ທ່ານ ສີຈິ້ນຜິງ ປະກາດມອບວັກຊີນ ໃຫ້ອາຟຣິກາເພີ່ມອີກ 1 ພັນລ້ານໂດສ

ຈີນກຽມສົ່ງມອບວັກຊີນພັນລ້ານໂດສ ຊ່ວຍອາຟຣິກາຮັບມືເຊື້ອໂອມິຄຣອນ.

ວັນທີ 29 ພະຈິກ 2021, ສຳນັກຂ່າວຣອຍເຕີ (Reuters) ລາຍງານຄຳກ່າວຂອງປະທານປະເທດ ສີຈິ້ນຜິງ ທີ່ອອກມາໃຫ້ຄຳໝັ້ນສັນຍາວ່າ: ຈີນຈະມອບວັກຊີນໃຫ້ປະເທດໃນທະວີບອາຟຣິກາອີກ 1 ພັນລ້ານໂດສ ແລະ ຈະກະຕຸ້ນໃຫ້ບໍລິສັດສັນຊາດຈີນລົງທຶນເພີ່ມໃນອາຟຣິກາຢ່າງໜ້ອຍ 1 ໝື່ນລ້ານໂດລາສະຫະລັດ ພາຍໃນໄລຍະເວລາ 3 ປີຕໍ່ໜ້າ.

ການປະກາດຄັ້ງນີ້ເກີດຂຶ້ນຂະນະທີ່ທົ່ວໂລກກຳລັງກັງວົນເຖິງສະຖານະການການລະບາດຂອງເຊື້ອກາຍພັນ ສາຍພັນໂອມິຄຣອນ ທີ່ກວດພົບຄັ້ງທຳອິດໃນອາຟຣິກາຕອນໃຕ້.

ໃນ 1 ພັນລ້ານໂດສ ຈະແບ່ງເປັນການບໍລິຈາກ 600 ລ້ານໂດສ ແລະ ການຮ່ວມມືກັນຜະລິດອີກ 400 ລ້ານໂດສ ແລະ ການສົ່ງມອບວັກຊີນເພີ່ມຄັ້ງນີ້ ຈະບໍ່ໄດ້ນັບລວມກັບອີກເກືອບ 200 ລ້ານໂດສ ທີ່ຈີນສົ່ງມອບໃຫ້ປະເທດຕ່າງໆໃນທະວີບອາຟຣິກາໄປແລ້ວ.

ປະທານປະເທດ ສີຈິ້ນຜິງ ເປີດເຜີຍເລື່ອງດັ່ງກ່າວຜ່ານການສຳມະນາດ້ານການຮ່ວມມືລະຫວ່າງຈີນກັບອາຟຣິກາ ໂດຍຜູ້ນຳຈີນກ່າວອີກວ່າ: ທັງ 2 ຝ່າຍຈະເພີ່ມການຮ່ວມມືກັນ ທັງໃນດ້ານສາທາລະນະສຸກ, ນະວັດຕະກຳດິຈີຕອນ, ການສົ່ງເສີມການຄ້າ ແລະ ການພັດທະນາພະລັງງານສະອາດ.

ອ້າງອີງ:

https://www.reuters.com/…/chinas-xi-pledges-10-bln…/

http://www.news.cn/english/2021-11/29/c_1310341086.htm