ສານຂອງ ທ່ານນາຍົກລັດຖະມົນຕີ ເນື່ອງໃນໂອກາດລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ

– ລູກຫຼານລາວບັນດາເຜົ່າ ທີ່ຮັກແພງ!

ການລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ, ວັນທີ 25 ພະຈິກ ໄດ້ຈັດຂຶ້ນໃນທົ່ວໂລກໃນທຸກໆປີ ຊຶ່ງຂະບວນການລະນຶກວັນດັ່ງກ່າວແມ່ນເລີ່ມແຕ່ວັນທີ 25 ພະຈິກ – 10 ທັນວາ 2021 ຊຶ່ງກວມເອົາວັນສຳຄັນຕ່າງໆ ເຊັ່ນ: ວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ, ວັນສາກົນຕ້ານເອດສ, ວັນສິດທິມະນຸດ. ໃນປີນີ້ແມ່ນດຳເນີນພາຍໃຕ້ຫົວຂໍ້ “ໂລກແຫ່ງສີນ້ຳໝາກກ້ຽງ: ຢຸດຕິຄວາມຮຸນແຮງຕໍ່ແມ່ຍິງ ນັບແຕ່ເວລານີ້ໄປ (Orange the World: END VOILENCE AGAINST WOMEN NOW) ຈຸດປະສົງ ຂອງຫົວຂໍ້ ເພື່ອປຸກລະດົມເຄືອຂ່າຍຂອງ ອົງການສະຫະປະຊາຊາດ, ອົງການຈັດຕັ້ງສາກົນ, ອົງການຈັດຕັ້ງລັດ, ເອກະຊົນ, ອົງການຈັດຕັ້ງທາງສັງຄົມ ລວມທັງບຸກຄົນ ເພື່ອໂຄສະນາຍຸດທະສາດໄລຍະ ຍາວ, ແຜນງານ ແລະ ຊັບພະຍາກອນ ໃນການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໂດຍໃຫ້ບຸລິມະສິດແກ່ແມ່ຍິງ ແລະ ເດັກຍິງທີ່ດ້ອຍໂອກາດ; ເຜີຍແຜ່ລະຄອນເລື່ອງຕ່າງໆ ທີ່ສະແດງໃຫ້ເຫັນວ່າ ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນສິ່ງທີ່ສາມາດປ້ອງກັນໄດ້ ດ້ວຍການເຊື່ອມເຂົ້າຍຸດທະສາດການສົ່ງເສີມພາວະຄວາມເປັນຜູ້ນຳ ແລະ ຄວາມກ້າຫານ ຂອງແມ່ຍິງຢ່າງເຕັມສ່ວນເຂົ້າໃນການຕັດສິນບັນຫາ ແລະ ມີສ່ວນຮ່ວມໃນການສ້າງນະໂຍບາຍທຸກຂັ້ນ ນັບແຕ່ຂັ້ນສູນກາງເຖິງລະດັບທ້ອງຖິ່ນ, ລວມທັງລະດັບສາກົນ ເພື່ອສ້າງແຮງບັນດານໃຈໃຫ້ທຸກພາກສ່ວນໄດ້ຄົ້ນຄິດວິທີໃນຈັດຕັ້ງປະຕິບັດການປ້ອງກັນ ແລະ ລຶບລ້າງຄວາມຮຸນແຮງໃຫ້ເປັນຮູບປະທຳ

ໃນທົ່ວໂລກ ແມ່ຍິງ ອາຍຸ 15 ປີ ຂຶ້ນໄປຖືກກະທຳຄວາມຮຸນແຮງທາງຮ່າງກາຍ ຫຼື ທາງເພດ ຈາກຄູ່ຮ່ວມຊີວິດ ຫຼື ບຸກຄົນອື່ນທີ່ບໍ່ແມ່ນຄູ່ຮ່ວມຊີວິດ, ທີ່ຖືກຄຸກຄາມທາງເພດ, ຄວາມຮຸນແຮງຈາກການໃຊ້ສື່ດີຈີຕອນ, ການປະຕິບັດທີ່ເປັນອັນຕະລາຍ ແລະ ການຄ້າຂາຍບໍລິການທາງເພດ ນັ້ນສະແດງໃຫ້ເຫັນວ່າ ລະດັບຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນໜຶ່ງທົດສະວັດທີ່ຜ່ານມາຢູ່ໃນລະດັບສູງຄືເກົ່າ, ນອກນີ້ ຍັງມີເດັກຍິງກວ່າ 11 ລ້ານຄົນໃນທົ່ວໂລກ ທີ່ບໍ່ສາມາດກັບຄືນສູ່ໂຮງຮຽນໄດ້ ຈຶ່ງມີຄວາມສ່ຽງສູງໃນການຖືກບັງຄັບແຕ່ງງານແຕ່ກ່ອນໄວອັນຄວນ. ບັນຫາຄວາມຫຍຸ້ງຍາກທາງດ້ານເສດຖະກິດ ເຮັດໃຫ້ແມ່ຍິງ ແລະ ເດັກນ້ອຍ ກວ່າ 47 ລ້ານຄົນໃນທົ່ວໂລກຕົກຢູ່ໃນສະພາບຄວາມທຸກຍາກ ແລະ ຄວາມບໍ່ສະເໝີພາບກໍເພີ່ມຂຶ້ນ. ສະນັ້ນ ເພື່ອຮັບປະກັນບໍ່ໃຫ້ແມ່ຍິງ ຫຼື ເດັກຍິງຖືກປະໄວ້ຢູ່ເບື້ອງຫຼັງ ພວກເຮົາຈຳເປັນຕ້ອງ ມີວິທີການທີ່ສົມບູນແບບ ແລະ ລວມສູນໃນການປ້ອງກັນ ແລະ ແກ້ໄຂ ທຸກຮູບແບບຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ສາມາດປັບຕົວເຂົ້າກັບສະພາບການທີ່ປ່ຽນແປງໄດ້ຢ່າງໄວວາ.

