ລາວ-ກໍາປູເຈຍ ເຫັນພ້ອມສ້າງຄວາມໝັ້ນຄົງຍາວນານການເປັນຄູ່ຮ່ວມມືຍຸດທະສາດ
ໃນໂອກາດຢ້ຽມຢາມລາຊະອານາຈັກກຳປູເຈຍຂອງທ່ານນາຍົກລັດຖະມົນຕີ ພັນຄໍາ ວິພາວັນ ເປັນຄັ້ງທຳອິດພາຍຫລັງໄດ້ຮັບເລືອກຕັ້ງເປັນນາຍົກລັດຖະມົນຕີສປປລາວໃນລະຫ່ວາງວັນທີ 29-30 ພະຈິກນີ້ແລະ ໃນໂອກາດພົບປະກັບທ່ານນາຍົກລັດຖະມົນຕີສົມເດັດ ອັກຄະມະຫາເສນາບໍດີ ເຕໂຈ ຮູນແຊນໃນວັນີ 29 ພະຈິກ 2021, ສອງຝ່າຍ ເຫັນພ້ອມສືບຕໍ່ເພິ່ມທະວີຮັດແຫນ້ນການເປັນ ຄູ່ຮ່ວມຍຸດທະ ສາດຮອບ ດ້ານໝັ້ນຄົງຍາວນານ ເພື່ອເປັນບ່ອນອີງໃຫ້ແກ່ການການຮ່ວມມືລະຫ່ວາງຂະແຫນງການຕ່າງໆຂອງສອງຝ່າຍ ໃຫ້ເປັນຮູບປະທໍາບົນພື້ນຖານກົນໄກ ທີ່ທັງສອງຝ່າຍ ມີແລ້ວຄື: ການຮ່ວມມືສອງຝ່າຍ(JC), (JBC) ແລະ ອື່ນໆ ແລະບັນດາຂໍ້ຕົກລົງທີ່ການນໍາສອງປະເທດໄດ້ລົງນາມ ຮ່ວມກັນມາແລ້ວ ລວມທັງບັນຫາຊາຍແດນລະຫວ່າງ 2 ປະເທດ. ຂະນະດຽວກັນ, ສອງຝ່າຍ ໄດ້ສະເໜີໃຫ້ປຶກສາຫາລືກັນກ່ຽວກັບການຟື້ນຟູເສດຖະກິດ ຫຼັງການແພ່ລະ ບາດ ຂອງພະຍາດໂຄວິດ-19 ໂດຍສະເພາະການຟື້ນຟູການທ່ອງທ່ຽວ.
ໃນໂອກາດນີ້ ທ່ານນາຍົກລັດຖະມົນຕີ ພັນຄໍາ ວິພາວັນ, ໄດ້ກ່າວສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບຢ່າງອົບອຸ່ນ ຂອງທ່ານສົມເດັດ ເຕ ໂຈ ຮຸນ ແຊນ ກໍຄື ລັດຖະບານ ແລະ ປະຊາຊົນ ກໍາປູເຈຍ ໄດ້ຊ່ວຍເຫຼືອສປປ ລາວ ຫລາຍດ້ານຕະຫລອດມາໂດຍສະເພາະການຕ້ານ ແລະ ສະກັດກັ້ນການແພ່ລະບາດຂອງພະຍາດໂຄວິດ-19 ໃນໄລຍະຜ່ານມາ ແລະ ໄດ້ຖືໂອກາດນີ້ເຊື້ອເຊີນ ສົມ ເດັດ ອັກຄະມະຫາ ເສນາບໍດີ ເຕໂຈ ຮຸນ ແຊນ, ພ້ອມດ້ວຍພັນລະຍາ ໄປຢ້ຽມຢາມ ສປປ ລາວ ໃນເວລາທີ່ເໝາະສົມ.
