ວັນຊາດທີ 2 ທັນວາ: ເອົາຊີວິດເປັນເດີມພັນ ເພື່ອປົກປ້ອງຊັບພະຍາກອນ
ໃນບົດກ່າວ ສູນທອນພົດຂອງທ່ານ ທອງລຸນ ສີສຸລິດ ປະທານປະເທດແຫ່ງ ສປປລາວ ເນື່ອງໃນວັນຊາດທີ 2 ທັນວາ ຄົບຮອບ 46 ປີນັ້ນ ມີຕອນໜຶ່ງ ເພິ່ນໄດ້ ກ່າວວ່າ “ເຮົາຈະເອົາຊີວິດເຮົາ ເປັນເດີມພັນ ເພື່ອປົກປ້ອງຊັບພະຍາກອນອັນລໍ້າຄ່າຂອງຊາດໄວ້ໃຫ້ໄດ້ນຳໃຊ້ຍາວນານ…”.
ສູນທອນພົດທີ່ເຕັມໄປດ້ວຍເນື້ອໃນໜັກແໜ້ນ, ໃຫ້ແງ່ຄິດ, ປຸກລະດົມຈິດໃຈ ໃນຄວາມຄວາມຮັກເຊື້ອແພງແພງຊາດຂອງຕົນ ທ່ານປະເທານປະເທດກໍໄດ້ ໃຫ້ທັດສະນະ ເພື່ອຊີ້ນຳໃນການ ປະຕິບັດສອງໜ້າທີ່ຍຸດທະສາດ ຄືປົກປັກຮັກສາ ແລະ ສ້າງສາພັດທະນາປະເທດຊາດໃນຕໍ່ໜ້ານັ້ນ ໜຶ່ງໃນເຈັດຂໍ້ ກໍແມ່ນ ການປົກປ້ອງຊັບພະຍາກອນທຳມະຊາດຂອງ.
ທ່ານປະທານປະເທດກ່າວຕື່ມວ່າ “…ພວກເຮົາໂຊກດີ ທີ່ປະເທດເຮົາມີທີ່ຕັ້ງທີ່ປອດໄພ. ບັນພະບູລຸດເຮົາ ໄດ້ປະມໍລະດົກອັນລໍ້າຄ່າ ຢ່າງຫລວງຫລາຍ ເຊິ່ງຄວາມສວຍສົດງົດງາມ, ຄວາມອຸດົມຮັ່ງມີ ຂອງຊັບພະຍາກອນທຳມະຊາດ ໄວ້ໃຫ້ພວກເຮົາ ປົກປັກຮັກສາ ແລະນຳໃຊ້ ເພື່ອຊີວິດທີ່ດີ ແລະ ການພັດທະນາ ທີ່ຍືນຍົງ…”
ແຕ່ຍ້ອນການຕັດສິນໃຈທີ່ຜິດພາດ ຂາດບົດຮຽນບາງໄລຍະ ເຮັດໃຫ້ການນຳໃຊ້ຊັບພະຍາກອນທຳມະຊາດ ທີ່ອຸດົມສົມບູນຂອງພວກເຮົາບໍ່ມີລັກສະນະທີ່ຍືນຍົງ ແລະເກີດດອກອອກຜົນ, ບໍ່ສາມາດນຳເອົາຜົນປະໂຫຍດສູງສຸດ ຕໍ່ການພັດທະນາເສດຖະກິດ-ສັງຄົມ ກໍຄືລືບລ້າງຄວາມທຸກຍາກຂອງປະຊາຊົນເຮົາໄດ້ຢ່າງເຕັມສ່ວນ.
“ພວກເຮົາສາມາດຮຽນຮູ້ ຈາກພຶດຕະກຳຕົວຈິງ ໃນຂະບວນວິວັດແຫ່ງການພັດທະນາປະເທດເຮົາ ຜ່ານ 46 ປີ ຜ່ານມາ, ຮຽນຮູ້ທັງບົດຮຽນທີ່ດີ, ຕັ້ງໜ້າ, ແຕ່ເວລາດຽວກັນ ພວກເຮົາກໍ່ຮຽນຮູ້ຈາກຄວາມຜິດພາດ ແລະ ຂໍ້ບົກຜ່ອງ ໄດ້ເປັນຢ່າງດີແລ້ວ. ຂ້າພະເຈົ້າ ຢາກຂໍຝາກຂໍ້ຄິດໄວ້ກັບຄົນຮຸ່ນນີ້ ແລະ ຄົນ ຮຸ່ນຕໍ່ໆໄປວ່າ : ຮຽນໃຫ້ຮູ້ຈາກການນຳໃຊ້ຊັບພະຍາກອນທຳມະຊາດຢ່າງກຸ້ມຄ່ານັ້ນ, ຈະເຮັດແນວໃດ ຈຶ່ງສ້າງໄດ້ທັດສະນະຄະຕິ ທີ່ດີກວ່າ ເພື່ອປ້ອງກັນການສູນເສຍອັນໃຫຍ່ຫລວງ ຂອງຊັບພະຍາກອນຂອງພວກເຮົາໄປຢ່າງໜ້າເສຍດາຍ ທີ່ບໍ່ສາມາດເອົາຄືນມາໄດ້”
ຂ້າງເທິງນັ້ນ ເປັນຕອນໜຶ່ງທີ່ທ່ານປະທານປະເທດກ່າວ ເຊິ່ງສ່ອງແສງສະພາບຄວາມເປັນຈິງໃນການຂຸດຄົ້ນ ແລະນຳໃຊ້ຊັບພະຍາກອນພວກເຮົາໃນໄລຍະຜ່ານມາ ແລ້ວຕໍ່ໄປນີ້ ແນ່ນອນການສ້າງ ແລະປູກຝັງ ທັດສະນະຄະຕິທີ່ຖືກຕ້ອງ ສອດຄ່ອງ ແມ່ນມີຄວາມຈຳເປັນ ເພື່ອຮີບຮ້ອນປົກປັກຮັກສາຊັບພະຍາກອນ ອັນລໍ້າຄ່ານີ້ໄວ້ ຈົນກວ່າຈະຊ້າເກີນໄປ.
