3 ຂໍ້ຄວນຮູ້ກ່ອນກິນອາຫານເສີມວິຕາມິນ C
December 11, 2021 - 10:00 AM
ມື້ນີ້ພວກເຮົາມີ 3 ຂໍ້ຄວນຮູ້ກ່ອນກິນອາຫານເສີມວິຕາມິນ C ເພື່ອໃຫ້ການກິນວິຕາມິນ C ຂອງເຮົາໄດ້ປະໂຫຍດສູງສຸກ ແລະ ກຸ້ມຄ່າ ມາແນະນຳບັນດາທ່ານ ດັ່ງນີ້ :
- ວິຕາມິນ 3 ຊະນິດ ກິນໃຫ້ພໍ ປົກປ້ອງຮ່າງກາຍຈາກເຊື້ອພະຍາດຕ່າງໆໄດ້ : ວິຕາມິນ C ຫລື Ascorbic Acid ເປັນສານອາຫານທີ່ຊ່ວຍຟື້ນຟູເນື້ອເຍື່ອ ເຮັດໃຫ້ຮ່າງກາຍຈະເລີນເຕີບໃຫຍ່ສົມໄວ, ມີພູມຕ້ານທານເພີ່ມຂຶ້ນ, ຫລຸດຜ່ອນອາການຫວັດ ເຖິງວ່າຈະເປັນກົດປະເພດໜຶ່ງທີ່ມີປະໂຫຍດຕໍ່ຮ່າງກາຍຫລາຍ ແລະ ຍັງມີຄວາມປອດໄພສູງ, ແຕ່ຫາກບໍ່ມີຄວາມຮູ້ຄວາມເຂົ້າໃຈຫລາຍພຽງພໍ ອາດເຮັດໃຫ້ເຮົາບໍ່ໄດ້ປະໂຫຍດຈາກວິຕາມິນ C ເທົ່າທີ່ຄວນຈະເປັນ.
- ກິນວິຕາມິນ C ຫລາຍເກີນໄປກໍໃຫ້ໂທດຕໍ່ຮ່າງກາຍ : ການກິນວິຕາມິນ C ຫລາຍໆ ຈົນເຖິງຫລາຍເກີນໄປ ບໍ່ໄດ້ຊ່ວຍເພີ່ມພູມຕ້ານທານໃຫ້ຫລາຍຂຶ້ນເລື້ອຍໆແຕ່ຢ່າງໃດ, ຫາກເຮົາກິນວິຕາມິນ C ຫລາຍເກີນກ່ວາທີ່ຮ່າງກາຍຕ້ອງການ ອາດເຮັດໃຫ້ເກີດຄວາມຜິດປົກກະຕິຕໍ່ຮ່າງກາຍ ເຊັ່ນ :
- ລະຄາຍເຄືອງກະເພາະອາຫານ ເພາະວິຕາມິນ C ທີ່ເຮົາກິນເຂົ້າໄປບໍ່ໄດ້ຖືກດູດຊຶມໄປໃຊ້ໄດ້ທັງໝົດ ເຊັ່ນ : ຫາກກິນວິຕາມິນ C 1.000 ມິນລີກຣາມ ອາດຈະດູດຊຶມໄປໃຊ້ໃນຮ່າງກາຍໄດ້ພຽງ 50% ເທົ່ານັ້ນ ວິຕາມິນ C ສ່ວນໜຶ່ງທີ່ຕົກຄ້າງອາດເຮັດໃຫ້ເຮົາເກີດອາການແສບກະເພາະອາຫານ, ຍື່ງທ້ອງ, ແໜ້ນທ້ອງ, ທ້ອງບິດ, ບໍ່ສະບາຍທ້ອງ ເປັນຕົ້ນ.
- ຮ່າງກາຍດູດຊຶມທາດເຫລັກຫລາຍເກີນໄປ ເຮັດໃຫ້ຮ່າງກາຍມີແຮ່ທາດເຫລັກຫລາຍເກີນໄປ ເຊິ່ງເຮັດໃຫ້ເກີດອາການປຸ້ນທ້ອງປວດຮາກ, ຮາກ, ວິນຫົວ ໄປຈົນເຖິງຜິວມີສີດຳເຂັ້ມ.
- ວິຕາມິນ C ສ່ວນເກີນຖືກໄລ່ອອກທາງນ້ຳຍ່ຽວ ເຊິ່ງອາດເຮັດໃຫ້ເກີດຕະກອນ ແລະ ອາດກາຍເປັນໜິ້ວໃນໝາກໄຂ່ຫລັງໄດ້ໃນອະນາຄົດ.
