ບໍລິຈາກເລືອດໄດ້ທັງບຸນໄດ້ທັງສຸຂະພາບດີ

ການບໍລິຈາກເລືອດນອກຈາກຈະໄດ້ບຸນແລ້ວ ຍັງໄດ້ປະໂຫຍດຕໍ່ສຸຂະພາບນຳ ໂດຍສະເພາະຊ່ວຍເຜົາຜານກາລໍຣີໄດ້.

1. ປ້ອງກັນພະຍາດຫົວໃຈ : ໂດຍທົ່ວໄປແລ້ວສາເຫດຂອງພະຍາດຫລອດເລືອດຫົວໃຈນັ້ນກໍມາຈາກເລືອດທີ່ມີຄວາມຂຸ້ນໜຽວຜິດປົກກະຕິ ໂດຍມີຜົນມາຈາກເລືອດມີລະດັບທາດເຫລັກສູງຈົນເກີນໄປ ຈົນໄປເກີດການອັອກຊິເດຊັນ ແລະ ທຳລາຍຫລອດເລືອດຕ່າງໆໃນຮ່າງກາຍ ແລະ ເຮັດໃຫ້ເກີດອາການຫົວໃຈວາຍໃນທີ່ສຸດ. ການບໍລິຈາກເລືອດຈະຊ່ວຍຫລຸດຄວາມສ່ຽງຫົວໃຈວາຍ ແລະ ພະຍາດຫລອດເລືອດຫົວໃຈໄດ້ ເຊິ່ງການບໍລິຈາກເລືອດຈະສາມາດຊ່ວຍຫລຸດລະດັບທາດເຫລັກໃນຮ່າງກາຍໃຫ້ຢູ່ໃນລະດັບທີ່ປົກກະຕິໄດ້.
2. ເຜົາຜານກາລໍຣີ : ການບໍລິຈາກເລືອດພຽງເທື່ອດຽວສາມາດເຜົາຜານກາລໍຣີໄດ້ຫລາຍເຖິງ 650 ກາລໍຣີ ເຊິ່ງເປັນຜົນດີກັບການຄວບຄຸມນຳ້ໜັກ. ແນວໃດກໍຕາມ, ຢ່າຄິດຈະບໍລິຈາກເລືອດເພື່ອຫວັງຫລຸດນຳ້ໜັກ ເພາະການບໍລິຈາກເລືອດແຕ່ລະເທື່ອຈະຕ້ອງໃຫ້ຫ່າງກັນ 2 – 3 ເດືອນ ເພາະຖ້າສຸຂະພາບບໍ່ແຂງແຮງກໍບໍ່ສາມາດບໍລິຈາກເລືອດໄດ້ອີກ.
3. ຫລຸດຄວາມສ່ຽງພະຍາດມະເຮັງ : ປົກກະຕິທາດເຫລັກໃນຮ່າງກາຍທີ່ສູງເກີນໄປນອກຈາກຈະສົ່ງຜົນໃຫ້ເກີດພະຍາດກ່ຽວກັບລະບົບຫລອດເລືອດຫົວໃຈໄດ້ແລ້ວ ກໍຍັງເຮັດໃຫ້ເກີດພະຍາດມະເຮັງໄດ້ນຳ ເພາະລະດັບທາດເຫລັກທີ່ສູງໃນຮ່າງກາຍຈະເຮັດໃຫ້ສານອະນຸມູນອິດສະລະເພີ່ມຫລາຍຂຶ້ນ ສົ່ງຜົນໃຫ້ແຊນໃນຮ່າງກາຍປ່ຽນສະພາບກາຍເປັນແຊນມະເຮັງໄດ້ ໂດຍການບໍລິຈາກເລືອດນັ້ນຈະຊ່ວຍຫລຸດປະລິມານທາດເຫລັກໃນເລືອດໃຫ້ຢູ່ໃນລະດັບທີ່ປົກກະຕິ ແລະ ເຮັດໃຫ້ຄວາມສ່ຽງຈາການເປັນພະຍາດມະເຮັງຫລຸດລົງໄດ້.