ຢູ່ ສປປ ລາວ ຕາມໂຕເລກລາຍງານຂອງສູນໃຫ້ຄຳປຶກສາ ແລະ ປົກປ້ອງແມ່ຍິງ ແລະ ເດັກນ້ອຍ ສູນກາງສະຫະພັນແມ່ຍິງລາວກ່ຽວກັບ ຜູ້ຖືກຄວາມຮຸນແຮງໃນຮູບແບບຕ່າງໆ ທີ່ເຂົ້າໄປຂໍຄຳປຶກສາ ແລະ ຊ່ວຍເຫຼືອ ຢູ່ສູນດັ່ງກ່າວ ໃນ ໄລຍະ ປີ 2021 ທັງໃນຮູບແບບເຊິ່ງໜ້າ ແລະ ທາງໂທລະສັບ ແມ່ນມີເຖິງ 584 ຄົນ ຍິງ 403 ຄົນ ແລະ ຊາຍ 181 ຄົນ, ອາຍຸ ຕ່ຳກວ່າ 18 ປີ 19 ຄົນ ແລະ ຫຼາຍກວ່າ 18 ປີ 565 ຄົນ ບັນຫາສ່ວນໃຫຍ່ແມ່ນ ການທຳມິດສະຈານ, ຜົວເມຍຜິດຖຽງກັນ, ການຢ່າຮ່າງ, ການທຳຮ້າຍຮ່າງກາຍ, ການຂົ່ມຂືນກະທຳສຳເລົ່າ ແລະ ອື່ນໆ ທີ່ຕິດພັນກັບການໃຊ້ຄວາມຮຸນແຮງ ແມ່ນຍັງບໍ່ມີທ່າອ່ຽງຫຼຸດລົງ.

ພີ່ນ້ອງຮ່ວມຊາດ ທີ່ຮັກແພງທັງຫຼາຍ

ຂ້າພະເຈົ້າ ຕາງໜ້າໃຫ້ລັດຖະບານ ຮ່ວມກັບບັນດາປະເທດໃນທົ່ວໂລກ ພ້ອມກັນ ລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ປະຈຳ ປີ 2021 ພາຍໃຕ້ຫົວຂໍ້ ໂລກສີນ້ຳໝາກກ້ຽງ: ຢຸດຕິຄວາມຮຸນແຮງຕໍ່ແມ່ຍິງ ນັບແຕ່ເວລານີ້ໄປ ເພື່ອເປັນການປຸກລະດົມໃຫ້ທຸກຮຸ່ນຄົນໃນທົ່ວສັງຄົມໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນການລ່ວງລະເມີດສິດທິມະນຸດຂັ້ນພື້ນຖານຂອງແມ່ຍິງ ແລະ ເດັກຍິງ, ສ້າງຈິດສຳນຶກໃຫ້ທຸກຄົນ ທຸກພາກສ່ວນ ພ້ອມກັນສົ່ງເສີມ ແລະ ປະຕິບັດສິດສະເໝີພາບຍິງ-ຊາຍ, ກ້າວໄປເຖິງໃຫ້ທຸກຄົນໃນທົ່ວສັງຄົມ ເຄົາລົບນັບຖື ໃຫ້ກຽດຊຶ່ງກັນ ແລະ ກັນ ບໍ່ມີການຈຳແນກຕໍ່ແມ່ຍິງ, ເຮັດໃຫ້ທັງຍິງ-ຊາຍ, ເດັກຍິງ ແລະ ເດັກຊາຍ ມີສິດສະເໝີພາບເທົ່າທຽມກັນໃນການດຳລົງຊີວິດ ແລະ ເຄື່ອນໄຫວຢ່າງມີກຽດສັກສີ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ສ້າງສັງຄົມລາວໃຫ້ເປັນສັງຄົມທີ່ປອດໄພ ແລະ ຍຸຕິທຳ.

