ຜູ້ບໍລິຫານ BioNTech ເຜີຍ ອາດຕ້ອງສັກວັກຊີນປ້ອງກັນໂຄວິດທຸກປີ ຫລັງໂອມິຄຣອນລະບາດ
ຜູ້ບໍລິຫານ BioNTech ເຜີຍ ການລະບາດຂອງໂອມິຄຣອນເຮັດໃຫ້ໂອກາດທີ່ຈະຕ້ອງສັກວັກຊີນປ້ອງກັນໂຄວິດ-19 ທຸກປີມີເພີ່ມຂຶ້ນ.
ສຳນັກຂ່າວຣອຍເຕີ (Reuters) ລາຍງານວ່າ: ທ່ານ ອູ ຊາຮິນ (Ugue Sahin) ຜູ້ບໍລິຫານ ແລະ ຜູ້ຮ່ວມສ້າງຕັ້ງບໍລິສັດ BioNTech ຂອງເຢຍລະມັນ ກ່າວໃນກອງປະຊຸມ Reuters Next ວ່າ: ການກາຍພັນຂອງເຊື້ອໄວຣັສເພີ່ມໂອກາດທີ່ທຸກຄົນຈະຕ້ອງສັກວັກຊີນປ້ອງກັນໂຄວິດ-19 ທຸກປີ ຄືກັບການສັກວັກຊີນໄຂ້ຫວັດໃຫຍ່.
ທ່ານ ຊາຮິນ ກ່າວອີກວ່າ: BioNTech ສາມາດປັບວັກຊີນປ້ອງກັນໂຄວິດ-19 ໄດ້ຢ່າງວ່ອງໄວ ເພື່ອຕອບສະໜອງຕໍ່ສາຍພັນໂອມິຄຣອນ ແລະ ສະຖານະການໃນອີກບໍ່ເທົ່າໃດອາທິດນີ້ຈະສະແດງໃຫ້ເຫັນວ່າຕ້ອງອັບເກຣດວັກຊີນຮີບດ່ວນເທົ່າໃດ.
ທ່ານ ຊາຮິນ ກ່າວວ່າ: ປະຊາຊົນຄວນສັກວັກຊີນທີ່ພັດທະນາໂດຍ Pfizer ຮ່ວມກັບ BioNTech ຕໍ່ໄປ ເນື່ອງຈາກມີຄວາມເປັນໄປໄດ້ວ່າຍັງສາມາດປ້ອງກັນອາການຮຸນແຮງໄດ້ຕໍ່ເນື່ອງ.
“ຂ້າພະເຈົ້າເຊື່ອໃນຫລັກການວ່າ: ໃນຊ່ວງເວລາໜຶ່ງເຮົາຕ້ອງມີວັກຊີນໃໝ່ເພື່ອຕ້ານສາຍພັນໃໝ່ນີ້. ຄຳຖາມກໍຄືວັກຊີນໃໝ່ນີ້ຕ້ອງເລັ່ງດ່ວນສໍ່າໃດ” ທ່ານ ຊາຮິນ ກ່າວ.
ຜູ້ບໍລິຫານ BioNTech ເນັ້ນວ່າ: ການພັດທະນາວັກຊີນໃໝ່ຄວນສຳເລັດພາຍໃນ 100 ວັນ ແລະ ກ່າວວ່າ: ປັດຈຸບັນການອອກແບບວັກຊີນໃໝ່ກຳລັງດຳເນີນຢູ່ ແລະ ຖ້າວັກຊີນເຂັມກະຕຸ້ນຍັງມີປະສິດທິພາບ 85-90% “ເຮົາຈະມີເວລາເພີ່ມຂຶ້ນໃນການປັບວັກຊີນ”.
ເຖິງຢ່າງໃດກໍດີ, ມີຄວາມກັງວົນວ່າ ວັກຊີນອາດມີປະສິດທິພາບຫລຸດລົງເມື່ອພົບສາຍພັນໂອມິຄຣອນ.
ແຕ່ທ່ານ ຊາຮິນ ຢືນຢັນແນວຄິດຂອງທ່ານ ໂດຍກ່າວກັບ Reuters ໃນວັນທີ 30 ພະຈິກວ່າ: ສາຍພັນໃໝ່ອາດເຮັດໃຫ້ຄົນທີ່ສັກວັກຊີນແລ້ວຕິດເຊື້ອ ແຕ່ຊ່ວຍປ້ອງກັນການເຂົ້າປິ່ນປົວຢູ່ໂຮງໝໍ.
“ເຮົາຄາດວ່າສາຍພັນໃໝ່ນີ້ຈະພັດທະນາເປັນສາຍພັນຫລົບຫລີກພູມຕ້ານທານ ເຊິ່ງໝາຍຄວາມວ່າສາຍພັນນີ້ເຮັດໃຫ້ຄົນທີ່ສັກວັກຊີນແລ້ວຕິດເຊື້ອໄດ້” ທ່ານ ຊາຮິນ ກ່າວ.
ທ່ານ ຊາຮິນ ກ່າວອີກວ່າ: “ເຮົາຄາດວ່າຜູ້ຕິດເຊື້ອທີ່ສັກວັກຊີນແລ້ວຍັງໄດ້ຮັບການປົກປ້ອງຈາກອາການຮຸນແຮງ” ແລະ “ໄວຣັສກາຍພັນສູງນີ້ມາໄວກວ່າຂ້າພະເຈົ້າຄາດການໄວ້, ຂ້າພະເຈົ້າຄາດວ່າມັນຈະມາປີໜ້າ ແຕ່ຕອນນີ້ມັນຢູ່ກັບພວກເຮົາແລ້ວ”.
