ດ່ານພາສີສາກົນວັງເຕົ່າ ເກັບລາຍຮັບໄດ້ 531 ຕື້ກວ່າກີບ
ດ່ານພາສີສາກົນວັງເຕົ່າ ເມືອງໂພນທອງ ແຂວງຈໍາປາສັກ ທີ່ຂຶ້ນກັບພາສີປະຈໍາແຂວງຈໍາປາສັກ, ກໍ່ຄືກັນກັບດ່ານພາສີຊາຍແດນອື່ນໆໃນຂອບເຂດທົ່ວປະເທດ,ຊຶ່ງເຄື່ອນໄຫວຈັດຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານແຫ່ງລັດຕາມໜ້າທີ່ ແລະ ຂອບເຂດສິດ ທີ່ກໍານົດໄວ້ໃນກົດໝາຍວ່າດ້ວຍພາສີ ສະບັບເລກທີ 81/ສພຊ,ລົງວັນທີ 29 ມິຖຸນາ 2020.
ປັດຈຸບັນມີພະນັກງານ-ເຈົ້າໜ້າທີ່ພາສີທັງໝົດ 35 ຄົນ, ຍິງ 10 ຄົນ. ໂຄງປະກອບການຈັດຕັ້ງຂອງດ່ານພາສີສາກົນວັງເຕົ່າປະກອບມີ 3 ກຸ່ມວຽກໃຫຍ່ຄື: ກຸ່ມວຽກຄຸ້ມຄອງການແຈ້ງພາສີເປັນລາຍລະອຽດ; ກຸ່ມວຽກຄຸ້ມຄອງສາງ, ກວດກາສິນຄ້າ, ເຄື່ອງຂອງ ແລະ ເຂດປອດພາສີ ແລະ ກຸ່ມວຽກກວດກາພາຫະນະ ແລະ ຜູ້ໂດຍສານ.
ອີງຕາມການໃຫ້ສໍາພາດຂອງທ່ານ ປອ ພູຊ່ອງ ສົມຄິດ ຮອງຫົວໜ້າດ່ານພາສີສາກົນວັງເຕົ່າ ໃຫ້ຮູ້ວ່າ: ການປະຕິບັດແຜນການຈັດເກັບລາຍຮັບເຂົ້າງົບປະມານແຫ່ງລັດຂອງດ່ານພາສີສາກົນວັງເຕົ່າໃນ 10 ເດືອນສົກປີ 2021 ຢູໃນທ່າມກາງສະພາບແວດລ້ອມທີ່ມີຄວາມທ້າທາຍຫຼາຍບັນຫາ, ໃນສົກປີ 2021 ດ່ານພາສີສາກົນວັງເຕົ່າໄດ້ຮັບຕົວເລກແຜນຈັດເກັບລາຍຮັບ 738 ຕື້ກວ່າກີບຖືວ່າເປັນຕົວເລກທີສູງສົມຄວນ, ແຕ່ໃນຄະນະດຽວກັນການປະ ຕິບັດແຜນຫຼຸດຜ່ອນອັດຕາພາສີໃນຂອບເຂດອາຊຽນ-ຂອບເຂດຮວ່ມມືຕ່າງໆ, ການຍົກເວັ້ນ, ງົດເກັບ ແລະ ຫຼຸດຜ່ອນອັດຕາພາສີ ຕາມນະໂຍບາຍສົ່ງເສີມການລົງທຶນນັບມື້ເພີ່ມຂື້ນ ລວມໄປເຖີງກຳລັງໃນການຊື້-ຊົມໃຊ້ສີນຄ້າປະເພດ ນໍ້າມັນເຊື້ອໄຟ ແລະ ພາຫະນະ ມີທ່າອ່ຽງຫຼຸດລົງ.
