ທາງລົດໄຟລາວ-ຈີນ: ຄວາມເຂັ້ມແຂງຂອງການສ້າງຄູ່ຮ່ວມຊະຕາກໍາລາວ-ຈີນ

ໂດຍ: ລຳເງິນ

ພາຍຫລັງຜ່ານຜ່າຄວາມຫຍຸ້ງຍາກນານາປະການມາເປັນເວລາ 5 ປີ, ທາງລົດໄຟລາວ-ຈີນທີ່ຍາວ 1.035 ກິໂລແມັດກໍ່ສຳເລັດການກໍ່ສ້າງ ແລະ ໄດ້ເປີດນຳໃຊ້ຢ່າງເປັນທາງການໃນວັນທີ 3 ທັນວານີ້ ເຊິ່ງຜົນສຳເລັດດັ່ງກ່າວ ເຮັດໃຫ້ປະເທດລາວເຮົາກ້າວສູ່ຍ່ານທາງການຂົນສົ່ງທາງລົດໄຟ. ສິ່ງທີ່ບໍ່ເວົ້າບໍ່ໄດ້ນັ້ນຄືນີ້ແມ່ນໂຄງການທີ່ເປັນສັນຍະລັກມິດຕະພາບລາວ-ຈີນໃນຂອບການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທັງຈະເຮັບປະກັນສ້າງຄວາມເຂັ້ມແຂງໃຫ້ແກ່ການສ້າງແລວເສດຖະກິດລາວ-ຈີນ ແລະ ການສ້າງຄູ່ຮ່ວມຊະຕາກຳລາວ-ຈີນໃຫ້ສຳເລັດໄວກວ່າເກົ່າ; ຂະນະດຽວກັນ, ໂຄງການນີ້ ໄດ້ຊ່ວຍໃຫ້ປະເທດເຮົາບັນ ລຸຄວາມຫວັງໃນການຫັນ “ປະເທດທີ່ບໍ່ມີທາງອອກສູ່ທະເລເປັນປະເທດ ເຊື່ອມໂຍງເຊື່ອມຈອດກັບພາກພື້ນ” ທັງຈະອຳນວຍຄວາມສະດວກໃຫ້ແກ່ການເດີນທາງຂອງປະຊາຊົນລາວບັນດາເຜົ່າທັງຈະຊ່ວຍຊຸກດັນການພັດທະນາການທ່ອງທ່ຽວ, ກະສິກຳ, ອຸດສາຫະກຳ ແລະ ອື່ນໆ.

ການສ້າງທາງລົດໄຟລາວ-ຈີນ ໄດ້ຮັບການຊີ້ນຳ ແລະ ຊຸກຍູ້ຢ່າງແຂງແຮງຈາກການນຳຂັ້ນສູງຂອງສອງປະເທດບົນພື້ນຖານການແລກປ່ຽນຄວາມຄິດເຫັນລະຫວ່າງຜູ້ນຳສູງສຸດຂອງສອງປະເທດ ແລະ ເນັ້ນ“ການເສີມຂະຫຍາຍບົດບາດການເປັນແບບຢ່າງຂອງໂຄງການທາງລົດໄຟ ແລະ ໂຄງການໃຫຍ່ອື່ນໆໃຫ້ຂະຫຍາຍກວ້າງອອກ”.ເມື່ອຢ້ອນຄືນຫລັງເປັນເວລາຫລາຍປີ, ການຂົນສົ່ງສິນຄ້າຈາກລາວໄປຈີນ ຫລື ຈາກຈີນມາລາວ ຢ່າງໜ້ອຍກໍ່ໝົດເວລາໄປແລ້ວ 20 ກວ່າມື້, ແຕ່ເມື່ອຫັນມາຂົນສົ່ງໂດຍລົດໄຟຈະໃຊ້ເວລາຫລຸດລົງຫລາຍເທົ່າ. ຈາກນີ້ຈຶ່ງເວົ້າໄດ້ວ່າ: ທາງລົດໄຟລາວ-ຈີນແມ່ນເສັ້ນທາງແຫ່ງການພັດທະນາ. ເພື່ອການຫັນ “ປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດກັບພາກພື້ນ” ບໍ່ພຽງແຕ່ແມ່ນຄວາມຝັນຂອງປະຊາຊົນລາວເທົ່ານັ້ນ,ຍັງໄດ້ກາຍເປັນເປົ້າໝາຍສຳຄັນຕໍ່ການພັດທະນາຊາດລາວນຳອີກ.

