ລັດຖະມົນຕີກະຊວງການເງິນຕິດຕາມແຜນງົບປະມານ 10 ເດືອນ ແລະ ຄາດຄະເນ 2 ເດືອນທ້າຍປີ 2021 ຂອງຈຳປາສັກ-ສະຫວັນນະເຂດ
ລະຫວ່າງວັນທີ 25-26 ພະຈິກ 2021 ຜ່ານມານີ້, ໄດ້ຈັດກອງປະຊຸມເຜີຍແຜ່ເອກະສານວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ,ພ້ອມທັງສະຫຼຸບຕີລາຄາການຈັດຕັ້ງປະຕິບັດແຜນງົບ ປະມານແຫ່ງລັດ 10 ເດືອນ ແລະ ຄາດຄະເນການຈັດຕັ້ງປະຕິບັດແຜນງົບປະມານແຫ່ງລັດ 02 ເດືອນທ້າຍປີ2021 ຂອງແຂວງຈຳປາສັກ ແລະ ແຂວງສະຫວັນນະເຂດ (ຜ່ານລະບົບວີດີໂອທາງໄກ), ໂດຍການເປັນປະທານ ຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີການນຳຂັ້ນແຂວງທັງສອງແຂວງ, ມີຕາງໜ້າບັນດາກົມທີ່ກ່ຽວຂ້ອງ, ມີຫົວໜ້າ-ຮອງຫົວໜ້າພະແນກການເງິນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງກໍເພື່ອເຜີຍແຜ່ເອກະສານວາລະແຫ່ງຊາດ, ຄຳສັງຂອງນາຍົກລັດຖະມົນຕີ ເລກທີ 18/ນຍ, ເລກທີ 20/ນຍ, ຄໍາແນະນໍາ ແລະ ແຈ້ງການຂອງກະຊວງການເງິນ ເລກທີ 5320/ກງ, ໃນການຈັດຕັ້ງປະຕິບັດວາລະແຫ່ງຊາດທີ່ຕິດພັນກັບຂະແໜງການເງິນ, ພ້ອມນັ້ນໃນກອງປະຊຸມຫົວໜ້າພະແນກການເງິນແຂວງສະຫັວນນະເຂດ ແລະ ແຂວງຈຳປາສັກ ຍັງໄດ້ລາຍງານສະຫຼຸບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດ 10 ເດືອນ, ຄາດຄະເນການຈັດຕັ້ງປະຕິບັດແຜນງົບປະມານ 02 ເດືອນທ້າຍປີ 2021.
ພ້ອມນັ້ນ, ກົມສ່ວຍສາອາກອນ, ກົມພາສີ, ກົມຄຸ້ມຄອງຊັບສິນຂອງລັດ, ກົມງົບປະມານແຫ່ງລັດ, ຄັງເງິນແຫ່ງຊາດ ຍັງໄດ້ເຜີຍແຜ່ເອກະສານທີ່ຕິດພັນກັບການຜັນຂະຫຍາຍວາລະແຫ່ງຊາດຂອງບັນດາກົມ. ໃນນັ້ນ, ມີ ຂົງເຂດວຽກງານສ່ວຍສາອາກອນ, ຂົງເຂດວຽກຫງານ ພາສີ, ຂົງເຂດວຽກງານຊັບສິນ, ວຽກງານງົບປະມານ, ວຽກງານຄັງເງິນ ນຳອີກດ້ວຍ.