ພ້ອມນີ້ບັນດາປະເທດຕ່າງໆໃນໂລກລວມທັງປະເທດລາວຂອງພວກເຮົາ ກໍາລັງປະເຊີນໜ້າກັບການແຜ່ລະ ບາດຂອງພະຍາດໂຄວິດ–19, ເຮັດໃຫ້ການຂົນສົ່ງສິນຄ້າຂາເຂົ້າ-ຂາອອກມີຄວາມຫຍຸ້ງຍາກ, ຊຶ່ງສົ່ງຜົນກະທົບຕໍ່ການຈັດເກັບລາຍຮັບຈາກການນໍາເຂົ້າສີນຄ້າ, ເຄື່ອງຂອງປະເພດຕ່າງໆ.
ໃນ 10 ເດືອນປີ 2021 ດ່ານພາສີສາກົນວັງເຕົ່າສາມາດເກັບລາຍຮັບໄດ້ທັງໝົດ 531 ຕື້ກ່ວາກີບ, ຖ້າທຽບໃສ່ແຜນການປີປະຕິບັດໄດ້ 71,94% ທຽບໃສ່ໄລຍະດຽວຂອງປີກ່ອນແມ່ນຫຼຸດລົງ 4,68% ແລະ ໃນ 2 ເດືອນທ້າຍປີ 2021 ດ່ານພາສີສາກົນວັງເຕົ່າຄາດຄະເນວ່າຈະຈັດເກັບລາຍຮັບໄດ້ປະມານ 118 ຕື້ກວ່າກີບເທົ່າກັບ 16,040% ຂອງແຜນການປີ. ຄາດຄະເນຈະເກັບລາຍຮັບເຂົ້າງົບປະມານແຫ່ງລັດໝົດປີ 2021ຈະເກັບໄດ້ປະມານ 650 ຕື້ກວ່າກີບເທົ່າກັບ 88% ຂອງແຜນການປີ.
ທ່ານ ປອ ພູຊ່ອງ ສົມຄິດ ກ່າວຕື່ມວ່າ: ດ່ານພາສີສາກົນວັງເຕົ່າໄດ້ນຳໃຊ້ລະບົບທີ່ທັນສະໄໝເຂົ້າໃນການແຈ້ງເສຍພາສີເປັນລາຍລະອຽດລະບົບ (ASYCUDA) ເພື່ອເຊື່ອມຕໍ່ກັບລະບົບແຈ້ງພາສີປະຕູດຽວແຫ່ງຊາດ, ມອບຄ່າພາສີ-ອາກອນ ແລະ ຄ່າທໍານຽມຕ່າງໆຜ່ານລະບົບທະນາຄານ (Smart Tax), ປັດຈຸບັນດ່ານພາສີສາກົນວັງເຕົ່າໄດ້ສໍາເລັດ, ຕິດຕັ້ງ ແລະ ໄດ້ນໍາໃຊ້ລະບົບຄຸ້ມຄອງພາຫະນະທ່ອງທ່ຽວຢ້ຽມຢາມ, ພາຫະນະຂົນສົ່ງສິນຄ້າ ແລະ ຕູ້ບັນທຸກສິນຄ້າ ( ຕູ້ຄອນເທັນເນີ້ ) ດ້ວຍລະບົບເອເລັກໂຕຼນິກແບບທັນສະໄໝ (ບ53 ) ຊຶ່ງເລີ່ມປະຕິບັດນໍາໃຊ້ມາແຕ່ວັນທີ 15 ຕຸລາ 2021 ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດຖືກຕ້ອງ, ຄົບຖ້ວນ ແລະ ທັນຕາມກໍານົດເວລາ ທີ່ກົດໝາຍກໍານົດໄວ້.
