ສປປ ລາວ ເປັນ 1 ໃນ 105 ປະເທດ ທີ່ຈະໄດ້ສູດຜະລິດຢາ ໂມລນູພິຣາເວຍ ແລະ ຈະຜະລິດໃນເດືອນທັນວານີ້
ໜັງສືພິມ Vientiane Times ລາຍງານວ່າ: ກະຊວງສາທາລະນະສຸກ ອະນຸມັດໃຫ້ລັດວິສາຫະກິດ ໂຮງງານຜະລິດຢາເລກ 3 ຜະລິດຢາ ໂມນນູພິຣາເວຍ ເຊິ່ງເປັນຢາເມັດ ເພື່ອໃຊ້ປິ່ນປົວພະຍາດໂຄວິດ-19.
ວັນທີ 18 ພະຈິກ 2021 ຜ່ານມານີ້ ທ່ານ ພູໂຂງ ໂຈມມາລາ ຮອງຜູ້ນຳນວຍການລັດວິສາຫະກິດ ໂຮງງານຜະລິດຢາເລກ 3 ໃຫ້ສຳພາດກັບ Vientiane Times ວ່າ: ອົງການບໍລິຫານສິດທິບັດຢາຮ່ວມ ຈະໃຫ້ສູດການຜະລິດຢາໂມນນູພິຣາເວຍ ໄດ້ມີຂໍ້ຕົກລົງອະນຸຍາດໃຫ້ປະເທດທີ່ມີລາຍໄດ້ປານກາງ ແລະ ລາຍໄດ້ຕຳ່ ລວມ 105 ປະເທດໃນອາຟຣິກາ ແລະ ອາຊີ ເຊິ່ງປະເທດໃນອາຊຽນໃນລາຍຊື່ປະກອບມີ: ສປປ ລາວ, ມຽນມາ, ກຳປູເຈຍ, ຫວຽດນາມ, ຟິລິບປິນ ແລະ ອິນໂດເນເຊຍ.
ອົງການບໍລິຫານສິດທິບັດຢາຮ່ວມ ຈະໃຫ້ສູດການຜະລິດຢາໂມນນູພິຣາເວຍ ແກ່ບໍລິສັດຜູ້ຜະລິດທີ່ມີຄຸນສົມບັດເໝາະສົມ ໂດຍ Merck ຈະບໍ່ເກັບຄ່າຕອບແທນ ຍາມໃດທີ່ໂຄວິດ-19 ຍັງເປັນພາວະສຸກເສີນດ້ານສາທາລະນະສຸກລະຫວ່າງປະເທດ.
ດັ່ງນັ້ນ, ພວກເຮົາຄາດຫວັງວ່າຈະສາມາດສະໜອງຢານີ້ໃນເບື້ອງຕົ້ນ ໃຫ້ກັບຜູ້ຕິດເຊື້ອໂຄວິດ-19 ຈຳນວນ 1.000 ຄົນ
ພາຍໃຕ້ໂຄງການເລີ່ມຕົ້ນຜະລິດ ເຊິ່ງໂຄງການດັ່ງກ່າວຈະໄດ້ຮັບການກວດສອບໂດຍອົງການອະນາໄມໂລກ ແລະ ຈະເລີ່ມຕົ້ນຜະລິດຢານີ້ ໄດ້ກຳນົດເອົາຜູ້ຕິດເຊື້ອທີ່ມີອາຍຸລະຫວ່າງ 18-65 ປີ
ກຸ່ມເປົ້າໝາຍແມ່ນ:
1. ເປັນຜູ້ທີ່ມີອາການເບົາບາງ ຫາ ປານກາງ ແລະ ຢູ່ໃນໄລຍະເລີ່ມຕົ້ນຂອງການຕິດເຊື້ອ,
2. ຕ້ອງບໍ່ມີອາການປອດບວມ ຫຼື ຂາດອົກຊີແຊນ ໂດຍຈະໄດ້ກິນຢາເປັນເວລາ 5 ວັນ.
3. ຢາໂມນນູພິຣາເວຍ (Molnupiravir) ເປັນຢາເມັດຊະນິດກິນ ອອກລິດຕ້ານໄວຣັສ
ສ່ວນດ້ານລາຄາຍັງບໍ່ທັນມີຂໍ້ມູນຊັດເຈນ
