ແຂວງອຸດົມໄຊຄາດຄະເນໝົດປີຈະປະຕິບັດເກັບລາຍຮັບໄດ້ທັງໝົດ 124,33 ຕື້ກີບ, ເທົ່າກັບ 87,43% ຂອງແຜນປີ
ວັນທີ 18 ພະຈິກ 2021 ທີ່ຜ່ານມານີ້, ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະ ຊວງ ການເງິນ, ພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຊຸກຍູ້ວຽກງານລາຍຮັບເຂົ້າງົບປະມານແຫ່ງລັດຢູ່ແຂວງອຸດົມໄຊ, ໂດຍການຕ້ອນຮັບຂອງຄະນະພະແນກການເງິນແຂວງອຸດົມໄຊ ຫົວໜ້າ-ຮອງຫົວໜ້າຂະແໜງສາມສາຍຕັ້ງ, ພະນັກງານວິຊາການເຂົ້າຮ່ວມ.
ໂອກາດນີ້, ທ່ານ ປອ ສຸລິຍາ ສຸພິທັກ ຫົວໜ້າພະແນກການເງິນແຂວງອຸດົມໄຊ ໄດ້ລາຍງານໂດຍຫຍໍ້ ກ່ຽວກັບການຈັດເກັບລາຍຮັບຄຸ້ມຄອງລາຍຈ່າຍງົບປະມານຂອງແຂວງອຸດົມໄຊໃນປີ 2021 ແຂວງອຸດົມໄຊ ໄດ້ ຮັບຕົວເລກແຜນຈັດເກັບລາຍຮັບທັງໝົດຈໍານວນ 142,2 ຕື້ກີບ, ຜ່ານການຈັດຕັ້ງປະຕິບັດໃນໄລຍະ 10 ເດືອນ ຜ່ານມາສາມາດປະຕິບັດໄດ້ພຽງ 87,93 ຕື້ກີບເທົ່າກັບ 61.84% ຂອງແຜນການປີ, ຄາດຄະເນໝົດປີຈະປະ ຕິບັດໄດ້ທັງໝົດ 124,33 ຕື້ກີບ, ເທົ່າກັບ 87,43% ຂອງແຜນປີ, ໃນນີ້: ລາຍຮັບພາສີແຜນການປີ 15,00 ຕື້ກີບ, ປະຕິບັດໄດ້ທັງໝົດຈຳນວນ 2,18 ຕື້ກີບ, ທຽບໃສ່ແຜນການປີເທົ່າກັບ 14,55%, ຄາດຄະເນໝົດປີ ຈະ ປະຕິບັດໄດ້ທັງໝົດ 2,24 ຕື້ກີບ, ເທົ່າກັບ 14,91% ຂອງແຜນການປີ. ລາຍຮັບທ້ອງຖິ່ນແຜນການປີ 127,20 ຕື້ກີບ, ປະຕິບັດ 10 ເດືອນຜ່ານມາໄດ້ທັງໝົດຈຳນວນ 85,20 ຕື້ກີບ, ທຽບໃສ່ແຜນການປີເທົ່າກັບ 66,98%, ຄາດຄະເນໝົດປີຈະປະຕິບັດໄດ້ 121,54 ຕື້ກີບ ເທົ່າກັບ 95,55% ຂອງແຜນການປີ (ລາຍຮັບສ່ວຍສາອາກອນ ປະຕິບັດໄດ້ 74,50 ຕື້ກີບ, ລາຍຮັບຊັບສິນປະຕິບັດໄດ້ 10,70 ຕື້ກີບ ແລະ ລາຍຮັບພາສີພູດທ້ອງຖິ່ນ ຄາດຄະເນຈະປະຕິບັດໄດ້ທັງໝົດ 1,86 ຕື້ກີບ).
ສ່ວນແຜນລາຍຈ່າຍງົບປະມານທັງໝົດ 407,26 ຕື້ກີບປະຕິບັດ 10 ເດືອນຜ່ານມາໄດ້ທັງໝົດຈຳນວນ 314.10 ຕື້ກີບ ເທົ່າກັບ 77,13% ຂອງແຜນການປີ, ຄາດຄະເນໝົດປີຈະປະຕິບັດໄດ້ທັງໝົດ 407,30 ຕື້ກີບ, ເທົ່າກັບ 100,01% ຂອງແຜນການປີ. ໂດຍລວມແລ້ວສະພາບການຈັດຕັ້ງປະຕິບັດແຜນງົບປະມານປີ 2021 ຢູ່ແຂວງອຸດົມໄຊແມ່ນພົບຄວາມຫຍຸ້ງຍາກຫຼາຍບໍ່ສາມາດຈັດຕັ້ງປະຕິບັດຈັດເກັບລາຍຮັບໄດ້ຕາມແຜນທີ່ຄາດຄະເນໄວ້ເນື່ອງຈາກສະພາບເສດຖະກິດຂອງໂລກ ແລະ ພາກພື້ນມີການຫັນປ່ຽນຢ່າງຊັບສົນບວກກັບສະ ພາບ ການ ແຜ່ລະບາດຂອງພະຍາດໂຄວິດ-19.
