ທ່ານ ໄບເດນ ຮຽກຮ້ອງທົ່ວໂລກ ສະຫລະລິຂະສິດວັກຊີນ ເພື່ອສູ້ໂຄວິດສາຍພັນໃໝ່ໂອໄມຄຣອນ

ປະທານາທິບໍດີ ໄບເດນ ຮຽກຮ້ອງໃຫ້ສະຫລະການຄຸ້ມຄອງຊັບສິນທາງປັນຍາ ຫລັງຈາກການຄົ້ນພົບເຊື້ອໂອໄມຄຣອນ (Omicron).

ສຳນັກຂ່າວຣອຍເຕີລາຍງານວ່າ: ປະທານາທິບໍດີ ໂຈ ໄບເດນ ແຫ່ງອາເມລິກາ ຮຽກຮ້ອງໃຫ້ປະເທດຕ່າງໆ ຕົກລົງຈະສະຫລະການຄຸ້ມຄອງຊັບສິນທາງປັນຍາວັກຊີນປ້ອງກັນໂຄວິດ-19 ພາຍຫລັງການກວດພົບເຊື້ອໄວຣັສໂຄໂຣນາສາຍພັນໃໝ່ໃນອາຟຣິກາໃຕ້.

ທ່ານ ໄບເດນ ກ່າວເຖິງບັນຫານີ້ເພາະຄາດວ່າຈະປະຊຸມກັນທີ່ອົງການການຄ້າໂລກ (WTO) ໃນອາທິດໜ້າ.

ເຖິງຢ່າງໃດກໍຕາມ, ກອງປະຊຸມທີ່ທ່ານອ້າງເຖິງຖືກເລື່ອນອອກໄປໃນພາຍຫລັງ ຫລັງຈາກການພົບສາຍພັນໃໝ່ນີ້ນຳໄປສູ່ການຈຳກັດການເດີນທາງ ເຊິ່ງຈະເຮັດໃຫ້ຜູ້ເຂົ້າຮ່ວມຈຳນວນຫລາຍບໍ່ສາມາດໄປເຖິງເຈນີວາເພື່ອຮ່ວມປະຊຸມຢູ່ນັ້ນໄດ້.

“ຂ່າວກ່ຽວກັບສາຍພັນໃໝ່ນີ້ໜ້າຈະຊັດເຈນກວ່າທີ່ເຄີຍວ່າເປັນຫຍັງການລະບາດໃຫຍ່ຄັ້ງນີ້ຈະບໍ່ສິ້ນສຸດ ຈົນກວ່າເຮົາຈະມີການສັກວັກຊີນທົ່ວໂລກ” ທ່ານ ໄບເດນ ກ່າວໃນຖະແຫລງການ.

“ຂ່າວນີ້ເນັ້ນເຖິງຄວາມສຳຄັນຂອງການດຳເນີນງານ (ຍົກເວັ້ນການຄຸ້ມຄອງຊັບສິນທາງປັນຍາ) ຢ່າງວ່ອງໄວ”.

ທ່ານ ໄບເດນ ຍັງຮຽກຮ້ອງໃຫ້ປະເທດອື່ນໆສະແດງ “ນ້ຳໃຈ” ໃຫ້ເທົ່າກັບອາເມລິກາ ແລະ ບໍລິຈາກວັກຊີນປ້ອງກັນໂຄວິດ-19 ໃຫ້ຫລາຍຂຶ້ນ ບໍ່ສະນັ້ນ ການລະບາດໃຫຍ່ຈະບໍ່ຢຸດເຊົາ.

“ການລະບາດໃຫຍ່ນີ້ຈະບໍ່ສິ້ນສຸດຈົນກວ່າເຮົາຈະມີການສັກວັກຊີນທົ່ວໂລກ” ທ່ານກ່າວໃນຖະແຫລງການຈາກແນນທັກເກັດ ເຊິ່ງທ່ານໃຫ້ເວລາຊ່ວງມື້ພັກຂອບໃຈພະເຈົ້າ.

ເຖິງຢ່າງໃດກໍຕາມ, ລັດຖະບານທ່ານ ໄບເດນ ຜະເຊີນກັບການວິພາກວິຈານຄັ້ງໃໝ່ກ່ຽວກັບຄວາມລົ້ມເຫລວໃນການຈັດຫາວັກຊີນໃຫ້ປະເທດທີ່ທຸກຍາກ ໃນຂະນະທີ່ໃຫ້ວັກຊີນສັກຟຣີແກ່ຊາວອາເມລິກາ ຫລັງຈາກພົບສາຍພັນໃໝ່ຊື່ໂອໄມຄຣອນ.