ຢູເວນຕຸສ ກຽມຖືກປັບຕົກຊັ້ນ-ຍຶດແຊ໊ມ ຫລັງຖືກສອບສວນພົບການປອມແປງບັນຊີການເງິນ
ຢູເວນຕຸສ ສະໂມສອນໃຫຍ່ແຫ່ງເວທີ ກັລໂຊ ເຊເຣຍ ອາ ອິຕາລີ ມີທ່າອ່ຽງຖືກລົງໂທດຫນັກ ຕ້ອງຖືກຍຶດແຊ໊ມລີກ ແລະ ປັບໃຫ້ຕົກຊັ້ນໄປຫລິ້ນໃນ ເຊເຣຍ ບີ ຫາກພວກເຂົາເຮັດຜິດແທ້ໃນກໍລະນີທີ່ມີການປອມແປງບັນຊີການເງິນເພື່ອໃຊ້ສຳລັບຊື້ຂາຍນັກເຕະໃນລະຫວ່າງປີ 2019-2021.
ທີມດັງແຫ່ງເມືອງຕູຣິນ ຕົກເປັນຂ່າວ ຖືກກ່າວຫາວ່າຕົກແຕ່ງບັນຊີການຊື້ຂາຍນັກຕະ ເຊິ່ງເຈົ້າຫນ້າທີຕຳຫລວດໄດ້ເຂົ້າຄົ້ນຫລັກຖານ ແລະ ເອກະສານຂອງສະໂມສອນ ທັງຢູ່ ຕູຣິນ ແລະ ຢູ່ ມິລານ ເພື່ອນຳໄປກວດສວອບ ພ້ອມກັນນີ້ບັນດາຄົນທີ່ກ່ຽວຂ້ອງທັງ ອັນເດຮຍ ອັນເຢລລີ ປະທານສະໂມສອນ ແລະ ພາເວລ ເນດເວດ ຮອງປະທານ ກໍຖືກເຈົ້າຫນ້າທີ່ຕຳຫລວດສືບສວນ.
ໂດຍ ມາໂກ ດອນເຊລລີ ປະທານກຸ່ມ CODACONS ຫນ່ວຍງານທີ່ເຮັດຫນ້າທີ່ເບິ່ງແລງຄຸ້ມຄອງສິດຜູ້ບໍລິໂພກ ລະບຸວ່າ ພົບເອກະສານຫນ້າສົງໄສໃນສຳນັກງານໃຫຍ່ ຢູເວນຕຸສ ທີ່ກ່ຽວກັບເງິນຫລາຍລ້ານທີ່ໃຊ້ສຳລັບຊື້ຂາຍນັກເຕະ, ຕົວເລກກຳໄລທີ່ໄດ້ຈາກຕະຫລາດຊື້ຂາຍ ແລະ ຄ່າຕອບແທນຂອງເຫລົ່າໂຕແທນນັກກິລາໃນສັງກັດ.
” ຂໍ້ກ່າວຫາຮ້າຍແຮງຫລາຍ ຢູເວນຕຸສ ຜູກຂາດຄວາມສຳເລັດມາຫລາຍປີ ຫາກພວກເຂົາເຮັດຜິດກົດຫມາຍເພື່ອໃຫ້ໄດ້ປຽບສະໂມສອນຄູ່ແຂ່ງ ສະຫະພັນບານເຕະ ແລະ ເຈົ້າຫນ້າທີ່ກໍສົມຄວນຍື່ນມືລົງໄປຈັດການ ”
” ເພື່ອເປັນການປົກປ້ອງແຟນບານ ເຮົາສະເຫນີໃຫ້ໄອຍະການສັ່ງປັບພວກເຂົາຕົກລົງສູ່ ເຊເຣຍບີ ແລະ ຢູເວນຕຸສ ຈະຕ້ອງຖືກຍຶດຄືນແຊ໊ມລີກຄັ້ງຫລ້າສຸດຈາກການກະທຳຜິດ” ມາໂກ ດອນເຊລລີ ປະທານ Codacons ເປີດເຜີຍກັບສື່.
ສຳລັບຢູເວນຕຸສ ຖືເປັນມະຫາອຳນາດໃນວົງການບານເຕະອີຕາລີ ແນວໃດກໍຕາມ ພວກເຂົາເຄີຍຖືກຍຶດແຊ໊ມ 2 ສະໄຫມກ່ອນຫນ້ານີ້ (ປີ 2005 ແລະ 2006) ລວມເຖິງຖືກປັບຕົກຊັ້ນໄປຫລິ້ນໃນ ເຊເຣຍ ບີ ຈາກຄະດີ ກັລໂຊໂປລີ ທີ່ ລູຊາໂນ ມອດຈີ້ 1 ໃນຜູ້ບໍລິຫານຂອງທີມໃນຂະນະນັ້ນ ໃຊ້ອິດທິພົນທີ່ມີຕິດຕໍ່ກັບຜູ້ຕັດສິນ ແລະ ເຈົ້າໜ້າທີ່ທີ່ກ່ຽວຂ້ອງກັບການແຂ່ງຂັນ.
