ຢາກໄປຫາເງິນຢູ່ໄທຕ້ອງໄປຕາມປ່ອງລ່ອງຕາມແປວ

ໂດຍ: ທິດກໍ່າ

ນັບແຕ່ລັດຖະບານໄທໄດ້ປະກາດເປີດປະເທດເພື່ອຮັບເອົານັກທ່ອງທ່ຽວຈາກ 63 ປະເທດ ທີ່ສາມາດເດີນທາງເຂົ້າປະເທດໄທໂດຍບໍ່ມີການກັກບໍລິເວນ 14 ວັນ ເລີ່ມແຕ່ວັນທີ 1 ພະຈິກ 2021 ເປັນຕົ້ນມາ ເຫັນວ່ານັກທ່ອງທ່ຽວຈາກຫລາຍປະເທດກໍໄດ້ເຂົ້າໄປທ່ອງທ່ຽວໃນປະເທດໄທຢ່າງຫລວງຫລາຍສົມຄວນ. ການທີ່ລັດຖະບານໄທໄດ້ມີນະໂຍບາຍເປີດປະເທດກໍເພື່ອກະຕຸ້ນ ແລະ ຟື້ນຟູເສດຖະກິດທີ່ພວມໄດ້ຮັບຜົນກະທົບຈາກໂຄວິດ-19 ໄລຍະຫລາຍປີຜ່ານໆມາ.

ຍ້ອນຜົນຂອງການເປີດປະເທດທີ່ໄດ້ກ່າວມານັ້ນ ຈຶ່ງເຮັດໃຫ້ແຮງງານຈາກມຽນມາຈຳນວນ 300 ກວ່າຄົນ ພາກັນເຂົ້າໃຈຜິດວ່າໄທໄດ້ເປີດປະເທດເພື່ອຮັບເອົາແຮງງານເຂົ້າໄປເຮັດວຽກໄດ້ແລ້ວ ຈຶ່ງພາກັນລັກລອບເຂົ້າໄທໂດຍຜ່ານນາຍໜ້າອັນເປັນເຫດໃຫ້ເຈົ້າໜ້າທີ່ຈັບຕົວໄດ້ແລ້ວຖືກປັບໄໝຜູ້ລະ 25.000 ບາດ ພ້ອມຖືກສົ່ງກັບຄືນປະເທດໃນສະຖານເຂົ້າເມືອງຜິດກົດໝາຍ. ສ່ວນແຮງງານລາວເຮົາກໍມີຈຳນວນໜ້ອຍໜຶ່ງບໍ່ທັນເຂົ້າໃຈ ທັງບໍ່ສົນໃຈຕິດຕາມຂໍ້ມູນຂ່າວສານຈຶ່ງພາກັນລັກເຂົ້າໄປໄທ ໂດຍຜ່ານນາຍໜ້າ. ດັ່ງວັນທີ 18 ພະຈິກ 2021 ຜ່ານມາ, ທາງເຈົ້າໜ້າທີ່ຊາຍແດນໄທ-ລາວ ອຳເພີເຂັມມະລາດ ໄດ້ກວດຢຶດລົດ 2 ຄັນມີແຮງງານລາວ 8 ຄົນກຳລັງເດີນທາງຈະເຂົ້າໄປກຸງເທບ ແຕ່ຖືກເຈົ້າໜ້າທີ່ຈັບຕົວໄດ້ກ່ອນ ແລະ ຈະຖືກດຳເນີນຄະດີຕາມກົດໝາຍ. ນີ້ຄືເຫດການຕົວຈິງທີ່ແຮງງານລາວເຮົາຄວນຫລີກເວັ້ນ ແລະ ນຳເອົາມາເປັນບົດຮຽນກ່ອນຈະເຂົ້າໄປເຮັດວຽກຢູ່ປະເທດໄທ ເພາະໃນຂັ້ນຕໍ່ໄປນີ້ ການໄປເຮັດວຽກຢູ່ໄທແມ່ນໄປແບບທຳມະຊາດ, ໄປແບບຄົນຮັກແພງລື້ງເຄີຍ, ຍາດຕິພີ່ນ້ອງ ຫລື ໄປແບບຜິດກົດໝາຍ ເພິ່ນບໍ່ອະນຸຍາດອີກແລ້ວ. ຖ້າຜູ້ໃດຝ່າຝືນຈະຖືກເຈົ້າໜ້າທີ່ເພິ່ນຈັບໄດ້ໄລ່ທັນແມ່ນຈະຖືກປັບໄໝໃສ່ໂທດດັ່ງຕົວຢ່າງທີ່ຜ່ານມາ.

ໄປພ້ອມໆກັນນັ້ນ ແຮງງານລາວທີ່ຍັງຄ້າງຄາຍັງເຮັດວຽກຢູ່ໄທ ທາງການໄທກໍມີນະໂຍບາຍພິເສດ ໂດຍໃຫ້ສືບຕໍ່ເຮັດວຽກຢູ່ໄທ ນັບທັງແຮງງານມຽນມາ ແລະ ກຳປູເຈຍ ແຕ່ທຸກສິ່ງຢ່າງຕ້ອງໄດ້ປະຕິບັດຕາມຂັ້ນຕອນຂໍ້ກຳນົດ ແລະ ກົດໝາຍຂອງປະເທດໄທໄດ້ວາງອອກ.

ຄືດັ່ງທີ່ຮູ້ກັນແລ້ວວ່າ, ນັບແຕ່ມີການລະບາດພະຍາດໂຄວິດ-19 ເປັນຕົ້ນມາ ປະເທດໄທໄດ້ຂາດເຂີນແຮງງານເຖິງ 3 ແສນຫາ 4 ແສນຄົນ ຍ້ອນແຮງງານໃນ 3 ປະເທດໄດ້ພາກັນກັບຄືນບ້ານເກີດຈຳນວນຫລາຍແສນຄົນ ເຮັດໃຫ້ປະເທດໄທເກີດວິກິດການດ້ານນີ້ຢ່າງຫລວງຫລາຍພາຍມາກ.

ເຖິງຢ່າງໃດກໍດີ, ສຳລັບແຮງງານລາວເຮົາແລ້ວ ໃນຂັ້ນຕໍ່ໄປນີ້ ຖ້າຜູ້ໃດຕ້ອງການໄປກໍຄວນປະຕິບັດຕາມຂັ້ນຕອນຂອງກົດໝາຍລະຫວ່າງ 2 ປະເທດ ເຊິ່ງປັດຈຸບັນນີ້ ທາງການລາວ ໂດຍສະເພາະກະຊວງແຮງງານ ແລະ ສະຫວັດດີການສັງຄົມ ພວມຄົ້ນຄວ້າຫາວິທີທາງອອກ ທັງປະສານງານໄປຍັງທາງການໄທເພື່ອເອກະພາບທາງດ້ານການຈັດຕັ້ງປະຕິບັດລະຫວ່າງສອງຝ່າຍ ເພື່ອຫລີກລ່ຽງບັນຫາຕ່າງໆອັນບໍ່ດີທີ່ອາດຈະເກີດຂຶ້ນຕໍ່ແຮງງານລາວໃນທຸກກໍລະນີບໍ່ໃຫ້ຕົກເປັນເຫຍື່ອຈາກພວກສວຍໂອກາດນັ້ນຢ່າງເດັດຂາດ.