WHO ເຕືອນທົ່ວໂລກອອກຄຳສັ່ງໂຈະ ການເດີນທາງສະກັດໂອມິຄຣອນແບບຫວ່ານແຫ ສ່ຽງເກີດການປົກປິດຂໍ້ມູນໃນອະນາຄົດ
ອົງການອະນາໄມໂລກ (WHO) ເຕືອນການໃຊ້ມາດຕະການຫ້າມເດີນທາງເຂົ້າປະເທດແບບຫວ່ານແຫເພື່ອສະກັດໂຄວິດ-19 ສາຍພັນໂອມິຄຣອນ ອາດເຮັດໃຫ້ເກີດການປົກປິດຂໍ້ມູນໄວຣັສກາຍພັນໃນອະນາຄົດ.
ວັນທີ 1 ທັນວາ 2021, ສຳນັກຂ່າວຕ່າງປະເທດລາຍງານວ່າ: ອົງການອະນາໄມໂລກ (WHO) ອອກຄຳເຕືອນວ່າ: ຄຳສັ່ງຫ້າມເດີນທາງເຂົ້າປະເທດສາດກະຈາຍແບບຫວ່ານແຫ (Blanket Travel Bans) ຈະບໍ່ຊ່ວຍປ້ອງກັນການແຜ່ລະບາດຂອງໂຄວິດ-19 ສາຍພັນໂອມິຄຣອນ ເຖິງວ່າຫລາຍປະເທດຈະປະກາດໃຊ້ມາດຕະການດັ່ງກ່າວແລ້ວກໍຕາມ.
ເຖິງວ່າ WHO ຈະຈັດໃຫ້ໄວຣັສໂອມິຄຣອນເປັນສາຍພັນທີ່ໜ້າກັງວົນ, ແຕ່ WHO ກໍເຕືອນວ່າ: ຄຳສັ່ງຫ້າມເດີນທາງແບບຫວ່ານແຫມີແຕ່ຈະສ້າງພາລະໜັກຕໍ່ການດຳລົງຊີວິດຂອງປະຊາຊົນ ອີກທັງຍັງເຮັດໃຫ້ປະເທດຕ່າງໆຂາດຄວາມກະຕືລືລົ້ນທີ່ຈະລາຍງານ ແລະ ເຜີຍແຜ່ຂໍ້ມູນດ້ານລະບາດວິທະຍາ ແລະ ລຳດັບທາງພັນທຸກຳຂອງໄວຣັສ.
ດຣ. ທີມໂດຣສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ WHO ກ່າວເຖິງການໃຊ້ມາດຕະການສາດກະຈາຍແບບຫວ່ານແຫ ແລະ ບໍ່ເໝາະສົມທີ່ບາງປະເທດກຳລັງເຮັດຢູ່ວ່າ: ບໍ່ໄດ້ຕັ້ງຢູ່ບົນຫລັກຖານສະໜັບສະໜູນ ຫລື ມີປະສິດທິພາບພຽງພໍ. ພ້ອມກັບຮຽກຮ້ອງປະເທດຕ່າງໆໃຊ້ມາດຕະການຫລຸດຄວາມສ່ຽງໂດຍຄຳນຶງເຖິງເຫດຜົນ ແລະ ຄວາມເໝາະສົມຕາມຂໍ້ກຳນົດຂອງກົດອະນາໄມລະຫວ່າງປະເທດ (IHR).
ຂະນະດຽວກັນ, ດຣ. ກີບຣີເຢຊຸສ ຍັງກ່າວຂອບໃຈບອດສວານາ ແລະ ອາຟຣິກາໃຕ້ທີ່ລາຍງານການກວດພົບສາຍພັນໂອມິຄຣອນຢ່າງວ່ອງໄວ ໃນລະຫວ່າງກອງປະຊຸມສະມັດຊາອະນາໄມໂລກກ່ຽວກັບສາຍພັນໂອມິຄຣອນໃນວັນທີ 30 ພະຈິກ. ພ້ອມສະແດງຄວາມກັງວົນທີ່ປະເທດເຫລົ່ານີ້ກຳລັງຖືກປະເທດອື່ນລົງໂທດ ເພາະເຮັດໃນສິ່ງທີ່ຖືກຕ້ອງ.
ສຳນັກຂ່າວຊິນຮົວລາຍງານວ່າ: WHO ໄດ້ຮັລາຍງານການກວດພົບໄວຣັສສາຍພັນໂອມິຄຣອນເປັນຄັ້ງທຳອິດໃນອາຟຣິກາໃຕ້ເມື່ອອາທິດຜ່ານມາ ໂດຍຮອດປັດຈຸບັນມີຫລາຍປະເທດ ແລະ ພາກພື້ນທີ່ຢືນຢັນວ່າ: ພົບຜູ້ຕິດເຊື້ອໂຄວິດ-19 ສາຍພັນໂອມິຄຣອນ ສົ່ງຜົນໃຫ້ປະເທດຕ່າງໆເລີ່ມໃຊ້ມາດຕະການຈຳກັດການເດີນທາງທີ່ເຂັ້ມງວດຍິ່ງຂຶ້ນ ລວມທັງການໂຈະຖ້ຽວບິນຈາກຫລາຍປະເທດໃນທະວີບອາຟຣິກາ.
“ມີການຄາດກະເຖິງທ່າອ່ຽງທີ່ວ່າ: ຈະມີຫລາຍປະເທດທີ່ກວດສອບໄວຣັສສາຍພັນໂອມິຄຣອນເພີ່ມຂຶ້ນ ເນື່ອງຈາກລັດຖະບານຂອງປະເທດຕ່າງໆເລີ່ມຍົກລະດັບການເຝົ້າລະວັງ ແລະ ການກວດຫາລຳດັບພັນທຸກຳຂອງໄວຣັສ” WHO ລະບຸໃນຄຳແນະນຳການເດີນທາງສະບັບແກ້ໄຂ. ພ້ອມກ່າວວ່າ: ໃນວັນທີ 28 ພະຈິກມີ 56 ປະເທດທີ່ໃຊ້ມາດຕະການຄວບຄຸມການເດີນທາງເພື່ອສະກັດບໍ່ໃຫ້ໄວຣັສໂອມິຄຣອນເຂົ້າມາລະບາດໃນປະເທດ.
ເຖິງຢ່າງໃດກໍຕາມ, WHO ແນະນຳໃຫ້ “ຜູ້ທີ່ຮູ້ສຶກບໍ່ສະບາຍ ຫລື ມີຄວາມສ່ຽງເປັນພະຍາດໂຄວິດ-19 ອາການຮຸນແຮງ ແລະ ກຳລັງຈະເສຍຊີວິດ ລວມທັງຜູ້ມີອາຍຸ 60 ປີຂຶ້ນໄປ ຫລື ຜູ້ມີພະຍາດປະຈຳຕົວເຊັ່ນ: ພະຍາດຫົວໃຈ, ພະຍາດມະເຮັງ ແລະ ພະຍາດເບົາຫວານ” ຄວນເລື່ອນແຜນການເດີນທາງອອກໄປກ່ອນ.
ອ້າງອີງ:
https://www.xinhuathai.com/high/246325_20211201
