2 ທັນວາ ມະຫາໄຊ

ວັນຊາດທີ 2 ທັນວາ ໄດ້ໝູນວຽນມາບັນຈົບຄົບຮອບອີກວາລະໜຶ່ງ. ປີນີ້ ສາທາລະນະລັດ ປະຊາທິປະໄຕ ປະຊາຊົນລາວ ມີອາຍຸຄົບຮອບ 46 ປີພໍດີ (2/12/1975 – 2/12/2021). ຕະຫລອດໄລຍະ 46 ປີແຫ່ງການປົກປັກຮັກສາ ແລະ ສ້າງສາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ, ສາທາລະນະລັດ ປະຊາທິປະໄຕ ປະຊາຊົນລາວ ໄດ້ເຕີບໃຫຍ່ຂະຫຍາຍຕົວຢ່າງຮອບດ້ານ, ປະເທດຊາດມີຄວາມຈະເລີນຮຸ່ງເຮືອງກ້າວໜ້າ ແລະ ນັບມື້ມີການພັດທະນາໄປຢ່າງບໍ່ຢຸດຢັ້ງ.

ຫາກພວກເຮົາພ້ອມກັນມາວາດພາບສະຫລຸບສັງລວມໂດຍສັງເຂບກໍເຫັນໄດ້ຢ່າງຈະແຈ້ງ ແລະ ຊັດເຈນວ່າ ການສ້າງສາພັດທະນາປະເທດຊາດໃນແຕ່ລະຂົງເຂດພວມກ້າວໄປຢ່າງກວ້າງຂວາງ, ໜັກແໜ້ນ ແລະ ເຂັ້ມແຂງ ເປັນຕົ້ນທາງດ້ານການເມືອງກໍນັບມື້ມີສະຖຽນລະພາບໜັກແໜ້ນ ແລະ ໝັ້ນຄົງ. ໃນປັດຈຸບັນ ລາວເຮົາມີສາຍພົວພັນການທູດກັບ 100 ກວ່າປະເທດ. ພິເສດໃນປີ 2021 ລາວຍັງໄດ້ຖືກຄັດເລືອກເປັນຮອງປະທານອົງການສະຫະປະຊາຊາດ. ດ້ານວຽກງານປ້ອງກັນຊາດ-ປ້ອງກັນຄວາມສະຫງົບກໍນັບມື້ມີຄວາມເຂັ້ມແຂງທັນສະໄໝ, ປະເທດຊາດມີຄວາມສະຫງົບສຸກຮົ່ມເຢັນ. ທາງດ້ານເສດຖະກິດກໍມີການຂະຫຍາຍຕົວຕໍ່ເນື່ອງ, ອັນທີ່ໂດດເດັ່ນທີ່ສຸດຄືການກໍ່ສ້າງພື້ນຖານໂຄງລ່າງ ເປັນຕົ້ນການກໍ່ສ້າງຖະໜົນຫົນທາງ, ຕຶກອາຄານສະຖານທີ່ ຕະຫລອດເຖິງພື້ນຖານບ້ານຊ່ອງຂອງປະຊາຊົນບັນດາເຜົ່າ ເຮັດໃຫ້ຄຸນນະພາບຊີວິດໃນແຕ່ລະທ້ອງຖິ່ນນັບມື້ດີຂຶ້ນເທື່ອລະກ້າວ. ຈາກຜົນສຳເລັດອັນຍິ່ງໃຫຍ່ມາຮອດປີນີ້ ລາວມີສາຍທາງດ່ວນວຽງຈັນ-ວັງວຽງ, ມີສາຍທາງລົດໄຟຄວາມໄວສູງ ລາວ-ຈີນ ແລະ ອັນພິເສດສຸດໆກໍຄືໃນປີ 2021 ນີ້ ລາວເຮົາໄດ້ຖືກອົງການສະຫະປະຊາຊາດລຶບຊື່ອອກຈາກປະເທດທີ່ທຸກຍາກ ແລະ ດ້ອຍພັດທະນາໄປແລ້ວ. ມາເບິ່ງທາງດ້ານສັງຄົມ-ວັດທະນະທຳກໍນັບມື້ມີຄວາມຈະເລີນຮຸ່ງເຮືອງໄປຕິກໆ. ຮີດຄອງປະເພນີ, ວິຖີຊີວິດວັດທະນະທຳອັນດີງາມຂອງປະຊາຊົນບັນດາເຜົ່າ ນັບທັງສະຖາປັດຕະຍະກຳອັນດີງາມຂອງຊາດກໍນັບມື້ໄດ້ຮັບການບູລະນະສົ່ງເສີມເປັນຢ່າງດີ. ມາຮອດປັດຈຸບັນ ລາວເຮົາໄດ້ມີ 4 ແຫລ່ງທີ່ໄດ້ກາຍເປັນມໍລະດົກຂອງໂລກເຊັ່ນ: ເມືອງຫລວງພະບາງ, ວັດພູຈຳປາສັກ, ໄຫຫີນ ຊຽງຂວາງ ແລະ ສຽງແຄນລາວ.

ນີ້ແມ່ນໝາກຜົນອັນລວມຍອດທີ່ໄດ້ຍົກເອົາມາໃຫ້ເຫັນໃນບາງຂົງເຂດວຽກງານ. ຖືໄດ້ວ່າຕະຫລອດ 46 ປີຜ່ານມາ ໝາກຜົນຊິ້ນໃຫຍ່ໆນີ້ມັນເປັນໄຊຊະນະອັນໃຫຍ່ຫລວງທີ່ບໍ່ເຄີຍມີມາໃນປະຫວັດສາດຍຸກຮ້ອຍປີພັນປີຜ່ານມາ. ອີກປະການໜຶ່ງໃນຜົນສຳເລັດອັນຍິ່ງໃຫຍ່ນີ້ ມັນບໍ່ໄດ້ມາແບບງ່າຍດາຍຄືປອກກ້ວຍ, ພວກເຮົາໄດ້ມາຈາກຂະບວນການຕໍ່ສູ້ຂອງວິລະກະສັດ, ຂອງຜູ້ນຳ ແລະ ນັກປະຕິວັດທີ່ຮັກຊາດຈາກລຸ້ນສູ່ລຸ້ນຂອງຊົນຊາດລາວ, ປະຊາຊົນລາວບັນດາເຜົ່າ, ພໍຕົກມາເຖິງຍຸກນີ້ ລາວເຮົາໄດ້ກ້າວສູ່ຍຸກໃໝ່ສີວິໄລ ເປັນໄຊຊະນະທີ່ຍິ່ງໃຫຍ່ມະຫາໄຊ. ວັນຊາດ 2 ທັນວາ ຈົ່ງໝັ້ນຍືນ !