ເມື່ອຫົວໃຈເຕັ້ນຊ້າກ່ວາປົກກະຕິ
ຫົວໃຈເປັນອະໄວຍະວະທີ່ສຳຄັນ ເຮັດໜ້າທີ່ຟອກເລືອດໄປລ້ຽງອະໄວຍະວະສຳຄັນອື່ນໆເພື່ອໃຫ້ຮ່າງກາຍເຮົາມີຊີວິດຢູ່ໄດ້ ໂດຍການເຮັດວຽກຂອງຫົວໃຈທັງ 4 ຫ້ອງຈະສຳພັນກັນໄດ້ນັ້ນຈຳເປັນຕ້ອງມີລະບົບຄວບຄຸມ ເຊິ່ງກໍຄືລະບົບໄຟຟ້າໃນຫົວໃຈ.
ການບີບໂຕຂອງຫົວໃຈຄົນປົກກະຕິ ເລີ່ມຈາກຫົວໃຈຫ້ອງເທິງ ເຊິ່ງມີແຊນພິເສດຢູ່ຜິວໜັງຫົວໃຈຫ້ອງເທິງເບື້ອງຂວາ ເຮັດໜ້າທີ່ເປັນໂຕກຳນົດຈັງຫວະ ເຊິ່ງແຊນກຸ່ມນີ້ລວມກັນເອີ້ນວ່າ : Sinus node ຈະປ່ອຍກະແສໄຟຟ້າເປັນໄລຍະໆ ປະມານ 60 – 80 ເທື່ອຕໍ່ນາທີ. ຂະນະທີ່ເຮົາພັກຜ່ອນ ໄຟຟ້າທີ່ອອກມາກະຕຸ້ນກ້າມຊີ້ນຫົວໃຈຫ້ອງເທິງໃຫ້ບີບໂຕ ແລ້ວກະແສໄຟຟ້າຈະແລ່ນຜ່ານເນື້ອເຍື່ອ ເຊິ່ງມີຄຸນສົມບັດນຳໄຟຟ້າໄດ້ດີປຽບດັ່ງສາຍໄຟລົງມາກະຕຸ້ນຫົວໃຈຫ້ອງລຸ່ມໃຫ້ບີບໂຕໄປນຳ ເຊິ່ງກ່ອນຈະລົງໄປເຖິງຫົວໃຈຫ້ອງລຸ່ມ ຕ້ອງຜ່ານສະຖານີແປງສັນຍານ AV node ກ່ອນ ແລະ ຢູ່ AV node ມີປາຍປະສາດອັດຕະໂນມັດມາລ້ຽງຫລວງຫລາຍ ເຮັດໜ້າທີ່ປັບປ່ຽນອັດຕາ ແລະ ຄວາມໄວໃນການນຳໄຟຟ້າໃນຫົວໃຈໃຫ້ອັດຕາການເຕັ້ນຂອງຫົວໃຈໂດຍ ລວມເໝາະສົມກັບບຸກຄົນນັ້ນ ຖ້າການເຮັດວຽກຂອງ AV node ຫລື ສາຍໄຟໃນຫົວໃຈຜິດປົກກະຕິ ການນຳໄຟຟ້າຊ້າລົງ ຫລື ນຳບໍ່ໄດ້ເລີຍ ກໍຈະສົ່ງຜົນໃຫ້ຫົວໃຈຫ້ອງເທິງ ແລະ ລຸ່ມເຮັດວຽກບໍ່ສຳພັນກັນ ເກີດອາການຫົວໃຈເຕັ້ນຊ້າ ຫລື AV block.
ສາເຫດຂອງ AV block ມີຫລາຍປະການ ບາງເທື່ອກໍບໍ່ມີອັນຕະລາຍ ເຊັ່ນ : ນັກກິລາທີ່ຝຶກຝົນອອກກຳລັງໜັກ ອາດມີອາການ AV block ອ່ອນໆໄດ້, ແຕ່ຫລາຍເທື່ອກໍເກີດຈາກພະຍາດປະຈຳໂຕຂອງຄົນປ່ວຍ ເຊັ່ນ : ຄວາມເສື່ອມຂອງຮ່າງກາຍ, ຢາບາງຊະນິດ, ພະຍາດຫລອດເລືອດຫົວໃຈຕີບ, ພະຍາດຕິດເຊື້ອບາງຊະນິດ, ພະຍາດໄທຣອຍ ຫລື ຄໍໜຽງ ເປັນຕົ້ນ.
ສັນຍານອັນຕະລາຍທີ່ຄວນລະວັງແມ່ນມີອາການເມື່ອຍງ່າຍ, ຄວາມສາມາດໃນການອອກກຳລັງກາຍຫລຸດລົງ, ມີອາການຫົວໃຈລົ້ມເຫລວ ແລະ ເປັນລົມໝົດສະຕິ. ໂດຍທົ່ວໄປແພດຈະປິ່ນປົວພະຍາດຕົ້ນເຫດກ່ອນ ເຊັ່ນ : ຜູ້ທີ່ເປັນຫລອດເລືອດຫົວໃຈຕີບຕ້ອງກິນຢາ ແລະ ຮັບການຂະຫຍາຍຫລອດເລືອດຫົວໃຈ, ໃນຜູ້ທີ່ບໍ່ພົບສາເຫດຈະແຈ້ງ ຫລື ພົບສາເຫດ ແຕ່ບໍ່ສາມາດແກ້ໄຂໄດ້ ແລະ ເປັນ AV block ຊະນິດຮຸນແຮງ ຈຳເປັນຕ້ອງໄດ້ຮັບການປິ່ນປົວໂດຍໃຊ້ເຄື່ອງກະຕຸ້ນຫົວໃຈດ້ວຍໄຟຟ້າ.
ເຖິງວ່າອາການ AV block ຈະບໍ່ສາມາດປິ່ນປົວໃຫ້ເຊົາຂາດໄດ້ ເຮັດໄດ້ພຽງປິ່ນປົວຢູ່ຕົ້ນເຫດ ຫລື ໃສ່ເຄື່ອງກະຕຸ້ນຫົວໃຈດ້ວຍໄຟຟ້າເທົ່ານັ້ນ, ແຕ່ຖ້າໝັ່ນເບິ່ງແຍງດູແລສຸຂະພາບໃຫ້ແຂງແຮງກໍອາດປ້ອງກັນໄດ້. ແນວໃດກໍຕາມ, ຫາກມີອາການຜິດປົກກະຕິ, ເມື່ອຍງ່າຍ ຫລື ຄ້າຍຄືຈະເປັນວິນໝົດສະຕິ ຄວນປຶກສາທ່ານໝໍໂດຍໄວ ເພາະຫາກປ່ອຍໄວ້ອາດເກີດອາການຫົວໃຈລົ້ມເຫລວຈົນເຖິງຂັ້ນເສຍຊີວິດໄດ້.
