ພົອ ວິໄລ ຫລ້າຄໍາຟອງ ຊີ້ນໍາ ຄະນະພັກ-ຄະນະບັນຊາ ໃນການແກ້ໄຂບັນຫາຢາເສບຕິດ ຕ້ອງເດັດຂາດ ໂປ່ງໃສ ແລະ ເປັນມືອາຊີບ

ວັນທີ 30 ພະຈິກ 2021 ນີ້, ທ່ານ ພົອ ວິໄລ ຫລ້າຄໍາຟອງ ລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຊີ້ນໍາ ຄະນະພັກ-ຄະນະບັນຊາແຕ່ລະຂັ້ນ ກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ ໄຂບັນຫາຢາເສບຕິດ ໃນໂອກາດນີ້, ພົອ ວິໄລ ຫລ້າຄໍາຟອງ ໄດ້ເນັ້ນໃຫ້ບັນດາຄະນະຮັບຜິດຊອບ ຕ້ອງຍົກສູງຄວາມຮັບຮູ້, ເຂົ້າໃຈ, ຄວາມເປັນເອກະພາບທາງດ້ານທັດ ສະນະ ແລະ ຄວາມຮັບຜິດຊອບໃນການນໍາພາ-ຊີ້ນໍາຂອງຄະນະພັກ-ຄະນະບັນຊາແຕ່ລະຂັ້ນຂອງກໍາລັງປ້ອງກັນຄວາມສະຫງົບ ໃນການປະຕິບັດວຽກງານຕົວຈິງ ເພື່ອກໍາແໜ້ນເນື້ອໃນສໍາຄັນທີ່ເປັນພື້ນຖານ ຮັບປະກັນໃຫ້ແກ່ການແກ້ໄຂບັນຫາຢາເສບຕິດ ດໍາເນີນໄປຢ່າງເປັນລະບົບ, ຕໍ່ເນື່ອງ, ປະຕິບັດຕາມຂັ້ນຕອນຂອງກົດໝາຍ, ເດັດຂາດ, ໂປ່ງໃສ, ເຂັ້ມງວດ, ເປັນມືອາຊີບ ແລະ ທັນເວລາ ເພື່ອແກ້ໄຂສາເຫດ ແລະ ເງື່ອນໄຂທີ່ພາໃຫ້ເກີດບັນຫາຢາເສບຕິດ ໃຫ້ຖືກກັບຈຸດພິເສດຂອງແຕ່ລະທ້ອງຖິ່ນ, ເສີມຂະຫຍາຍຜົນງານ, ຜົນສໍາເລັດທີ່ຍາດມາໄດ້ ພ້ອມກັນນັ້ນ ກໍ່ປັບປຸງແກ້ໄຂດ້ານອ່ອນ, ຂໍ້ຄົງຄ້າງໃນໄລຍະຜ່ານມາໃຫ້ດີຂຶ້ນ ເພື່ອພ້ອມກັນເຮັດສຳເລັດໜ້າທີ່ການເມືອງ ທີ່ພັກ-ລັດມອບໝາໃຫ້.

ພ້ອມກັນນີ້, ຕ້ອງກໍາແໜ້ນບັນດາມະຕິ, ຄໍາສັ່ງຂອງຂັ້ນເທິງ ເພື່ອນໍາໄປຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ມີປະສິດທິພາບ, ມີປະສິດທິຜົນ ໂດຍສະເພາະແມ່ນບັນດາວຽກຈຸດສຸມ ທີ່ຢູ່ໃນຄວາມຮັບຜິດຊອບຂອງຕົນ, ໃຫ້ມີຜົນສໍາເລັດຕາມຄາດໝາຍທີ່ວາງໄວ້. ນອກນີ້, ພົອ ວິໄລ ຫຼ້າຄໍາຟອງ ຍັງໄດ້ເນັ້ນຄະ ນະຮັບຜິດຊອບໃນການປ້ອງກັນເວນຍາມວັນສໍາຄັນຕ່າງໆຂອງພັກ, ຂອງຊາດ ເປັນຕົ້ນ: ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຫລື ວັນຊາດທີ 2 ທັນວາ ຄົບຮອບ 46 ປີ ແລະ ພິທີເປີດນໍາໃຊ້ເສັ້ນທາງລົດໄຟ ລາວ-ຈີນ ຢ່າງເປັນທາງການໃນວັນທີ 3 ທັນວານີ້ ໃຫ້ຮັບປະກັນຄວາມສະຫງົບ ແລະ ຄວາມປອດໄພຮ້ອຍສວນຮ້ອຍ.