- ຄວນກິນວິຕາມິນ C ໃຫ້ເໝາະສົມທັງປະລິມານ ແລະ ໄລຍະເວລາທີ່ກິນ : ປົກກະຕິແລ້ວໃນເດັກຕ້ອງການວິຕາມິນ C ພຽງ 20 – 50 ມິນລີກຣາມຕໍ່ມື້, ແມ່ຍິງ 50-100 ມິນລີກຣາມ, ເຮົາສາມາດກິນວິຕາມິນ C ໃນແຕ່ລະມື້ໄດ້ຢ່າງພຽງພໍຜ່ານໝາກໄມ້ລົດຊາດສົ້ມ (ລວມເຖິງໝາກສີດາ ທີ່ເປັນໝາກໄມ້ທີ່ບໍ່ໄດ້ມີລົດຊາດສົ້ມ ແຕ່ມີວິຕາມິນ C ຫລາຍ), ວິຕາມິນ C ທີ່ຂາຍໃນຮູບແບບອາຫານເສີມໃນທ້ອງຕະຫລາດມັກມີປະລິມານ 200 – 1.000 ມິນລີກຣາມ ອາດບໍ່ໄດ້ຫລາຍເກີນໄປຈົນເປັນອັນຕະລາຍຕໍ່ຮ່າງກາຍ, ແຕ່ຮ່າງກາຍກໍບໍ່ໄດ້ມີຄວາມຈຳເປັນທີ່ຈະຕ້ອງຮັບວິຕາມິນ C ຫລາຍຂະໜາດນັ້ນ, ແຕ່ໃນ 1 ມື້ ບໍ່ຄວນກິນວິຕາມິນ C ເກີນ 3.000 ມິນລີກຣາມ. ຫາກຢາກກິນວິຕາມິນ C ເພື່ອເສີມສ້າງພູມຕ້ານທານຮ່າງກາຍ ລວມໄປເຖິງການເບິ່ງແຍງສຸຂະພາບຜິວເພື່ອຄວາມງາມ ບໍ່ຄວນກິນວິຕາມິນ C ເກີນ 1.000 – 2.000 ມິນລີກຣາມ, ເວລາທີ່ເໝາະສົມໃນການກິນວິຕາມິນ C ຈະເປັນໃນຕອນເຊົ້າ ຫລື ຕອນແລງກໍໄດ້ ແຕ່ແນະນຳໃຫ້ກິນພ້ອມ ຫລື ຫລັງອາຫານ ເພື່ອຫລຸດອາການປວດ ຫລື ແສບທ້ອງ, ແຕ່ຫາກຢາກກິນວິຕາມິນ C ເພື່ອຊ່ວຍໃຫ້ເຊົາຈາກໄຂ້ຫວັດໄວຂຶ້ນ ຄວນກິນວິຕາມິນ C ບໍ່ເກີນ 3.000 ມິນລີກຣາມຕໍ່ມື້ ເພື່ອໃຫ້ຮ່າງກາຍໄດ້ຮັບປະໂຫຍດຈາກວິຕາມິນ C ຊະນິດເມັດໄດ້ຢ່າງເຕັມທີ່ໆສຸດ ຮ່າງກາຍດູດຊຶມນຳໄປໃຊ້ໄດ້ເກືອບທັງໝົດ ແນະນຳໃຫ້ກິນວິຕາມິນ C ປະລິມານ 2.000 ມິນລີກຣາມ ໃນຕອນເຊົ້າ ແລະ ແລງ.
- ເກັບຮັກສາວິຕາມິນ C ຢ່າງຖືກຕ້ອງ : ການເກັບຮັກສາວິຕາມິນ C ຜິດວິທີ ອາດເຮັດໃຫ້ວິຕາມິນ C ເສື່ອມສະພາບ, ສູນເສຍຄວາມສາມາດຂອງມັນໄປໄດ້, ບໍ່ຄວນເກັບວິຕາມິນ C ໄວ້ໃນບ່ອນທີ່ມີແສງແດດກ້າ ແລະ ມີຄວາມຊຸ່ມ. ດັ່ງນັ້ນ, ແນະນຳໃຫ້ເກັບວິຕາມິນ C ໄວ້ໃນກ່ອງ ໂດຍສະເພາະກ່ອງປິດແຈບດີ ຫລື ກ່ອງສີນ້ຳຕານທີ່ກອງແສງໄດ້ ແລະ ບໍ່ຄວນເກັບໄວ້ໃນບ່ອນທີ່ມີອາກາດຮ້ອນໆ ເຊັ່ນ : ໃນລົດ, ໃນຫ້ອງຮ້ອນໆ ເປັນຕົ້ນ.