ຕະຫຼອດໄລຍະ 1 ປີຜ່ານມາ ເຖິງແມ່ນພວກເຮົາປະເຊີນກັບສະພາບການ ແລະ ຄວາມຫຍຸ້ງຍາກຫຼາຍປະການ ລວມທັງບັນຫາໂຄວິດ-19 ແຕ່ພວກເຮົາພະຍາຍາມປະຕິບັດວຽກງານປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກຍິງ ສຳເລັດຫຼາຍດ້ານ ເຊັ່ນ ປະຕິບັດພັນທະຕໍ່ສົນທິສັນຍາສາກົນທີ່ ສປປ ລາວ ພາຄີ ດ້ວຍການເຊື່ອມສານເອົາເນື້ອໃນຂອງສົນທິສັນຍາທີ່ຕິດພັນກັບສິດທິແມ່ຍິງ ແລະ ຄວາມສະເໝີພາບຍິງ-ຊາຍ ເຂົ້າໃນນິຕິກຳ ຂອງ ສ ປປ ລາວ, ໄດ້ຮັບຮອງ ແລະ ປະກາດໃຊ້ຢ່າງເປັນທາງການ 3 ແຜນດຳເນີນງານແຫ່ງຊາດ ຄື: ແຜນດຳເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ, ແຜນດຳເນີນງານແຫ່ງຊາດ ເພື່ອແມ່ ແລະ ເດັກ, ແຜນດຳເນີນງານແຫ່ງຊາດເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ໄລຍະ 5 ປີ (2021-2025) ແຜນດຳເນີນງານເຫຼົ່ານີ້ ຈະເປັນເຄື່ອງມື ແລະ ກົນໄກໃນການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າແມ່ຍິງ ຄວາມສະເໝີພາບຍິງ-ຊາຍ ໃຫ້ບັນລຸຜົນສຳເລັດຕາມຄາດໝາຍ ໂດຍສະເພາະບັນລຸເປົ້າໝາຍ ທີ 5 ການພັດທະນາແບບຍືນຍົງ. ສ້າງຂະບວນການປູກຈິດສຳນຶກໃນທົ່ວສັງຄົມ ໄດ້ຮັບຮູ້ ແລະ ເຂົ້າໃຈກ່ຽວກັບແນວທາງນະໂຍບາຍຂອງພັກ-ລັດ ໃນການສົ່ງເສີມ ແລະ ຈັດຕັ້ງປະຕິບັດວຽກງານປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ. ການຈັດຕັ້ງປະຕິບັດວຽກງານດັ່ງກ່າວ ໃນປີຜ່ານມາເຖິງແມ່ນຈະມີຜົນສຳເລັດຫຼາຍດ້ານກໍຕາມ, ແຕ່ພວກເຮົາກໍຍັງປະເຊີນກັບສິ່ງທ້າທາຍຈຳນວນໜຶ່ງ ໂດຍສະເພາະແມ່ນ ການປະຕິບັດຕາມຮີດຄອງປະເພນີ, ແນວຄິດຄອງເດີມທີ່ຫຼ້າຫຼັງ ແລະ ສະພາບຄວາມຫຍຸ້ງຍາກທາງດ້ານເສດຖະກິດຂອງຄອບຄົວ, ຄວາມທຸກຍາກ ຍັງເປັນອຸປະສັກໃຫ້ແກ່ການປັບປ່ຽນທັດສະນະຄະຕິຂອງຄົນ ຊຶ່ງສັງຄົມຈໍານວນບໍ່ໜ້ອຍ ຍັງຄິດວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນເລື່ອງປົກກະຕິທີ່ຍອມຮັບໄດ້, ການແຕ່ງດອງກ່ອນໄວອັນຄວນ, ການປະລະການຮຽນຂອງເດັກຍິງ ໂດຍສະເພາະໃນເຂດຊົນນະບົດ ແລະ ເຂດຫ່າງໄກສອກຫຼີກຍັງແຜ່ຫຼາຍ. ນອກຈາກນັ້ນ, ຈຳນວນບຸກຄະລາກອນ ທີ່ມີຄວາມຮູ້ ແລະ ປະສົບການ ແລະ ທຶນຮອນເພື່ອນຳໃຊ້ເຂົ້າໃນວຽກງານດັ່ງກ່າວຈຳມີຄວາມກັດ.

ພີ່ນ້ອງຮ່ວມຊາດທີ່ຮັກແພງທັງຫຼາຍ!

ໃນໂອກາດລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ປີນີ້, ຂ້າພະເຈົ້າຂໍຕາງໜ້າໃຫ້ລັດຖະບານ ສະແດງຄວາມຊົມເຊີຍມາຍັງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ອົງການປົກຄອງທ້ອງຖິ່ນ, ພາກເອກະຊົນ ຕະຫຼອດຮອດປະຊາຊົນບັນດາເຜົ່າ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນວຽກງານປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ. ພ້ອມນີ້ກໍຂໍສະແດງຄວາມຂອບໃຈ ມາຍັງປະເທດເພື່ອນມິດ, ຄູ່ຮ່ວມພັດທະນາ, ອົງການຈັດຕັ້ງສາກົນ ແລະ ອົງການຈັດຕັ້ງທາງສັງຄົມຕ່າງໆ ທີ່ໄດ້ໃຫ້ການສະໜັບສະໜູນ ສປປ ລາວ ໃນການຈັດຕັ້ງປະຕິບັດນະໂຍບາຍຂອງລັດຖະບານ ທີ່ກ່ຽວຂ້ອງກັບວຽກງານດັ່ງກ່າວ.

ຂໍຮຽກຮ້ອງມາຍັງບັນດາການຈັດຕັ້ງ ແລະ ທຸກພາກສ່ວນ ຈົ່ງຍົກສູງຄວາມຮັບຜິດຊອບ ເອົາໃສ່ປະກອບສ່ວນ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025), ຈົ່ງໄດ້້ອົາ 3 ແຜນດຳເນີນງານແຫ່ງຊາດ ເວົ້າລວມ, ເວົ້າສະເພາະແຜນງານທີ່ຕິດພັນກັບການສົ່ງເສີມຄວາມສະເໝີພາບຍິງ-ຊາຍ ແລະ ການລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ແຜນພັດທະນາແມ່ຍິງແຫ່ງຊາດ ເຊື່ອມສານເຂົ້າໃນການຈັດຕັ້ງປະຕິບັດວຽກງານຂອງຕົນ ເພື່ອພັດທະນາເສດຖະກິດສັງ-ຄົມໃຫ້ມີປະສິດທິພາບ. ຄ່ຽງກັນນັ້ນ, ສືບຕໍ່ໂຄສະນາ ເຜີຍແຜ່ ແລະ ຊຸກຍູ້ການປະຕິບັດນິຕິກຳຕ່າງໆ ທີ່ກ່ຽວຂ້ອງກັບການສົ່ງເສີມຄວາມສະເໝີພາບຍິງ-ຊາຍ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ປັບປຸງຂອດການປະສານງານ ແລະ ການບໍລິການຊ່ວຍເຫຼືອທີ່ຈຳເປັນ ແລະ ມີຄຸນນະພາບແກ່ແມ່ຍິງ ແລະ ເດັກຍິງ ທີ່ຖືກເຄາະຮ້າຍຈາກຄວາມຮຸນແຮງ ໂດຍສະເພາະແມ່ຍິງ ທີ່ຢູ່ເຂດຫ່າງໄກສອກຫຼີກ. ຮຽກຮ້ອງມາຍັງປະຊາຊົນບັນດາເຜົ່າໃນຂອບເຂດທົ່ວປະເທດ ຈົ່ງຍົກສູງຄວາມເປັນເຈົ້າການໃນການປ້ອງກັນເພື່ອບໍ່ໃຫ້ເກີດຄວາມຮຸນແຮງ ແລະ ໃຫ້ການຊ່ວຍເຫຼືອຜູ້ຖືກເຄາະຮ້າຍຢ່າງເໝາະສົມ ໂດຍເລີ່ມຈາກການປັບປ່ຽນທັດສະນະຄະຕິດ້ວຍການເຄົາລົບໃນສິດຂອງແມ່ຍິງ ແລະ ບໍ່ຈຳແນກຕໍ່ແມ່ຍິງ ແລະ ສົ່ງເສີມສິດສະເໝີພາບຍິງ-ຊາຍໃນທຸກດ້ານຕາມກົດໝາຍໄດ້ກຳນົດໄວ້.

ທ້າຍສຸດນີ້, ຂ້າພະເຈົ້າຂໍອວຍພອນ ໃຫ້ການລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປີນີ້ ພາຍໃຕ້ຄຳຂວັນ: ໂລກສີນ້ຳຫມາກກ້ຽງ: ຢຸດຕິຄວາມຮຸນແຮງຕໍ່ແມ່ຍິງ ນັບແຕ່ເວລານີ້ໄປ ຈົ່ງປະສົບຜົນສຳເລັດ ຕາມລະດັບຄາດໝາຍທີ່ວາງໄວ້.