ເພາະສະນັ້ນ ເພິ່ນຈຶ່ງໄດ້ຟາກໃຫ້ຄົນພາຍໃນຊາດຄົ້ນຄິດ ແລະຮັບຮູ້ວ່າ “ເຮົາຈະເອົາຊີວິດເຮົາ ເປັນເດີມພັນ ເພື່ອປົກປ້ອງຊັບພະຍາກອນອັນລໍ້າຄ່າຂອງຊາດໄວ້ໃຫ້ໄດ້ນຳໃຊ້ຍາວນານ, ໄດ້ຜົນປະໂຫຍດ ແຕ່ບໍ່ທຳລາຍໃຫ້ເສຍຫາຍ, ພວກເຮົາຈະບໍ່ປ່ອຍໃຫ້ຄົນເອົາຊັບພະຍາກອນ ທີ່ອຸດົມຮັ່ງມີເຫລົ່ານີ້ໄປໃຊ້ໂດຍຂາດຄວາມຮັບຜິດຊອບ, ຂາດຈັນຍາທຳ, ຂາດຈັນຍາບັນ ເພື່ອທຳລາຍໄປ, ສູນຫາຍໄປຢ່າງໜ້າເສຍດາຍອີກຕໍ່ໄປໄດ້ແນວໃດ”.
“ຂໍໃຫ້ນໍາເອົາບັນຫານີ້ ເຂົ້າສູ່ການຄົ້ນຄວ້າສົນທະນາ ແລະ ນໍາໄປສູ່ການມີມາດຕະການທີ່ດີກວ່າ ເພື່ອສ້າງອະນາຄົດ ອັນດີງາມໃຫ້ປະເທດຊາດຂອງພວກເຮົາຍືນຍົງຕໍ່ໄປ ແລະ ພັດທະນາໄປຕາມແນວທາງນະໂຍບາຍຂອງພັກ ຄື: “ພັດທະນາທີ່ຍືນຍົງ ແລະ ສີຂຽວ””
ທິດຊີ້ນຳນີ້ ແມ່ນຖືກຕ້ອງ ແລະ ສອດຄ່ອງກັບນະໂຍບາຍຂອງລັດຖະບານ ໂດຍສະເພາະ ທິດທາງຂອງ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 ຮອດປີ 2025 ທີ່ເນັ້ນໜັກໃສ່ທິດ ສີຂຽວຍືນຍົງ, ທັງສອດຄ່ອງກັບ ຍຸດທະສາດການເຕີບໂຕສີຂຽວ, ເປົ້າໝາຍການການພັດທະນາທີ່ຍືນຍົງ (SDGs) ແລະນະໂຍບາຍອື່ນໆ.
ເພາະສະນັ້ນ ເຫຼືອພຽງແຕ່ພາກການຈັດຕັ້ງປະຕິບັດຕົວຈິງ, ຖ້າຫາກການຈັດຕັ້ງປະຕິບັດຕົວຈິງ ສວນທາງກັບ ທິດທາງ ທີ່ທ່ານປະທານປະເທດໄດ້ກ່າວນີ້, ທິດຂອງນະໂຍບາຍທີ່ພວກເຮົາຂຽນໄວ້ ແລະຮັບຮອງເອົາແລ້ວນັ້ນ ຄວາມເປັນຊາດ ທີ່ສາມາດດຳລົງຄົງຕົວ, ເຂັ້ມແຂງ ຮັ່ງມີຈະເກີດຂຶ້ນໄດ້ແນວໃດ. ອັນນີ້ແມ່ນພາລະໜ້າທີ່ຂອງພວກເຮົາ ທີ່ຈະຕ້ອງຕັດສິນໃຈຢ່າງເດັດຂາດ.
