ແມນເຊັສເຕີ ຢູໄນເຕັດ ປົດ Ole Gunnar Solskjaer ອອກຈາກຕໍາແໜ່ງຜູ້ຈັດການທີມ ຫຼັງຈາກນັດທີ່ເສຍໃຫ້ ວັດຟອດ 1-4
ຄືນວັນທີ 20 ພະຈິກ 2021 ແມນເຊັສເຕີ ຢູໄນເຕັດ ໄດ້ຄະນະບໍລິຫານງານໄດ້ປະຊຸມສຸກເສີນແບບເຄັ່ງຕຶງ 5 ຊົ່ວໂມງ ກ່ອນການຕັດສິນໃຈເດັດຂາດປົດ Ole Gunnar Solskjaer ອອກຈາກຕໍາແໜ່ງຜູ້ຈັດການທີມ ຫຼັງຈາກນັດທີ່ເສຍໃຫ້ ວັດຟອດ 1-4 .
ຫລັງຈາກເກມ Vicarage Road ສິ້ນສຸດລົງ, ໂຊລຊາ ໄດ້ຍ່າງໄປຂອບໃຈແຟນບານທີ່ມາເຊຍສົ່ງກໍາລັງໃຈໃຫ້ ແມນຢູ ແລະ ສະແດງທ່າທີ່ຂໍໂທດຕໍ່ຜົນງານຂອງທີມທີເສຍເຖິງ 4 ຈາກ 5 ເກມຫລັງສຸດ. ແຕ່ໃນການຖະແຫລງຂ່າວຫລັງເກມໄດ້ຢືນຢັນວ່າ ລາວຍັງເຊື່ອວ່າ ຈະສາມາດແກ້ໄຂສະຖານະການຂອງທີມໃຫ້ກັບມາໄດ້ອີກຄັ້ງ.
ໂຊລຊາ ກ່າວວ່າ “ຂ້ອຍເຊື່ອໃນຕົວເອງສະເໝີ, ແນ່ນອນໃນເວລານີ້ ແມ່ນເວລາທີ່ຫຍຸ້ງຍາກສຳລັບພວກເຮົາ. ຂ້ອຍເຊື່ອທຸກຄົນທີ່ຂ້ອຍສົ່ງລົງໄປສະໜາມ ແລະ ພວກເຂົາເຈົ້າກໍ່ພະຍາຍາມເຮັດເຕັມທີ່ແລ້ວ. ທີມງານທຸກຄົນກໍ່ເຮັດໄດ້ຢ່າງດີເລີດ, ພຽງແຕ່ຜົນການແຂ່ງຂັນມັນບໍ່ດີ ຂ້ອຍເຊື່ອວ່າພວກເຮົາຈະສາມາດປ່ຽນທຸກຢ່າງກັບມາໄດ້. ຢ່າງໃດກໍຕາມ, ຄະນະບໍລິຫານຂອງແມນຢູ ໄດ້ມີການຮຽກປະຊຸມດ່ວນທັນທີ ຫລັງຈົບເກມການແຂ່ງຂັນ.
ກອງປະຊຸມໄດ້ດຳເນີນໄປເປັນເວລາຍາວ ໂດຍມີການລາຍງານຄວາມຄືບໜ້າເປັນໄລຍະ. ເຖິງແມ່ນວ່າໃນເບື້ອງຕົ້ນມີທ່າອ່ຽງວ່າບໍ່ມີການສະຫລຸບກ່ຽວກັບອະນາຄົດຂອງ ໂຊລຊາ. ແຕ່ຫລ້າສຸດ, ສື່ໃນປະເທດອັງກິດລາຍງານວ່າຄະນະກໍາມະການຕັດສິນໃຈປົດ ໂຊລຊາ ອອກຈາກຕໍາແໜ່ງ.
ເຊິ່ງເຫລືອພຽງຂັ້ນຕອນການຕົກລົງເງິນຊົດເຊີຍ ແລະ ການຂຽນຂໍ້ຕົກລົງກັບ ໂຊລຊາ ເພື່ອຈະເປັນການຕົກລົງກັນແຍກທາງ ແລະ ເມື່ອສາມາດບັນລຸຂໍ້ຕົກລົງກັນແລ້ວ ຈະໄດ້ມີການອອກຖະແຫຼງການຢ່າງເປັນທາງການ. ໃນເວລານີ້, Michael Carrick ແລະ Darren ເຟລດເຊີ ຈະເຂົ້າຮັບຕຳແໜ່ງຜູ້ການຈັດການທີມຊົ່ວຄາວ ໃນຂະນະທີ່ລໍຖ້າຜູ້ຈັດການຄົນໃໝ່ໃນອະນາຄົດຍັງບໍ່ທັນໄດ້ກໍານົດ, ແຕ່ The Times ລາຍງານວ່າ Zinedine Zidane ຄືຄົນທີ່ຄະນະຜູ້ບໍລິຫານແມນຢູ ຕ້ອງການ ແລະ ກຳລັງເລັ່ງເຈລະຈາ.
