່ວຍໃນການຫລຸດອາການຢາກນິໂກຕິນໃນຜູ້ທີ່ສູບຢາໄດ້. ດັ່ງນັ້ນ, ໃຜຢາກເຊົາສູບຢາຕ້ອງກິນໝາກກ້ວຍຫອມ, ແຕ່ລາຄາແພງກ່ວາ, ນ້ຳຕານຫລາຍກ່ວາ ເພາະຕ້ອງກິນຕອນສຸກແລ້ວ ກິນຕອນເຫີ່ມຈະເຮັດໃຫ້ຍື່ງທ້ອງ. ສ່ວນຄວາມພິເສດຂອງໝາກກ້ວຍນ້ຳທີ່ໝາກກ້ວຍຫອມໃຫ້ບໍ່ໄດ້ນັ້ນກໍຄື ໝາກກ້ວຍນ້ຳມີກົດອະມິໂນອາຈີນິນ ແລະ ຮີສຕາມີນ ເຊິ່ງເປັນສານອາຫານສຳຄັນທີ່ມີໃນນ້ຳນົມແມ່ ແລະ ຍັງມີສານອາຫານອື່ນໆທີ່ທຽບຄຽງນ້ຳນົມແມ່. ດັ່ງນັ້ນ, ຄົນສະໄໝເກົ່າຈຶ່ງນິຍົມບົດໝາກກ້ວຍນ້ຳໃຫ້ເດັກນ້ອຍກິນເມື່ອນ້ຳນົມແມ່ເລີ່ມໝົດ. ນອກຈາກນີ້, ໝາກກ້ວຍນ້ຳເຫີ່ມ 1 ໜ່ວຍ ມີນ້ຳຕານປະມານ 1 ບ່ວງຊາເທົ່ານັ້ນ ຈຶ່ງເໝາະສົມກັບຜູ້ທີ່ມີຄວາມຕ້ອງການຄວບຄຸມນ້ຳໜັກ ກິນໄດ້ໃນປະລິມານ 12 ໜ່ວຍຕໍ່ມື້ ເມື່ອປຽບທຽບຂະໜາດກັນກັບໝາກກ້ວຍຫອມ 1 ໜ່ວຍ ມີຂະໜາດໃຫຍ່ກ່ວາ ເຮັດໃຫ້ຫາກກິນຫລາຍເກີນໄປ ຮ່າງກາຍຈະຮັບນ້ຳຕານເກີນຄວາມຈຳເປັນ ເຮັດໃຫ້ນ້ຳໜັກເກີນໄດ້.
- ໝາກກ້ວຍນ້ຳຍັງມີທາດການຊຽມຫລາຍກ່ວາໝາກກ້ວຍຊະນິດອື່ນໆ ຍິ່ງເມື່ອຖືກຄວາມຮ້ອນ ປະລິມານທາດການຊຽມຈະເພີ່ມຂຶ້ນ 5 – 6 ເທົ່າ ເມື່ອເອົາໄປປີ້ງ ຫລື ຕົ້ມ. ສຳລັບແມ່ຍິງທີ່ເລີ່ມເຂົ້າສູ່ໄວໝົດປະຈຳເດືອນ ກິນໝາກກ້ວຍນ້ຳປີ້ງຈະຊ່ວຍເສີມໃຫ້ໄດ້ທາດການຊຽມໃນປະລິມານທີ່ພຽງພໍ, ຫລຸດຄວາມສ່ຽງການເກີດພະຍາດກະດູກຜ່ອຍໄດ້.
