ຄາມາລາ ແຮຣີສ ເປັນຜູ້ຍິງຄົນທຳອິດຂອງສະຫະລັດອາເມລິກາ ທີ່ໄດ້ອຳນາດປະທານາທິບໍດີ ເປັນການຊົ່ວຄາວ

ສຳນັກຂ່າວ ຊີເອັນເອັນ ລາຍງານວ່າ: ນາງ ເຈນ ຊາຄີ ເລຂາທິການຝ່າຍສື່ຂອງທຳນຽບຂາວບອກກັບຜູ້ສື່ຂ່າວໃນວັນທີ 19 ພະຈິກ 2021 ນີ້ ວ່າ ປະທານາທິບໍດີ ໂຈ ໄບເດັນ ຈະມອບອຳນາດຂອງຕົນໃຫ້ແກ່ຮອງປະທານາທິບໍດີ ຄາມາລາ ແຮຣີສ ເປັນການຊົ່ວຄາວ, ໃນຂະນະທີ່ຕົນເອງເຂົ້າຮັບການກວດລຳໄສ້ໃຫຍ່ດ້ວຍການສ່ອງກ້ອງ ເຊິ່ງຈຳເປັນຕ້ອງໄດ້ດົມຢາສະຫລົບ. ໂດຍໃຫ້ ຮອງປະທານາທິບໍດີ ຄາມາລາ ແຮຣີສໄດ້ຄອງອຳນາດປະທານາທິບໍດີຂອງສະຫະລັດອາເມລິກາ ເປັນເວລາປະມານ 85 ນາທີ.

ທັງນີ້ແມ່ນ ໂຈ ໄບເດັນເດີນທາງໄປຮອດສູນການແພດ ວໍເຕີີຣີສ ໃນຊ່ວງເຊົ້າວັນທີ 19 ພະຈິກນີ້ ເພື່ອເຈົ້າຮັບການກວດຮ່າງກາຍປະຈຳປີສຳລັບປະທານາທິບໍດີ, ເຊິ່ງຖືເປັນຄັ້ງທຳອິດຂອງ ໄບເດັນ ໃນຖານະປະທານາທິບໍດີ ຂອງສະຫະລັດ ສະໄໝທຳອິດທີ່ອາຍຸຫລາຍທີ່ສຸດໃນປະຫວັດສາດ ແລະ ເປັນເລື່ອງປົກກະຕິທີ່ຮອງປະທານາທິບໍດີຈະໄດ້ຮັບອຳນາດຂອງປະທານາທິບໍດີເປັນການຊົ່ວຄາວ.