ສະພາແຫ່ງຊາດ ຮັບຮອງຮ່າງກົດໝາຍ 11 ສະບັບ ດ້ວຍຄະແນນສຽງເຫັນດີເກີນເຄິ່ງໜຶ່ງຂອງ ສສຊ ທີ່ມີໜ້າໃນສະພາ

ໃນວັນທີ 16 ພະຈິກ 2021, ເປັນມື້ທີ 14 ຂອງການດໍາເນີນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX, ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ. ນັບແຕ່ວັນທີ 9-17, ບັນດາສະມາຊິກສະພາແຫ່ງຊາດ ສສຊ ໄດ້ສຸມໃສ່ຄົ້ນຄວ້າ ປະກອບຄຳເຫັນ ແລະ ລົງຄະແນນສຽງຮັບຮອງເອົາຮ່າງກົດໝາຍຈໍານວນ 11 ສະບັບ ດ້ວຍຄະແນນສຽງເປັນສ່ວນຫລາຍເພື່ອໃຫ້ລັດ ຖະບານນຳໄປຈັດຕັ້ງປະຕິບັດໃຫ້ມີຜົນສັກສິດກວ່າເກົ່າ.

ສໍາລັບຮ່າງກົດໝາຍທີ່ໄດ້ຮັບຮອງນີ້ປະກອບມີ: ຮ່າງກົດໝາຍວ່າດ້ວຍລັດຖະບານ (ປັບປຸງ), ຮ່າງກົດໝາຍວ່າດ້ວຍຍານພາຫະນະທາງບົກ (ສ້າງໃໝ່), ຮ່າງກົດໝາຍວ່າດ້ວຍໂທລະຄົມມະນາຄົມ (ປັບປຸງ), ຮ່າງກົດໝາຍວ່າດ້ວຍການສໍາຫລວດວັດແທກ ແລະ ສ້າງແຜນທີ່ (ສ້າງໃໝ່), ຮ່າງກົດໝາຍວ່າດ້ວຍການສ້າງນິ ຕິກໍາ (ປັບປຸງ), ຮ່າງກົດໝາຍວ່າດ້ວຍການຄວບຄຸມ ຢາສູບ (ປັບປຸງ), ຮ່າງກົດໝາຍວ່າດ້ວຍເຕັກໂນໂລຊີລະດັບສູງ (ສ້າງໃໝ່), ຮ່າງກົດໝາຍວ່າດ້ວຍຊາຍແດນແຫ່ງຊາດ (ສ້າງໃໝ່), ຮ່າງກົດໝາຍວ່າດ້ວຍງົບປະມານແຫ່ງລັດ (ປັບປຸງ), ຮ່າງກົດໝາຍວ່າດ້ວຍມໍຣະດົກ ແຫ່ງຊາດ (ປັບປຸງ) ແລະ ຮ່າງກົດໝາຍວ່າດ້ວຍການປະຕິບັດຄໍາຕັດສິນຂອງສານ (ປັບປຸງ).

