ເສີມສ້າງສຸຂະພາບທີ່ດີດ້ວຍສີຂຽວ

  ເມື່ອເວົ້າເຖິງສີຂຽວ ຫລາຍທ່ານອາດຄິດເຖິງຜັກຂຶ້ນມາທັນທີ ແນ່ນອນວ່າຜັກສີຂຽວເຂັ້ມນັ້ນມີສານຄລໍໂຣຟິນທ່ີມີສັບພະຄຸນຕ້ານອະນຸມູນອິດສະລະ ແລະ ຍັງມີສານອື່ນໆ ເຊັ່ນ : ເບຕ້າແຄໂຣທິນ, ແຄຣທີນອຍກຸ່ມລູທີນ, ໄທໂອໄຊຍາເນດ, ຟລາໂວນອຍ ແລະ ອຸດົມໄປດ້ວຍກາກໄຍທີ່ຈະຊ່ວຍໃນເລື່ອງການຂັບຖ່າຍນຳອີກ.

ຜັກກາດຂຽວມີສານອາຫານຫລາຍ ໂດຍສະເພາະເບຕ້າແຄໂຣທີນທີ່ຈະປ່ຽນເປັນວິຕາມິນອາໃຫ້ແກ່ຮ່າງກາຍ ເຮັດໃຫ້ປ້ອງກັນພະຍາດກ່ຽວກັບຕາ ເຊັ່ນ : ຕາຟາງ, ຕາບອດກາງຄືນ ຫລື ຕາຕໍ້ຊະນິດຕ່າງໆໃນຜູ້ເຖົ້າໄດ້. ນອກຈາກນີ້, ໃນແກ່ນຂອງຜັກກາດຂຽວຍັງມີສັບພະຄຸນທາງຢາ, ມີກິ່ນຂິວ, ຊ່ວຍໄລ່ລົມໃນກະເພາະອາຫານ,  ປິ່ນປົວໄຂ້ຫວັດ ຕະຫລອດຮອດຊ່ວຍຍ່ອຍອາຫານ ເຮັດໃຫ້ບໍ່ຍຶ່ງທ້ອງ ທັງໃນນ້ຳມັນທີ່ສະກັດຈາກແກ່ນຜັກກາດຂຽວຍັງມີສັບພະຄຸນຊ່ວຍແກ້ປວດ, ແກ້ແພ້ອາກາດ ຫລື ຫລຸດຜ່ອນອາການຄັນໄດ້ນຳ.

ສ່ວນຖ້າເວົ້າເຖິງໝາກໄມ້ນັ້ນ ໝາກແອັບເປິ້ນຂຽວເປັນໝາກໄມ້ລົດຊາດສົ້ມຫວານທີ່ໃຫ້ສານອາຫານຈຳພວກຄາໂບໄຮເດຣດແລະ ວິຕາມິນເຊຫລາຍ ເຊິ່ງໝາກແອັບເປິ້ນຂຽວຈະໃຫ້ພະລັງງານ 59 ກາລໍຣີ ພະລັງງານທີ່ໄດ້ຈາກໝາກແອັບເປິ້ນຂຽວມີລັກສະນະພິເສດຄືໃຫ້ພະລັງງານອ່າວຕໍ່າ ແລະ ຄ່ອຍເປັນຄ່ອຍໄປ ເພາະແຫ່ລງພະລັງງານທີ່ສຳຄັນແມ່ນນ້ຳຕານຟລຸກໂຕສ ເຊິ່ງເປັນນ້ຳຕານທີ່ປ່ຽນຮູບເປັນພະລັງງານຢ່າງຊ້າໆ ຊ່ວຍໃຫ້ບໍ່ຮູ້ສຶກຫິວ, ອີ່ມດົນ. ນອກຈາກນີ້, ຢູ່ເປືອກ ແລະ ຊີ້ນຂອງໝາກ ແອັບເປິ້ນຂຽວມີເສັ້ນໄຍອາຫານທີ່ຊື່ວ່າ : ເພັກຕິນທີີ່ມີສັບພະຄຸນໃຄ່ໂພງຂຶ້ນໄດ້ຫລາຍ ຊ່ວຍເພີ່ມກາກໄຍໃນທໍ່ອາຫານ ເຮັດໃຫ້ອະໄວຍະວະໃນທໍ່ອາຫານເຮັດວຽກເປັນປົກກະຕິ ເພີ່ມປະສິດທິພາບໃນການຂັບຖ່າຍ ແລະ ຍັງຊ່ວຍຈັບຄໍເລສເຕີໂຣນບໍ່ໃຫ້ຖືກດູດຊຶມເຂົ້າສູ່ຮ່າງກາຍນຳອີກ.