- ການກິນໝາກກ້ວຍນ້ຳຍັງຖືເປັນການລ້າງລຳໄສ້ ເພາະຊ່ວຍໃຫ້ຖ່າຍງ່າຍ ແລະ ກຳຈັດແບັກທີເຣຍທີ່ເກີດຈາກການກິນຊີ້ນສັດຫລາຍ ເຮັດໃຫ້ອາຈົມມີກິ່ນເໝັນ ເຊິ່ງນັກໂພຊະນາການແນະນຳວ່າຄວນກິນໝາກກ້ວຍນ້ຳ ຕອນເຊົ້າ 2 ໜ່ວຍ, ຕອນແລງ 2 ໜ່ວຍ, ກິນຕໍ່ເນື່ອງຈົນກ່ວາອາຈົມຈະບໍ່ມີກິ່ນເໝັນ ເຖິງຈະຖືວ່າລຳໄສ້ສະອາດ ຫລຸດຄວາມສ່ຽງການເປັນພະຍາດກະເພາະອາຫານ, ພະຍາດມະເຮັງລຳໄສ້ ແລະ ມະເຮັງຕັບ.
- ໃນພາກສ່ວນຂອງການຄວບຄຸມນ້ຳໜັກ ການກິນໝາກກ້ວຍເພື່ອຄວບຄຸມນ້ຳໜັກ ໝາກກ້ວຍນ້ຳຖືວ່າເປັນໝາກກ້ວຍທີ່ຕອບໂຈດ ແລະ ເໝາະສົມທີ່ສຸດ ແລະ ຄວນກິນໝາກກ້ວຍເຫີ່ມ ເພາະໝາກກ້ວຍທີ່ສຸກຫລາຍໆຈະມີປະລິມານນ້ຳຕານເພີ່ມຂຶ້ນເຖິງ 2 ເທົ່າ ເຮັດໃຫ້ຕຸ້ຍ ແລະ ຄວາມແຕກຕ່າງອີກປະການໜຶ່ງລະຫ່ວາງໝາກກ້ວຍນ້ຳກັບໝາກກ້ວຍຫອມກໍຄື ຊະນິດຂອງນ້ຳຕານໃນໝາກກ້ວຍ, ນ້ຳຕານໃນໝາກກ້ວຍນ້ຳເປັນນ້ຳຕານແບບດ່ຽວ ຄື ກຣູໂກສ ແລະ ຟຣຸກໂຕສ ເຊິ່ງເມື່ອກິນເຂົ້າໄປແລ້ວ ຮ່າງກາຍນຳໄປໃຊ້ໄດ້ທັນທີ ຈຶ່ງເຮັດໃຫ້ຮູ້ສຶກມີແຮງ, ກິນກ່ອນອອກກຳລັງກາຍກໍໄດ້ ຫລື ກິນກ່ອນກິນເຂົ້າ ຈະເຮັດໃຫ້ຄວາມຢາກອາຫານຫລຸດລົງ. ສ່ວນນ້ຳຕານໃນໝາກກ້ວຍຫອມ ເປັນນ້ຳຕານແບບຄູ່ ເກີດຈາກການຈັບຄູ່ຂອງນ້ຳຕານດ່ຽວ 2 ໂຕ ຈຶ່ງຕ້ອງຜ່ານການຍ່ອຍກ່ອນ ຮ່າງກາຍຈຶ່ງດູດຊຶມໄປໃຊ້ໄດ້. ສິ່ງສຳຄັນ ເພື່ອບໍ່ໃຫ້ເກີດບັນຫາຍື່ງທ້ອງ ໝາກກ້ວຍຫອມຕ້ອງກິນຕອນສຸກແລ້ວເທົ່ານັ້ນ ບວກກັບຂະໜາດທີ່ໃຫຍ່ກ່ວາ ເຮັດໃຫ້ຮ່າງກາຍໄດ້ຮັບປະລິມານນ້ຳຕານຫລາຍກ່ວາການກິນໝາກກ້ວຍນ້ຳ ຈາກທີ່ກິນໄດ້ 4 – 12 ໜ່ວຍໃນ 1 ມື້ ຫາກກິນໝາກກ້ວຍຫອມຈະໄດ້ປະມານມື້ລະ 1 – 2 ໜ່ວຍເທົ່ານັ້ນ.
