ກົດໝາຍທີ່ສະພາຮັບຮອງແລ້ວ ຄວນນຳເຂົ້າສູ່ຊີວິດຈິງຂອງສັງຄົມ ໃຫ້ຫລາຍຂຶ້ນ

ໃນການຖະແຫລງຂ່າວ ຜົນສຳເລັດການພິ ຈາລະນາ ແລະຮັບຮອງເອົາ ຮ່າງກົດໝາຍ ສ້າງໝ່ ແລະ ປັບປຸງ ໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດຊຸດທີ IX ວັນທີ 16 ພະຈິກ 2021 ຜ່ານມາ, ທ່ານ ຈະເລີນ ເຢຍປາວເຮີ ຮອງປະ ທານສະພາແຫ່ງຊາດ, ປະທານກຳມາທິການກົດໝາຍ ໄດ້ຢ້ຳວ່າ : ການຮັບຮອງເອົາກົດໝາຍ 11 ສະ ບັບໃນເທື່ອນີ້ ເປັນພຽງຜົນສຳເລັດເບື້ອງຕົ້ນໃນການ ປະຕິບັດແຜນການສ້າງ ແລະ ປັບປຸງກົດໝາຍ 5 ປີ ຕໍ່ໜ້າເທົ່ານັ້ນ, ແຕ່ສິ່ງສຳຄັນພາກລັດ ຕ້ອງນຳເອົາ ກົດໝາຍເຫລົ່ານັ້ນ ເຂົ້າສູ່ຊີວິດຕົວຈິງຂອງສັງຄົມ ໃຫ້ຫລາຍຂຶ້ນກວ່າເກົ່າ ເຮັດໃຫ້ກາຍເປັນສະຕິຕື່ນ ຕົວເຄົາລົບ ແລະ ປະຕິບັດຂອງພະນັກງານ, ສະມາ ຊິກພັກ, ລັດຖະກອນ, ທະຫານ, ຕຳຫລວດ, ກຳມະກອນ, ກະສິກອນ, ນັກຮຽນ ຮູ້ປັນຍາຊົນ, ນັກທຸລະກິດທັງພາກລັດ ແລະ ເອກະຊົນ, ລວມທັງພົນລະ ເມືອງລາວທຸກຄົນ ທັງຜູ້ບໍ່ມີສັນຊາດ ແລະ ຊາວຕ່າງ ດ້າວ ທີ່ດຳລົງຊີວິດຢູ່ ສປປ ລາວ.

ດັ່ງນັ້ນ, ຈຶ່ງສະເໜີໄປຍັງບັນດາກະຊວງ, ອົງການທີ່ເປັນເຈົ້າຂອງກົດໝາຍຈົ່ງເອົາໃຈໃສ່ໂຄສະນາ, ເຜີຍແຜ່ກົດໝາຍເຫລົ່ານັ້ນໃຫ້ພົນລະເມືອງທຸກຄົນ, ທຸກ ຊັ້ນຄົນ, ຊົນເຜົ່າ, ສາສະໜາ ແລະ ທຸກ ການຈັດຕັ້ງ ຮັບຮູ້ເຂົ້າໃຈຢ່າງເລິກເຊິ່ງ ແລະ ທົ່ວເຖິງ, ເພື່ອພ້ອມ ກັນເປັນເຈົ້າໃນການເຄົາລົບ ແລະ ປະຕິບັດຢ່າງເຂັ້ມ ງວດ. ພ້ອມນີ້, ສະເໜີໃຫ້ທຸກກະຊວງ, ອົງການ ໃຫ້ ຮີບຮ້ອນສືບຕໍ່ຄົ້ນຄວ້າສ້າງ ແລະ ປັບປຸງກົດໝາຍ ປະຈຳປີ 2022 ເພື່ອນຳສະເໜີຜ່ານກອງປະຊຸມສະ ໄໝສາມັນ ເທື່ອທີ 3 ແລະ 4 ຂອງສະພາແຫ່ງຊາດ ຊຸດທີ IX ໃຫ້ຮັບປະກັນຄຸນນະພາບ ແລະ ທັນຕາມ ກຳນົດເວລາ.

ທ່ານ ຈະເລີນ ເຢຍປາວເຮີ ຍັງຮຽກຮ້ອງໄປຍັງ ປະຊາຊົນລາວບັນດາເຜົ່າທຸກຖ້ວນໜ້າ ຈົ່ງຍົກສູງນ້ຳ ໃຈຮັກຊາດ, ນ້ຳໃຈເປັນເຈົ້າຂອງປະເທດຊາດ, ຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ, ເພີ່ມທະວີຄວາມສາມັກຄີເປັນປຶກແຜ່ນພາຍໃນຊາດ ເພື່ອພ້ອມກັນສືບຕໍ່ປະກອບສ່ວນ ຢ່າງສົມກຽດ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ໃຫ້ຈະເລີນວັດທະນາຖາວອນ, ເຮັດໃຫ້ປະຊາຊົນລາວບັນດາເຜົ່າຢູ່ເຢັນເປັນສຸກຕະຫລອດໄປ.

ຮ່າງກົດໝາຍ 11 ສະບັບ ທີ່ຖືກສະພາແຫ່ງຊາດ ຮັບຮອງໃນຄັ້ງນີ ປະກອບມີກົດຫມາຍປັບປຸງ 7 ສະ ບັບ ຄື: ຮ່າງກົດໝາຍວ່າດ້ວຍງົບປະມານແຫ່ງລັດ, ຮ່າງກົດໝາຍວ່າດ້ວຍໂທລະຄົມມະນາຄົມ, ຮ່າງກົດໝາຍວ່າດ້ວຍການສ້າງນິຕິກຳ, ຮ່າງກົດໝາຍ ວ່າດ້ວຍ ການຄວບຄຸມຢາສູບ, ຮ່າງກົດໝາຍວ່າ ດ້ວຍລັດຖະບານ, ຮ່າງກົດຫມາຍວ່າດ້ວຍມໍຣະດົກແຫ່ງຊາດ ແລະ ຮ່າງກົດຫມາຍວ່າດ້ວຍຄຳຕັດສິນ ຂອງສານ. ສ່ວນສ້າງໃຫມ່ ມີ 4 ສະບັບ ຄື: ຮ່າງກົດໝາຍວ່າດ້ວຍຍານພາຫະນະທາງບົດ, ຮ່າງກົດໝາຍວ່າດ້ວຍການສຳຫລວດວັດແທກ ແລະ ສ້າງ ແຜນທີ່, ຮ່າງກົດໝາຍ ວ່າດ້ວຍເຕັກໂນໂລຊີ ລະດັບສູງ ແລະ ຮ່າງກົດໝາຍ ວ່າດ້ວຍຊາຍແດນແຫ່ງຊາດ. ທັງໝາຍຈະເປັນເຄື່ອງມືອັນສຳຄັນໃນການຄຸ້ມຄອງລັດດ້ວຍກົດໝາຍໃນຕໍ່ຫນ້າ.