ສີມີອິດທິພົນຕໍ່ຈິດວິນຍານ ເຊິ່ງເພິ່ນສຶກສາ ແລະ ສັງເກດເຫັນວ່າຄົນສ່ວນຫລາຍຮູ້ສຶກຫ້າວຫັນໃນການໃຊ້ຊີວິດ ໂດຍສີໃຫ້ບັນຍາກາດທີ່ຈົບງາມສົດໃສ ເຊັ່ນ : ແສງສີເຫລືອງຂອງດວງຕາເວັນ, ສີຂຽວຂອງນ້ຳທະເລ ມັກເຮັດໃຫ້ເຮົາຮູ້ສຶກອົບອຸ່ນ ແລະ ເປັນສຸກ.

ດັ່ງນັ້ນ, ຈຶ່ງຖືວ່າສີມີອິດທິພົນຕໍ່ມະນຸດ ແລະ ອາດນຳມາປະຍຸກໃຊ້ໃນຮູບແບບຕ່າງໆກັນ ເຊັ່ນ : ນຳໄປໃຊ້ປະໂຫຍດໃນດ້ານບຳບັດເພື່ອປິ່ນປົວອາການທາງກາຍ ຫລື ທາງຈິດໄດ້ນຳ. ວຽກງານວິໄຈຕີພິມໃນວາລະສານ  Personality and Social Psychology ພົບວ່າ : ເມື່ອທ່ານແນມເບິ່ງສີຂຽວຢ່າງໜ້ອຍ 2 ວິນາທີກ່ອນຈະເຮັດພາລະກິດທີ່ຕ້ອງໃຊ້ຄວາມຄິດໃນດ້ານສ້າງສັນ ຈະຊ່ວຍໃຫ້ເຮົາເກີດຄວາມຄິດດີໆໃນດ້ານບວກງ່າຍກ່ວາແນມເບິ່ງສີອື່ນໆ ລວມທັງສີຂາວ, ສີຂີ້ເຖົ່າ, ສີແດງ ແລະ ສີຟ້າ ກໍຊ່ວຍໄດ້ຄືກັນ. ໂດຍການສຶກສານີ້ລະບຸວ່າ : ສີຂຽວອາດມີຜົນຕໍ່ຄວາມຄິດສ້າງສັນ ເພາະມັນເປັນສີທີ່ສະແດງເຖິງການຈະເລີນເຕີບໃຫຍ່ ທັງທາງກາຍະພາບ ແລະ ທາງຈິດໃຈ. ແນວໃດກໍຕາມ, ສີຂຽວນີ້ໝາຍເຖິງຂຽວຈາກຕົ້ນໄມ້ໃບຫຍ້າເທົ່ານັ້ນຍັງບໍ່ມີການສຶກສາຕື່ມວ່າສີຂຽວແບບອື່ນໆຈະຊ່ວຍໃນເລື່ອງຄວາມຄິດສ້າງສັນຫລືບໍ່, ແຕ່ການລົງທຶນຊື້ຕົ້ນໄມ້ມານັ່ງເບິ່ງແດ່ກໍບໍ່່ເສຍຫາຍຫຍັງ.