ໃນປີ 2019, ການພົວພັນຮ່ວມມືຂອງສອງປະເທດ ໄດ້ມີບັນຍາກາດໃໝ່ ເຖິງວ່າສະ ພາບການສາກົນ ແລະ ພາກພື້ນຍັງສືບຕໍ່ສັບສົນ, ບວກກັບການແພ່ລະບາດຂອງພະຍາດໂຄວິດ-19 , ແຕ່ການພົວພັນຍັງສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະ ເຂົ້າສູ່ລວງເລິກໃນທຸກຂົງເຂດ ຊຶ່ງສະແດງອອກ ຄື: ຜູ້ນໍາສອງປະເທດ ລາວ-ກໍາປູເຈຍ ໄດ້ມີການພົບປະກັນຢ່າງເປັນປົກ ກະຕິທັງໃນໂອກາດເຂົ້າຮ່ວມກອງປະຊຸມສາກົນຕ່າງໆ ແລະ ພົບປະສອງຝ່າຍ ໃນຮູບແບບທາງໄກ. ການພົວພັນຮ່ວມມືຂອງສອງປະເທດໃນດ້ານຕ່າງໆໄດ້ຮັບການເສີມຂະຫຍາຍ ເປັນຕົ້ນການຮ່ວມມືດ້ານການເມືອງຢູ່ໃນລະດັບດີ, ການຮ່ວມມືດ້ານປ້ອງກັນຊາດ-ປ້ອງການຄວາມສະຫງົບ ແລະ ການຕ້ານຢາເສບຕິດ ມີຄວາມໃກ້ຊິດ ແລະ ໄດ້ຮັບຄວາມເອົາໃຈໃສ່ຈາກການນໍາທັງສອງປະເທດ. ການຮ່ວມມືດ້ານການລົງທຶນ, ເສດຖະກິດ, ການຄ້າ, ວັດທະນະທໍາ-ສັງຄົມ, ສຶກສາ ແລະ ການຮ່ວມມືຂັ້ນທ້ອງຖິ່ນ ກໍຂະຫຍາຍຕົວເປັນກ້າວໆ ໂດຍສອງຝ່າຍສະແດງຄວາມຍິນດີທີ່ເຫັນວ່າ ການຄ້າການລົງທຶນ ມີທ່າຂະຫຍາຍຕົວດີຂຶ້ນ, ການລົງທຶນຂອງກໍາປູເຈຍຢູ່ລາວ ແລະ ຂອງນັກລົງທຶນລາວ ຢູ່ ກໍາປູເຈຍ ກໍນັບມື້ເພີ່ມຂຶ້ນ, ພ້ອມທັງຢືນຢັນຈະຮ່ວມກັນສືບຕໍ່ສ້າງເງື່ອນໄຂສະດວກໃຫ້ແກ່ການສົ່ງເສີມການຮ່ວມມືດ້ານເສດຖະກິດ, ການຄ້າຂອງສອງຝ່າຍໃຫ້ນັບມື້ນັບຫຼາຍຂຶ້ນ. ພິເສດແມ່ນເສີມຂະຫຍາຍການຮ່ວມມືດ້ານພະລັງງານທີ່ລາວມີທ່າແຮງຜະລິດ ແລະ ສົ່ງອອກ ຊຶ່ງກໍາປູເຈຍ ມີຄວາມຕ້ອງການສູງ. ນອກນີ້,ສອງຝ່າຍ ຍັງໄດ້ແຈ້ງສະພາບການພັດທະນາເສດຖະກິດ-ສັງຄົມ ແລະ ການສະກັດກັ້ນການແພ່ລະບາດຂອງພະຍາດໂຄວິດ-19 ໃຫ້ກັນຊາບທັງໄດ້ສະເໜີໃຫ້ມີການປຶກສາຫາລືການຟື້ນຟູເສດຖະກິດ ຫຼັງການແພ່ລະບາດ ຂອງພະຍາດໂຄວິດ-19 ໂດຍສະເພາະການຟື້ນຟູການທ່ອງທ່ຽວ.
ໃນໂອກາດການຢ້ຽມຢາມຄັ້ງນີ້, ລັດຖະບານ ແລະ ປະຊາຊົນ ກໍາປູເຈຍ ໄດ້ມອບເງິນສົດ 3.000.000 ໂດລາສະຫະລັດ, ວັກຊີນ 500.000 ໂດສ໌ ແລະ ລົດຂົນສົ່ງ ວັກຊີນອີກ 2 ຄັນ ເພື່ອຊ່ວຍ ສປປ ລາວ ຕ້ານໂຄວິດ-19. ຂະນະທີ່ຫຼາຍບໍລິສັດຂອງກໍາປູເຈຍ ໄດ້ມອບເງິນສົມທົບເພີ່ມອີກ 10.000.000 ໂດລາສະຫະລັດ ລວມເປັນເງິນທັງໝົດ 13.000.000 ໂດລາສະຫະລັດ.
