ໂອມິຄຣອນ ພົບແລ້ວ 40 ປະເທດ WHO ຢືນຢັນຍັງບໍ່ພົບຜູ້ເສຍຊີວິດ ຈາກໂຄວິດສາຍພັນນີ້

December 4, 2021 - 10:39 PM

ໂອມິຄຣອນ ພົບແລ້ວ 40 ປະເທດ WHO ຢືນຢັນຍັງບໍ່ພົບຜູ້ເສຍຊີວິດ ຈາກໂຄວິດສາຍພັນນີ້ - kitchen vibe - ໂອມິຄຣອນ ພົບແລ້ວ 40 ປະເທດ WHO ຢືນຢັນຍັງບໍ່ພົບຜູ້ເສຍຊີວິດ ຈາກໂຄວິດສາຍພັນນີ້

ອົງການອະນາໄມໂລກເຜີຍ ໄວຣັສໂຄວິດ-19 ສາຍພັນ ‘ໂອມິຄຣອນ’ ກະຈາຍໄປແລ້ວຢ່າງໜ້ອຍ 40 ປະເທດ, ແຕ່ຢືນຢັນຍັງບໍ່ມີລາຍງານຜູ້ເສຍຊີວິດຈາກການຕິດເຊື້ອໄວຣັສກາຍພັນສາຍພັນໃໝ່.

ວັນທີ 4 ທັນວາ 2021, ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ເປີດເຜີຍວ່າ: ມີການກວດພົບຜູ້ຕິດເຊື້ອໄວຣັສໂຄວິດ-19 ສາຍພັນໂອມິຄຣອນໃນຢ່າງໜ້ອຍ 40 ປະເທດທົ່ວໂລກແລ້ວ ເພີ່ມຂຶ້ນຈາກ 23 ປະເທດທີ່ມີການລາຍງານໃນວັນທີ 1 ທັນວາ, ແຕ່ຍັງບໍ່ໄດ້ຮັບລາຍງານຜູ້ເສຍຊີວິດຈາກການຕິດເຊື້ອໄວຣັສສາຍພັນນີ້.

ໂອມິຄຣອນ ພົບແລ້ວ 40 ປະເທດ WHO ຢືນຢັນຍັງບໍ່ພົບຜູ້ເສຍຊີວິດ ຈາກໂຄວິດສາຍພັນນີ້ - Visit Laos Visit SALANA BOUTIQUE HOTEL - ໂອມິຄຣອນ ພົບແລ້ວ 40 ປະເທດ WHO ຢືນຢັນຍັງບໍ່ພົບຜູ້ເສຍຊີວິດ ຈາກໂຄວິດສາຍພັນນີ້

ໂດຍອາເມລິກາ ແລະ ອົດສະຕຣາລີເປັນປະເທດຫລ້າສຸດທີ່ຢືນຢັນການຕິດເຊື້ອໂອມິຄຣອນພາຍໃນປະເທດ. ຂະນະດຽວກັນ ປະເທດອາຟຣິກາໃຕ້ກຳລັງຜະເຊີນກັບການແຜ່ລະບາດຂອງໄວຣັສາຍພັນໃໝ່ນີ້ຢ່າງໜັກໜ່ວງ ຈົນສົ່ງຜົນໃຫ້ມີຈຳນວນຜູ້ຕິດເຊື້ອສະສົມໃນປະເທດສູງເຖິງ 3 ລ້ານຄົນແລ້ວ.

ອົງການອະນາໄມໂລກຍັງເຕືອນອີກວ່າ: ອາດຕ້ອງໃຊ້ເວລາຫລາຍອາທິດໃນການພິຈາລະນາວ່າໄວຣັສກາຍພັນຊະນິດໃໝ່ນີ້ມີການແຜ່ເຊື້ອແນວໃດ ແລະ ເຮັດໃຫ້ເກີດອາການຮຸນແຮງຂຶ້ນ ຫລື ບໍ່ ລວມທັງເລື່ອງຂອງປະສິດທິພາບການປິ່ນປົວ ແລະ ການປ້ອງກັນເຊື້ອໂດຍວັກຊີນທີ່ມີໃຊ້ຢູ່ໃນປັດຈຸບັນ.