ໃນໂອກາດນີ້, ທ່ານ ຈະເລີນ ເຢຍປາວເຮີ ຮອງ ປະທານສະພາແຫ່ງຊາດ, ປະທານກຳມາທິການກົດຫມາຍ ໄດ້ຖະແຫລງກ່ຽວກັບຜົນການພິຈາລະນາ ແລະ ຮັບຮອງເອົາ ກົດໝາຍທັງ 11 ສະບັບ ໂດຍຊີ້ໃຫ້ເຫັນວ່າບັນດາ ສສຊ ມີຄວາມຮັບຜິດຊອບສູງ. ເຖິງວ່າການພິຈາລະນາຈະມີເວລາສັ້ນ, ເນື້ອໃນຂອງກົດໝາຍແມ່ນກວ້າງຂວາງ, ເລິກເຊິ່ງ ແລະ ມີການ ພົວພັນກັບຫລາຍບັນຫາສຳຄັນອື່ນໆ. ພ້ອມນີ້, ກອງ ປະຊຸມກໍມີຄວາມສ່ຽງສູງຕໍ່ຜົນກະທົບຂອງພະຍາດ ໂຄວິດ-19, ແຕ່ດ້ວຍຄວາມຕັດສິນໃຈ ແລະ ເປັນເອກະພາບສູງຂອງຄະນະປະທານກອງປະຊຸມ ກໍຄືຄວາມຮັບຜິດຊອບສູງຂອງບັນດາສະມາຊິກສະພາແຫ່ງຊາດແລະຄວາມເປັນເຈົ້າການຂອງຄະນະຮັບຜິດຊອບສ້າງ ແລະປັບປຸງກົດໝາຍກໍຄືພະນັກງານວິຊາການທີ່ກ່ຽວ ຂ້ອງທຸກທ່ານ, ຈຶ່ງເຮັດໃຫ້ການພິຈາລະນາ ແລະ ຮັບຮອງເອົາບັນດາກົດໝາຍເຫລົ່ານັ້ນ ສຳເລັດຜົນຢ່າງຈົບງາມຕາມແຜນການກຳນົດໄວ້, ທັງຮັບປະກັນປະສິດທິພາບ ແລະປະສິດທິຜົນເປັນ ຢ່າງດີ. ສິ່ງສຳຄັນແມ່ນບັນດາ ສສຊ ໄດ້ຍຶດໝັ້ນຕໍ່ສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ເພື່ອປະກອບຄໍາເຫັນ ແລະ ລົງຄະແນນສຽງຮັບຮອງເອົາກົດໝາຍເຫລົ່ານັ້ນດ້ວຍຄວາມເປັນເຈົ້າການສູງ.

ທ່ານ ຈະເລີນ ເຢຍປາວເຮີ ຍົກໃຫ້ເຫັນຕື່ມວ່າ: ການຮັບຮອງເອົາກົດໝາຍທັງ 11 ສະບັບ ແມ່ນຜົນ ສຳເລັດທີ່ສຳຄັນໃນການຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີ ຕໍ່ໜ້າຂອງລັດເຮົາທີ່ ກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ໄດ້ຮັບຮອງເອົາໃນທ້າຍເດືອນ ມີນາ 2021 ທີ່ຜ່ານມາ. ຜົນສຳເລັດດັ່ງກ່າວນີ້, ເປັນການ ປະກອບສ່ວນສຳຄັນ ໃນການປັບປຸງ ແລະ ເພີ່ມທະວີ ພາຫະນະ, ເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງປະເທດເຮົາ ໃຫ້ເປັນລະບົບຄົບຊຸດເພື່ອຮັບ ປະກັນການປົກປ້ອງສິດ ແລະ ຜົນປະໂຫຍດ ຂອງ ຊາດ, ຂອງລັດ, ລວມໝູ່ ແລະ ປະຊາຊົນລາວ ບັນດາເຜົ່າ, ສະກັດກັ້ນ ແລະ ຕ້ານ ບັນດາປະກົດ ການຂອງແນວຄິດອິດສະລະເສລີຕາມໃຈຊອບ ທີ່ຢູ່ເໜືອກົດໝາຍ.

ພ້ອມນັ້ນ, ກໍເປັນປັດໄຈຮັບປະກັນໃຫ້ແກ່ການສ້າງລັດປະຊາທິປະໄຕປະຊາຊົນ ໃຫ້ເປັນລັດທີ່ ປົກຄອງດ້ວຍກົດໝາຍຂອງ ປະຊາຊົນ, ໂດຍປະຊາຊົນ ແລະ ເພື່ອປະ ຊາຊົນເທື່ອລະກ້າວ. ທັງຮັບປະກັນໃຫ້ແກ່ການເຊື່ອຈອດ, ເຊື່ອມໂຍງເຂົ້າສູ່ພາກພື້ນ ແລະ ສາກົນຂອງປະເທດເຮົາ.