ການສ້າງສຳເລັດທາງລົດໄຟລາວ-ຈີນຄືກະແຈໜ່ວຍໃໝ່ ຄືສາຍພານທີ່ປະເທດລາວເຮົາສາມາດເຊື່ອມຕໍ່ກັບການສະໜອງຂອງໂລກ ເຊິ່ງຈະເຮັດໃຫ້ປະເທດເຮົາສາມາດສ້າງລາຍຮັບລວມເພີ່ມຂຶ້ນຢ່າງບໍ່ຕ້ອງສົງໄສ ທັງເປັນແຮງດຶງດູດນັກລົງທຶນເຂົ້າສູ່ປະເທດນັບມື້ຫຼາຍຂຶ້ນ ທັງສາມາດຫຼຸດຄ່າຂົນສົ່ງລະຫວ່າງນະຄອນຫຼວງວຽງຈັນ-ນະຄອນຄຸນໝິງແຂວງຢຸນໜານປະເທດຈີນ, ຂະນະທີ່ແຕ່ລະປີ, ການຄ້າຊາຍແດນຜ່ານປະເທດລາວຕາມແລວທາງລົດໄຟຈີນ-ລາວຈະບັນລຸຫລາຍລ້ານໂຕນ ທັງຊຸກຍູ້ໃຫ້ຂະແໜງການຕ່າງໆເຊື່ອມໂຍງເຂົ້າກັນແລະພັດທະນາໄວຂຶ້ນ ທັງສ້າງໂອກາດໃຫ້ປະຊາຊົນລາວລຽ-ທາງລົດໄຟມີອາຊີບເພີ່ມລາຍຮັບແລະພັດທະນາໃຫ້ຮັ່ງມີຂຶ້ນ ນຳໄປສູ່ການຫຼຸດພົ້ນອອກຈາກຄວາມທຸກຍາກໄວຂຶ້ນກວ່າເກົ່າ.

ຈາກນີ້ຈຶ່ງເວົ້າໄດ້ວ່າ:ທາງລົດໄຟຈີນ-ລາວແມ່ນເສັ້ນທາງສ້າງຄວາມຮັ່ງມີທີ່ແທ້ຈິງໃຫ້ແກ່ປະຊາຊົນລາວແລະຈະສ້າງຜົນປະໂຫຍດຢ່າງຕໍ່ເນື່ອງໃນອະນາຄົດ. ທີ່ສໍາຄັນການເດີນທາງແຕ່ນະຄອນຫຼວງວຽງຈັນ ຫາຊາຍແດນລາວ-ຈີນ ໃຊ້ເວລາພຽງ 4 ຊົ່ວໂມງເທົ່ານັ້ນທັງຈະເຮັດໃຫ້ປະຊາຊົນລາວເຮົາຢ່ວງຂາຈາກເຮືອນຂີ່ລົດໄຟໄປທ່ຽວແຂວງຕ່າງໆພາຍໃນປະເທດ ແລະ ໄປຕ່າງປະເທດ.

ທັງໝົດນີ້ຄືການມຸ່ງໜ້າສູ່ອະນາຄົດ ອະນາຄົນແຫ່ງຄວາມຈະເລີນຮຸ່ນເຮືອງຂອງປະເທດສາທາລະນະລັດ ປະຊາທິປະໄຕ ປະຊາຊົນລາວພວກເຮົາ ແລະ ຖືເປັນໂອກາດໃໝ່ ໂອກາດແຫ່ງການຮ່ວມມື ການພັດທະນາຂອງຫລາຍປະເທດໃນອາຊຽນຈາກປະໂຫຍດຂອງເສັ້ນທາງລົດໄຟລາວ-ຈີນ.