ການສອບເສັງ ມ.ຊ ປີນີ້ຄາດວ່າອີກ 1 ເດືອນຈະປະກາດຜົນ

ວັນທີ 27 ກໍລະກົດນີ້, ທ່ານ ຄຳຜົງ ນາມມະວົງສັກ ຫົວໜ້າຫ້ອງການວິຊາການມະຫາວິທະຍາໄລແຫ່ງຊາດ ໃຫ້ຮູ້ວ່າ: ພາຍຫລັງມະຫາວິທະຍາໄລແຫ່ງຊາດໄດ້ຈັດການສອບເສັງຂຶ້ນໃນວັນທີ 25 ກໍລະກົດຜ່ານມາ, ເຫັນວ່າມີຄວາມເປັນລະບຽບຮຽບຮ້ອຍດີ, ໂດຍສະເພາະບັນດານັກສຶກສາໄດ້ໃຫ້ຄວາມຮ່ວມມືໃນການປະຕິບັດລະບຽບການສອບເສັງຢ່າງເຂັ້ມງວດ ແລະ ຄະນະກຳມະການທຸກທ່ານກໍໄດ້ເຂັ້ມງວດໃນການປະຕິບັດໜ້າທີ່ຂອງຕົນ ແນໃສ່ເຮັດໃຫ້ມີຄວາມໂປ່ງໃສ ແລະ ຍຸຕິທຳ, ຂະນະທີ່ຜົນສອບເສັງຄາດວ່າອີກປະມານ 1 ເດືອນຈະຮູ້ຜົນ.

ທ່ານ ຄຳຜົງ ໃຫ້ຮູ້ອີກວ່າ: ການສອບເສັງເຂົ້າມະຫາວິທະຍາໄລແຫ່ງຊາດສົກນີ້ມີນັກສອບເສັງກວ່າ 18 ພັນຄົນ ແລະ ໄດ້ຈັດສອບຢູ່ 20 ຈຸດໃນແຕ່ລະຄະນະພາກວິຊາມະຫາວິທະຍາໄລແຫ່ງຊາດ ແລະ ໂຮງຮຽນມັດທະຍົມສົມບູນຕ່າງໆໃນນະຄອນຫລວງວຽງຈັນ, ຊຶ່ງການສອບເສັງໄດ້ແບ່ງອອກເປັນ 3 ສາຍຄື: ສາຍທຳມະຊາດ, ສາຍສັງຄົມ ແລະ ສາຍເຄິ່ງສັງຄົມ ແລະ ເຄິ່ງທຳມະຊາດ, ຊຶ່ງແຕ່ລະກຸ່ມແມ່ນສອບເສັງໃນຫົວບົດສອບເສັງຕ່າງກັນ ແລະ ນັກສຶກສາແຕ່ລະຄົນມີສິດເລືອກເສັງພຽງກຸ່ມດຽວເທົ່ານັ້ນ, ແຕ່ສາມາດເລືອກສາຂາວິຊາຮຽນໄດ້ 2 ສາຂາຄື: ຕົ້ນຕໍ ແລະ ສຳຮອງ ທີ່ບັນຈຸໃນກຸ່ມດຽວເທົ່ານັ້ນ ແລະ ສໍາລັບການສອບເສັງຄັດເລືອກເອົານັກສຶກສາເຂົ້າຮຽນຢູ່ມະຫາວິທະຍາໄລແຫ່ງຊາດ ແມ່ນມີຄວາມໂປ່ງໃສ ແລະ ຍຸຕິທຳຫລາຍຂຶ້ນ, ເນື່ອງຈາກປັດຈຸບັນການກວດຄະແນນ ແລະ ກວດຂໍ້ສອບ, ແມ່ນໄດ້ໃຊ້ມາດຖານສາກົນຄືນຳໃຊ້ລະບົບຄອມພິວເຕີ, ເຮັດໃຫ້ມີຄວາມວ່ອງໄວ ແລະ ໂປ່ງໃສທີ່ສຸດ, ສ່ວນຜົນການສອບເສັງແມ່ນໄດ້ຜ່ານການກວດກາຂອງຄະນະກຳມະການສອບເສັງລະດັບຊາດ, ໂດຍຈັດລຽງຄະແນນແຕ່ສູງຫາຕ່ຳ ຕາມເກນມາດຕະຖານຄະແນນທີ່ກຳນົດໃນລາຍວິຊາ, ເຊິ່ງພາຍຫລັງກວດກາລາຍຊື່, ຄະແນນທີ່ຖືກຕ້ອງ ແລະ ຜ່ານການຮັບຮອງຜົນສອບເສັງຈາກກະຊວງສຶກສາທິການ ແລະ ກິລາ ພາຍໃນ 15 ວັນ, ຜູ້ຖືກຄັດເລືອກແມ່ນໃຫ້ມາລົງທະບຽນພາຍໃນ 30 ວັນ, ຖ້າກາຍກຳນົດແມ່ນສະຫລະສິດ ແລະ ຫລັງຈາກຮັບນັກສືກສາໄດ້ປະມານ 1 ເດືອນ, ກໍຈະມີການກວດປະຫວັດ ແລະ ເອກະສານທຸກຢ່າງຂອງນັກສຶກສາຢ່າງລະອຽດເພື່ອຮັບປະກັນບໍ່ໃຫ້ມີການປອມແປງເອກະສານຂອງນັກສຶກສາ ແລະ ຮັບປະກັນຄວາມໂປ່ງໃສ, ເຮັດໃຫ້ວຽກງານການສຶກສາກໍຄືການພັດທະນາຊັບພະຍາກອນມະນຸດມີຄຸນນະພາບຂຶ້ນ.