ປະທານາທິບໍດີອາຟຣິກາໃຕ້ ປະນາມຫລາຍປະເທດຫ້າມການເດີນທາງ ສະກັດໂອມິຄຣອນບໍ່ເປັນທຳ ຮຽກຮ້ອງຍົກເລີກດ່ວນ

ປະທານາທິບໍດີ ໄຊຣິລ ຣາມາໂຟຊາ ຂອງອາຟຣິກາໃຕ້ ຖະແຫລງປະນາມມາດຕະການຫ້າມການເດີນທາງຂອງຫລາຍປະເທດ ທີ່ມີຜົນບັງຄັບໃຊ້ກັບນັກເດີນທາງຈາກອາຟຣິກາໃຕ້ ແລະ ຫລາຍປະເທດເພື່ອນບ້ານ ເພື່ອປ້ອງກັນການແຜ່ລະບາດຂອງເຊື້ອໂຄວິດສາຍພັນໂອມິຄຣອນ ໂດຍຊີ້ວ່າເປັນການດຳເນີນການທີ່ບໍ່ເປັນທຳ ພ້ອມທັງຮຽກຮ້ອງໃຫ້ບັນດາປະເທດເລັ່ງຍົກເລີກມາດຕະການຫ້າມເດີນທາງດັ່ງກ່າວໂດຍດ່ວນ.

“ຂ້າພະເຈົ້າຂໍຮຽກຮ້ອງໃຫ້ທຸກປະເທດທີ່ສັ່ງຫ້າມການເດີນທາງຕໍ່ປະເທດຂອງຂ້າພະເຈົ້າ ແລະ ປະເທດພີ່ນ້ອງຂອງຂ້າພະເຈົ້າ ໃຫ້ຍົກເລີກການຕັດສິນໃຈຂອງພວກທ່ານໃນທັນທີ ແລະ ໂດຍດ່ວນ” ທ່ານ ຣາມາໂຟຊາ ກ່າວ.

ທ່າທີຂອງຜູ້ນຳອາຟຣິກາໃຕ້ມີຂຶ້ນໃນວັນທີ 28 ພະຈິກ ເຊິ່ງເປັນການຖະແຫລງຕໍ່ປະຊາຊົນຄັ້ງທຳອິດຫລັງຈາກພົບການແຜ່ລະບາດຂອງໂຄວິດສາຍພັນໂອມິຄຣອນ.

ໂດຍທ່ານ ຣາມາໂຟຊາ ສະແດງຄວາມຜິດຫວັງຕໍ່ມາດຕະການຫ້າມເດີນທາງ ເຊິ່ງທ່ານຊີ້ວ່າບໍ່ເປັນໄປຕາມຫລັກເກນພື້ນຖານທາງວິທະຍາສາດ ແລະ ເບິ່ງວ່າອາຟຣິກາໃຕ້ກຳລັງຕົກເປັນເຫຍື່ອຂອງການເລືອກປະຕິບັດ. ຂະນະທີ່ຂັດແຍ່ງວ່າມາດຕະການຫ້າມເດີນທາງນັ້ນ ຈະບໍ່ໄດ້ຜົນໃນການປ້ອງກັນການລະບາດຂອງເຊື້ອໂຄວິດສາຍພັນໃໝ່ນີ້.

“ສິ່ງດຽວທີ່ການຫ້າມເດີນທາງຈະສົ່ງຜົນ ຄືສ້າງຄວາມເສຍຫາຍເພີ່ມຂຶ້ນຕໍ່ເສດຖະກິດຂອງປະເທດທີ່ໄດ້ຮັບຜົນກະທົບ ແລະ ບັ່ນທອນປະສິດທິພາບໃນການຮັບມື ແລະ ຟື້ນຕົວຈາກພະຍາດລະບາດ” ທ່ານ ຣາມາໂຟຊາ ກ່າວ.

ຜ່ານມາ ອາເມລິກາ, ອັງກິດ ຕະຫລອດຈົນຫລາຍປະເທດໃນເອີຣົບ ແລະ ອາຊີ ພາກັນປະກາດມາດຕະການຫ້າມນັກເດີນທາງທີ່ມາຈາກອາຟຣິກາໃຕ້ ແລະ ຫລາຍປະເທດໃກ້ຄຽງ ຫລັງມີການຢືນຢັນວ່າພົບຜູ້ຕິດເຊື້ອໂຄວິດໂອມິຄຣອນ ໂດຍໃນອາຟຣິກາໃຕ້ນັ້ນພົບວ່າ ກໍລະນີການຕິດເຊື້ອໃໝ່ທີ່ພົບຢູ່ແຂວງກົວເຕັງ ໄລຍະ 2 ອາທິດຜ່ານມາ ສ່ວນຫລາຍເປັນສາຍພັນໂອມິຄຣອນ.

ຂະນະທີ່ອົງການອະນາໄມໂລກ (WHO) ໄດ້ປະກາດໃຫ້ໂຄວິດສາຍພັນໂອມິຄຣອນເປັນສາຍພັນທີ່ໜ້າກັງວົນ ຫລັງພົບຫລັກຖານເບື້ອງຕົ້ນຊີ້ວ່າ: ໄວຣັສສາຍພັນໃໝ່ນີ້ມີອັດຕາການແຜ່ລະບາດສູງ.

ອ້າງອີງ:

https://www.bbc.com/news/world-africa-59453842

https://www.aljazeera.com/…/president-ramaphosa-calls…