ເຈັບເຕົ້ານົມສົ່ງສັນຍານອາການເຕົ້ານົມອັກເສບ

ຢູ່ດີໆກໍເຈັບເຕົ້ານົມ, ເບັງ, ຂັດໆ, ຄຳເບິ່ງພົບກ້ອນແຂງໆພາຍໃນເຕົ້ານົມ ສັນຍານແບບນີ້ພາໃຫ້ຕົກໃຈຄິດເຖິງພະຍາດມະເຮັງເຕົ້ານົມເປັນອັນດັບທຳອິດ ກ່ອນທີ່ຈະຮູ້ວ່າເປັນລັກສະນະອາການສ່ວນໜຶ່ງຂອງເຕົ້ານົມອັກເສບທີ່ມັກເກີດໃນແມ່ລູກອ່ອນ.

ສົ່ງສັນຍານອາການເຕົ້ານົມອັກເສບ :

– ອາການເຈັບເຕົ້ານົມມັກເກີດກັບແມ່ລູກອ່ອນ ເຊິ່ງເກີດຈາກການເບັງຂອງນຳ້ນົມຫລືນົມເບັງ.

– ເມື່ອລູກດູດນົມຈາກເຕົ້າຈະຮູ້ສຶກເຈັບ ແລະ ປວດບໍລິເວນເຕົ້ານົມ.

-. ເມື່ອໃຊ້ມືຄຳຈະພົບກ້ອນແຂງໆຢູ່ບໍລິເວນຈຸດໃດຈຸດໜຶ່ງຂອງເຕົ້ານົມ ເມື່ອບີບ ຫລື ກົດຈະຮູ້ສຶກເຈັບ ບາງຄົນອາດມີອາການເຕົ້ານົມບວມ ຫລື ແດງ ລັກສະນະແບບນີ້ເກີດຂຶ້ນຍ້ອນທໍ່ນຳ້ນົມອັດຕັນ.

– ອາການເຈັບເຕົ້ານົມອັກເສບມັກເກີດຂຶ້ນພຽງເບື້ອງດຽວ.

ສາເຫດຂອງການເກີດເຕົ້ານົມອັກເສບ :

– ລູກອາດຈະດູດນົມບໍ່ເກັ່ງ ຫລື ດູດບໍ່ເລື້ອຍ ເຮັດໃຫ້ນຳ້ນົມອອກບໍ່ໝົດ ແລະ ເກີດການຈັບໂຕເປັນກ້ອນຄ້າງຢູ່ພາຍໃນເຕົ້ານົມ.

– ນຳ້ນົມຫລາຍເກີນໄປ ລູກດູດບໍ່ໝົດ ຫລື ການໃຊ້ເຄື່ອງດູດນົມທີ່ຜິດວິທີເຮັດໃຫ້ນົມບໍ່ກ້ຽງເຕົ້າ ເກີດການຄ້າງຂອງນຳ້ນົມ.

– ການນຸ່ງເສື້ອຊ້ອນໃນທີ່ຄັບເກີນໄປ ຫລື ການນອນສະແຄງເບື້ອງໃດເບື້ອງໜຶ່ງດົນເກີນໄປຈົນ ເຮັດໃຫ້ແຮງກົດທັບເຕົ້ານົມ ກໍສົ່ງຜົນໃຫ້ເກີດອາການເຈັບເຕົ້ານົມ.

– ເຕົ້ານົມທີ່ເລີ່ມຢ່ອນຍານເຮັດໃຫ້ທາງລຸ່ມລະບາຍນຳ້ນົມອອກບໍ່ດີ ບໍ່ໝົດ ຍັງເຮັດໃຫ້ມີນຳ້ນົມຕົກຄ້າງຢູ່ໃນເຕົ້າ.

ວິທີປ້ອງກັນ ແລະ ຫລຸດຜ່ອນອາການເຕົ້ານົມອັກເສບ :

– ໃນກໍລະນີທີ່ແມ່ມີນຳ້ນົມຫລາຍຄວນໃຫ້ລູກດູດນົມ ຫລື ບີບນົມອອກທຸກໆ 2 – 3 ຊົ່ວໂມງ ເພື່ອລະບາຍນຳ້ນົມອອກ ບໍ່ໃຫ້ນົມເບັງ ແລະ ຊ່ວຍໃຫ້ນຳ້ນົມບໍ່ຄ້າງຢູ່ໃນເຕົ້າ.

– ເມື່ອມີອາການເຈັບເບັງເຕົ້ານົມໃຫ້ລູກຊ່ວຍດູດເບື້ອງທີ່ເຈັບ ໂດຍຈັດທ່າທາງໃຫ້ລູກດູດນົມ ຊ່ວຍດູດລະບາຍນຳ້ນົມອອກຈາກເຕົ້າໄດ້ດີຂຶ້ນ.

– ຂະນະທີ່ລູກດູດນົມໃຫ້ນວດເບົາໆບໍລິເວນກ້ອນໃນເຕົ້ານົມ ແລະ ຮີດໄລ່ລົງໄປຫາຫົວນົມເພື່ອຄາຍຈຸດທີ່ອັດຕັນເປັນກ້ອນອອກ.

– ປະຄົບເຕົ້ານົມທີ່ປວດດ້ວຍຜ້າອຸ່ນປະມານ 5 ນາທີ.

– ໃນກໍລະນີທີ່ເຈັບຫລາຍສາມາດກິນຢາຫລຸດອາການປວດປາຣາເຊຕາໂມນໄດ້.

– ຄວນຫລີກເວັ້ນການນຸ່ງເສື້ອຊ້ອນໃນທີ່ຄັບ ຫລື ຮັດແໜ້ນເກີນໄປ.

– ສຳລັບຄົນທີ່ມັກນອນສະແຄງ ໃຫ້ລອງສະຫລັບທ່ານອນໂດຍບໍ່ນອນແຄງດົນເກີນໄປ ເພື່ອຫລຸດການກົດທັບຂອງເຕົ້ານົມ.