ເຖິງຢ່າງໃດກໍຕາມ, ຈາກການເປີດເຜີຍຂອງອົງການອະນາໄມໂລກ ຈົນຮອດຕອນນີ້ຍັງບໍ່ໄດ້ຮັບການລາຍງານວ່າພົບຜູ້ເສຍຊີວິດຈາກການຕິດເຊື້ອໄວຣັສສາຍພັນໂອມິຄຣອນ, ແຕ່ອັດຕາການແຜ່ລະບາດທີ່ເຫັນໄດ້ຕອນນີ້ ອາດເຮັດໃຫ້ຜູ້ຕິດເຊື້ອໂຄວິດ-19 ຫລາຍກວ່າເຄິ່ງຢູ່ເອີຣົບ ມີອາການປ່ວຍຈາກການຕິດເຊື້ອໂອມິຄຣອນ.

ເວັບໄຊຂ່າວຊີເອັນບີຊີໄດ້ລາຍງານໂດຍອ້າງຄຳເວົ້າຂອງ ດຣ. ໄມ ໄຣອັນ ຜູ້ອຳນວຍການໂຄງການສະຖານະການສຸກເສີນຂອງ WHO ວ່າມີຂໍ້ມູນເບື້ອງຕົ້ນທີ່ບົ່ງຊີ້ວ່າ: ໄວຣັສໂຄວິດ-19 ກາຍພັນ ສາຍພັນໂອມິຄຣອນ ອາດແຜ່ກະຈາຍເຊື້ອໄດ້ໄວກວ່າສາຍພັນເດວຕາທີ່ມີການລະບາດທົ່ວໂລກກ່ອນໜ້ານີ້.

“ເຫັນໄດ້ຊັດເຈນວ່າ: ໄວຣັສຊະນິດນີ້ມີຄວາມສາມາດໃນການແຜ່ກະຈາຍເຊື້ອໄດ້ຢ່າງມີປະສິດທິພາບ, ແຕ່ເຮົາເຄີຍເຫັນແບບນີ້ມາແລ້ວໃນສາຍພັນເດວຕາ. ດັ່ງນັ້ນ ຈຶ່ງບໍ່ມີຫຍັງໜ້າແປກໃຈ” ດຣ. ໄຣອັນ ກ່າວ.

ສ່ວນ ດຣ. ຊຸມຢາ ສວາມິນາທານ ຫົວໜ້ານັກວິທະຍາສາດຂອງ WHO ໄດ້ເປີດເຜີຍຕໍ່ກອງປະຊຸມ Reuters Next ໃນວັນທີ 3 ທັນວາວ່າ: ຍັງບໍ່ຈຳເປັນຈະຕ້ອງແຕກຕື່ນຕໍ່ການແຜ່ລະບາດຂອງໄວຣັສສາຍພັນໂອມິຄຣອນ ແລະ ໄວເກີນໄປທີ່ຈະບອກວ່າຕ້ອງມີການພັດທະນາວັກຊີນຊະນິດໃໝ່ຂຶ້ນມາເພື່ອຕໍ່ສູ້ກັບໄວຣັສສາຍພັນນີ້.

ທັງນີ້, WHO ໄດ້ຮັບລາຍງານເລື່ອງການຄົ້ນພົບໄວຣັສໂຄວິດ-19 ສາຍພັນໂອມິຄຣອນຄັ້ງທຳອິດຈາກປະເທດອາຟຣິກາໃຕ້ເມື່ອວັນທີ 24 ພະຈິກຜ່ານມາ ຫລັງຈາກນັ້ນກໍມີການປະກາດໃຫ້ໄວຣັສສາຍພັນດັ່ງກ່າວເປັນສາຍພັນທີ່ໜ້າກັງວົນ ແລະ ສ່ຽງສູງຫລາຍຕໍ່ການແຜ່ລະບາດໄປທົ່ວໂລກ.

ອ້າງອີງ:

https://www.cnbc.com/…/who-says-omicron-covid-variant…

https://www.aljazeera.com/…/new-york-becomes-fourth-us…

https://www.theguardian.com/…/who-says-no-deaths…