ເຈົ້າໜ້າທີ່ ສາມາດຄວບຄຸມໄຟໄໝ້ ສາງເກັບມ້ຽນເຄື່ອງ ຢູ່ບ້ານປາກທ້າງ ໂດຍໃຊ້ເວລາ 20 ນາທີ ສ່ວນສາເຫດ ແລະ ຜົນເສຍຫາຍ ພວມເກັບກໍາສອບສວນ

ທ່ານ ພັທ ຄໍາເພັດ ດາລາວົງ ຫົວໜ້າພະແນກຕໍາຫລວດສະກັດກັ້ນ ແລະ ຕ້ານອັກຄີໄພ ນະຄອນຫລວງວຽງຈັນ ໃຫ້ຮູ້ວ່າ: ພາຍຫລັງໄດ້ຮັບແຈ້ງໃນເວລາ 17:30 ໂມງ ຂອງວັນທີ 17 ພະຈິກ 2021, ວ່າເຫດການໄຟໄໝ້ສາງເກັບມ້ຽນເຄື່ອງ ຕັ້ງຢູ່ບ້ານປາກທ້າງ ເມືອງສີໂຄດຕະບອງນະຄອນຫລວງວຽງຈັນ ກໍໄດ້ລົງໄປສະຖານທີ່ເກີດເຫດ ເຊິ່ງໄດ້ໃຊ້ລົດມອດໄຟ 1 ຄັນ ແລະ ກໍາລັງ 6 ສະຫາຍ ເຂົ້າຄວບຄຸມອັກຄີໄພເກີດຂຶ້ນໄດ້ ພາຍໃນເວລາ 20 ນາທີ.

ຜ່ານການເກັບກໍາຂໍ້ມູນຂອງເຈົ້າໜ້າທີ່ ຫລັງເກີດເຫດ ຮູ້ວ່າ: ສາງທີ່ຖືກໄຟໄໝ້ນັ້ນ ເປັນຂອງ ທ້າວ ສີປະເສີດ ອາຍຸ 50 ປີ ອາຊີບ ນັກທຸລະກິດ, ປັດຈຸບັນ ຢູ່ ບ້ານປາກທ້າງ ເຊິ່ງສາງດັ່ງກ່າວ, ມີລັກສະນະ ຊັ້ນດຽວ, ມຸງ ແລະ ແອ້ມດ້ວຍອາລູຊິງ, ມີ 8 ຫ້ອງ ຜົນເສຍຫາຍ ແມ່ນໄໝ້ 2 ຫ້ອງ ທີ່ມີເຄື່ອງສຽງ ແລະ ອຸປະກອນດົນຕີຄົບຊຸດ ຖືກໄໝ້ໝົດ ສ່ວນມູນຄ່າເສຍຫາຍທັງໝົດ ແລະ ສາເຫດທີ່ພາໃຫ້ເກີດອັກຄີໄພ ຄັ້ງນີ້ ແມ່ນຢູ່ໃນຂັ້ນຕອນ ເກັບກໍາຂໍ້ມູນຂອງເຈົ້າໜ້າທີ່.

ຈາກເຫດການດັ່ງກ່າວ, ກອງບັນຊາການ ປກສ ນວ ຮຽກຮ້ອງ ມາຍັງທຸກຄົນໃນສັງຄົມ ໃຫ້ມີສະຕິນໍາໃຊ້ໄຟ ບໍ່ວ່າຈະເປັນໄຟຟ້າ ຫລື ໄຟແຕ່ງກິນ ຖ້ານໍາໃຊ້ແລ້ວກໍໄຫ້ດັບມອດຄັກແນ່ ພ້ອມທັງກວດກາຄືນສາຍໄຟຟ້າທີ່ໃຊ້ຢູ່ພາຍໃນເຮືອນ ຫາກເຫັນວ່າເກົ່າ ແລະ ໃຊ້ມາດົນແລ້ວ ກໍ່ໃຫ້ປ່ຽນຖ່າຍ ເພື່ອຫລີກລ່ຽງບໍ່ໃຫ້ເກີດໄຟຟ້າລັດວົງຈອນ ເພາະເປັນສາເຫດໜຶ່ງທີ່ພາໃຫ້ເກີດອັກຄີໄພ.