ສ່ວນມາດຕະການ-ທິດທາງແຜນການໃນ 2 ເດືອນທ້າຍປີ 2021 ຄະນະໜ່ວຍພັກ-ຄະນະນໍາດ່ານພາສີສາກົນວັງເຕົ່າພວກເຮົາຈະໄດ້ເອົາໃຈໃສ່ບາງບັນຫາເປັນຕົ້ນ: ເພີ່ມທະວີຄວາມເປັນເຈົ້າການໃນການນໍາພາ-ຊີ້ນໍາການຈັດຕັ້ງປະຕິບັດວຽກງານຮອບດ້ານດ້ວຍຄວາມຮັບຜິດຊອບສູງ; ແບ່ງຄວາມຮັບຜິດຊອບໃຫ້ແຕ່ລະສະຫາຍໃນຄະນະໜ່ວຍພັກ-ຄະນະນໍາດ່ານຕະຫຼອດຮອດພະນັກງານວິຊາການໃຫ້ແທດເໝາະກັບຄວາມຮູ້, ຄວາມສາມາດຂອງແຕ່ ລະຄົນ; ເອົາໃຈໃສ່ໃນການຈັດຕັ້ງປະຕິບັດວຽກງານວິຊາສະເພາະທີ່ຖືກມອບໝາຍໃຫ້ມີຜົນສໍາເລັດ ແລະ ເອົາໃຈ ໃສ່ຕິດຕາມ-ກວດກາສິນຄ້າສົ່ງເສີມການລົງທຶນ ໃຫ້ຖືກຕ້ອງຕາມການອະນຸຍາດຂອງຂະແໜງການທີ່ກ່ຽວຂ້ອງ; ສືບຕໍ່ເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດຕາມຄໍາສັ່ງຂອງທ່ານນາຍົກ ລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021, ສືບຕໍ່ປຸກລະດົມບັນດາຫົວໜ່ວຍທຸລະກິດໃຫ້ມາເຄື່ອນໄຫວນໍາເຂົ້າ-ສົ່ງອອກ ສິນຄ້າ, ເຄື່ອງຂອງ ຜ່ານດ່ານພາສີຊາຍແດນໃຫ້ນັບມື້ຫຼາຍຂຶ້ນບົນພື້ນຖານຖືກຕ້ອງຕາມລະບຽບກົດໝາຍຂອງພາສີ ແລະ ກົດໝາຍຂອງຂະແໜງການອື່ນທີ່ກ່ຽວຂ້ອງສອດຄ່ອງຕາມຄໍາສັ່ງຂອງນາຍົກ ລັດຖະມົນຕີ ສະບັບເລກທີ 12/ນຍ, ລົງວັນທີ 16/10/2019 ວ່າດ້ວຍການອໍານວຍຄວາມສະດວກແກ່ການນໍາເຂົ້າ-ສົ່ງອອກ ສິນຄ້າ, ເຄື່ອງຂອງ, ການຜ່ານແດນ ແລະ ການເຄື່ອນຍ້າຍສິນຄ້າຢູ່ ສປປລາວ, ເອົາໃຈໃສ່ຄຸ້ມຄອງ, ຊຸກຍູ້ສົ່ງເສີມ ແລະ ອໍານວຍຄວາມສະດວກຕໍ່ບັນດາຫົວໜ່ວຍທຸລະກິດໃນການນໍາເຂົ້າ-ສົ່ງອອກສິນຄ້າ, ເຄື່ອງຂອງ,ເພື່ອເປັນເງື່ອນໄຂໃນການມອບພັນທະເຂົ້າງົບປະມານຢູ່ດ່ານພາສີໃຫ້ເພີ່ມຂຶ້ນໂດຍສອດຄ່ອງຕາມຄໍາແນະນໍາ ແລະ ແຈ້ງການຂອງກະຊວງການເງິນສະບັບເລກທີ 4490; 4491, ລົງວັນທີ 14 ກັນຍາ 2021.
ທັງນີ້, ກໍເພື່ອເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດບັນລຸຕາມແຜນການທີ່ວາງໄວ້.ສ່ວນຕົວເລກແຜນການຈັດເກັບລາຍຮັບເຂົ້າງົບປະມານແຫ່ງລັດໃນປີ 2022 ຄາດຄະເນດ່ານພາສີສາກົນວັງເຕົ່າຈະໄດ້ຮັບຕົວເລກແຜນການປະມານ 760 ຕື້ກວ່າກີບ.