ແຕ່ແນວໃດກໍຕາມແຂວງກໍ່ໄດ້ສຸມໃສ່ແກ້ໄຂບັນດາລາຍຈ່າຍທີ່ເປັນບູລິມະສິດຕົ້ນຕໍເປັນຕົ້ນ: ເບີກ ຈ່າຍເງິນເດືອນ, ເງິນນະໂຍບາຍ, ຈ່າຍໜີ້ສິນບໍລິຫານ, ຈ່າຍເງິນແຮທ້ອງຖິ່ນ, ຈ່າຍຕ້ານ ແລະ ສະກັດກັ້ນ ພະຍາດໂຄວິດ-19. ວຽກງານການບັນຊີພາຍຫຼັງໄດ້ມີການຈັດຕັ້ງປະຕິບັດວຽກງານບັນຊີແຫ່ງລັດປີ 2021 ເຫັນ ວ່າມີທ່າອ່ຽງເພີ່ມຂຶ້ນຈາກທີ່ມີຫົວໜ່ວຍຖືບັນຊີທັງໝົດ 58 ຫົວໜ່ວຍກໍ່ເພີ່ມຂຶ້ນອີກ 17 ຫົວໜ່ວຍ, ໄດ້ອອກ ໃບຕິດຕາມການຖືບັນຊີໃຫ້ແກ່ຫົວໜ່ວຍຖືບັນຊີອ້ອມຂ້າງແຂວງ ແລະ ຫົວໜ່ວຍຖືບັນຊີທີ່ມີງົບປະມານຂຶ້ນກັບ ສູນກາງ ຫຼື ສາຍຕັ້ງໄດ້ທັງໝົດ 54 ຫົວໜ່ວຍ ໃນນີ້: ຫົວໜ່ວຍຖືບັນຊີຂັ້ນແຂວງມີ 40 ຫົວໜ່ວຍ ແລະ ຫົວ ໜ່ວຍຖືບັນຊີຂັ້ນເມືອງ ມີ 14 ຫົວໜ່ວຍ, ສໍາລັບວຽກງານວິສາຫະກິດ ກໍໄດ້ອອກໃບຕິດຕາມການຖືບັນຊີໃຫ້ ຫົວໜ່ວຍຖືບັນຊີ ຢູ່ອ້ອມຂ້າງແຂວງ ໄດ້ຈຳນວນ 147 ຫົວໜ່ວຍ, ໃນນີ້: ຕໍ່ທະບຽນຈຳນວນ 127 ຫົວໜ່ວຍ ແລະ ຂຶ້ນໃໝ່ຈຳນວນ 18 ຫົວໜ່ວຍ, ສ່ວນວຽກງານກວດສອບໄດ້ຄຸ້ມຄອງ, ຕິດຕາມ, ກວດກາການເຄື່ອນ ໄຫວ ດຳເນີນທຸລະກິດ ສາຂາ ບໍລິສັດ ສະບາຍດີຊ໋ອບແວ ແລະ ສູນຝຶກອົບຮົມ MSS ທີ່ໃຫ້ບໍລິການສະຫຼຸບບັນ ຊີ ໃຫ້ຫົວໜ່ວຍທຸລະກິດຢູ່ແຂວງອຸດົມໄຊ.
ໂອກາດດັ່ງກ່າວ, ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີຖະຊວງການເງິນ ໄດ້ໂອ້ລົມ ແລະ ເນັ້ນບາງບັນຫາທີ່ຈະຕ້ອງໄດ້ເອົາໃຈໃສ່ສູ້ຊົນເກັບລາຍຮັບເຂົ້າງົບປະມານແຫ່ງລັດ ໃຫ້ບັນລຸຕາມຄາດໝາຍ ໂດຍສະ ເພາະແມ່ນ 2 ເດືອນທ້າຍປີຕ້ອງໄດ້ກວດບັນດາຫົວໜ່ວຍທຸລະກິດຄືນໃໝ່, ພາສີທີ່ດິນ, ຄ່າທຳນຽມທາງ ແລະ ອື່ນໆ.
