ປກສ ເມືອງທ່າແຂກ ຊີ້ແຈງການເຂົ້າສະກັດກັ້ນ ລົດຜູ້ຕ້ອງສົງໄສຄ້າຂາຍຢາເສບຕິດ ດ້ວຍການ ຍິງປຶນໃສ່ຢາງລໍ້ຫລັງລົດຂອງຜູ້ຕ້ອງສົງໄສ ທີ່ບ້ານນາບວບ
November 11, 2021 - 6:25 PM
ແຫລ່ງຂ່າວແຂວງຄຳມ່ວນ ລາຍງານໃຫ້ຮູ້ວ່າ: ໃນວັນທີ 10 ພະຈິກ 2021 ນີ້, ທ່ານ ພັທ ພົມມະລາ ບົວລະພາ ຫົວໜ້າກອງບັນຊາການ ປກສ ເມືອງທ່າແຂກ, ແຂວງຄຳມ່ວນ ໄດ້ຖະແຫລງການ ຊີ້ແຈງວ່າ: ເຫດການທີ່ເກີດຂຶ້ນຢູ່ເສັ້ນທາງເລກທີ 13 ໃຕ້ ຫ່າງຈາກຕົວເມືອງທ່າແຂກ ໄປທາງທິດໃຕ້ 8 ກິໂລແມັດ ຢູ່ເຂດບ້ານນາບວບ, ເມືອງທ່າແຂກ, ແຂວງຄຳມ່ວນ. ເຊິ່ງເຫດການດັ່ງກ່າວແມ່ນເປັນການປະຕິບັດໜ້າທີ່ຂອງເຈົ້າໜ້າທີ່ຕຳຫລວດຕ້ານ ແລະ ສະກັດກັ້ນຢາເສບຕິດ ປກສ ເມືອງທ່າແຂກ ແຂວງຄຳມ່ວນ, ເຂົ້າສະກັດກັ້ນລົດຜູ້ຕ້ອງສົງໄສຄ້າຂາຍຢາເສບຕິດ ໂດຍອີງຕາມການລາຍງານຂອງພົນລະເມືອງດີໄດ້ລາຍງານໃຫ້ເຈົ້າໜ້າທີ່ ປກສ ເມືອງທ່າແຂກ ໃຫ້ຮູ້ວ່າ: ມີເປົ້າໝາຍຂົນສົ່ງ, ຈຳໜ່າຍຢາເສບຕິດ (ປະເພດຢາບ້າ) ດັ່ງນັ້ນເຈົ້າໜ້າທີ່ຕຳຫຼວດ ກອງບັນຊາການ ປກສ ເມືອງທ່າແຂກ ຈຶ່ງໄດ້ຈັດຕັ້ງກຳລັງໜ່ວຍງານວິຊາສະເພາະລົງກວດກາຕິດຕາມ.
ຮອດເວລາ 15:30 ໂມງ ຂອງວັນທີ 9 ພະຈິກ 2021 ຈິ່ງໄດ້ພົບເຫັນເປົ້າໝາຍທີ່ນຳໃຊ້ພາຫະນະປະເພດລົດເກັງ ຍີຫໍ້ ອີແລນຕາ ສີດຳ ບໍ່ຕິດປ້າຍທະບຽນ ຈອດຢູ່ແຄມທາງເລກທີ 13 ໃຕ້, ເມື່ອເປັນເຊັ່ນນັ້ນ ຈຶ່ງໄດ້ນຳໃຊ້ກຳລັງ ແລະ ພາຫະນະເຂົ້າປິດລ້ອມ ເພື່ອທຳການກວດກາ ແຕ່ເປົ້າໝາຍບໍ່ໃຫ້ຄວາມຮ່ວມມືກັບເຈົ້າໜ້າທີ່ຕຳຫລວດ ຂອງພວກເຮົາ ແລ້ວຍັງໄດ້ຂັບຂີ່ລົດອອກຈາກວົງປິດລ້ອມ ໃນຂະນະທີ່ຜູ້ຕ້ອງສົງໃສຂັບຂີ່ລົດ ອອກຈາກວົງປິດລ້ອມ ໄດ້ໄປຕຳກັບລົດຂອງເຈົ້າໜ້າທີ່່ຕຳຫລວດ 2 ຄັນ ເຊິ່ງເຮັດໃຫ້ລົດຂອງທາງເຈົ້າໜ້າທີ່ເປ່ເພພໍສົມຄວນ, ດັ່ງນັ້ນທາງເຈົ້າໜ້າທີ່ຕຳຫລວດ ຈຶ່ງໄດ້ນຳໃຊ້ອາວຸດປືນຍິງໃສ່ຢາງລໍ້ຫລັງລົດຂອງຜູ້ຕ້ອງສົງໄສ ເຊິ່ງໄດ້ເຮັດໃຫ້ຢາງລົດຂອງຜູ້ຕ້ອງສົງໄສແຕກ ແຕ່ຜູ້ຕ້ອງສົງໃສ່ຍັງພະຍາຍາມຂັບຂີ່ລົດຂອງຜູ້ກ່ຽວລົບໜີ ໄປທາງທິດໃຕ້ ຈາກນັ້ນເຈົ້າໜ້າທີ່ຂອງພວກເຮົາກໍໄດ້ຂັບຂີ່ລົດຕິດຕາມ ແລ້ວໄປທັນລົດຜູ້ຕ້ອງສົງໄສ ຢູ່ເຂດບ້ານດົງກະແສນ ເມືອງທ່າແຂກ ແຂວງຄຳມ່ວນ ຫ່າງຈາກຈຸດເກີດເຫດປະມານ 12 ກິໂລແມັດ, ຜູ້ຕ້ອງສົງໃສຈຶ່ງໄດ້ຈອດລົດເພື່ອທີ່ຈະເອົາຕົວຫລົບໜີ ແຕ່ຫຼົບໜີບໍ່ລອດ ຖືກເຈົ້າໜ້າທີ່ຕຳຫລວດຈັບໄດ້ ເຊິ່ງມີຜູ້ຖືກຫາ 3 ຄົນ,ຍິງ 1 ຄົນ ແລະ ເດັກ 1 ຄົນ. ພ້ອມຂອງກາງຢາບ້າ 210 ເມັດ ,ໂທລະສັບ 4 ໜ່ວຍ, ລົດເກັງ ຢີ່ຫໍ້ ອີແລນຕ້າ ສີດຳ ບໍ່ມີປ້າຍທະບຽນ 1 ຄັນ.
ຜ່ານການສືບສວນ-ສອບສວນເບື້ອງຕົ້ນຂອງເຈົ້າໜ້າທີ່ຕຳຫລວດ ຈຶ່ງຮູ້ວ່າຜູ້ຖືກຫາຜູ້ທີໜຶ່ງ ຊື່ວ່າ ທ້າວ ວັນນະເລດ ວົງດາລາ (ຕະ) ອາຍຸ 29 ປີ, ອາຊີບກຳມະກອນ, ຜູ້ຖືກຫາຜູ້ທີສອງ ຊື່ນາງ ແຄັດຕີ້ ອາຍຸ 20 ປີ, ອາຊີບຄ້າຂາຍ ແລະ ຜູ້ທີ່ສາມເປັນເດັກ ທັງສາມແມ່ນຢູ່ບ້ານ ທ່າແຂກໃຕ້, ເມືອງທ່າແຂກ, ແຂວງຄຳມ່ວນ.
ຕໍ່ກັບເຫດການທີ່ເກີດຂຶ້ນແມ່ນໄດ້ສ້າງຄວາມບໍ່ເຂົ້າໃຈຕໍ່ສັງຄົມ ຍ້ອນມີສື່ສັງຄົມອອນລາຍເອົງໄປລົງດ້ວຍຄວາມບໍ່ມີມູນຄວາມຈິງ. ແຕ່ເຖິງຢ່າງໃດກໍຕາມທາງເຈົ້າໜ້າທີ່ຕຳຫລວດກອງບັນຊາການ ປກສ ເມືອງທ່າແຂກ ຂອງພວກເຮົາ ຈິ່ງຂໍຊີ້ແຈງວ່າເຫດການດັ່ງກ່າວ ແມ່ນເປັນການປະຕິບັດໜ້າທີ່ເພື່ອສະກັດກັ້ນ ກັບ ພວກຂົນສົ່ງ,ຄ້າຂາຍຢາເສບຕິດ. ປະຈຸບັນທາງເຈົ້າໜ້າທີ່ຕຳຫລວດຍັງສືບສວນ-ສອບສວນເພື່ອຂະຫຍາຍຜົນຫາ ພວກກຸ່ມແກ໋ງຮ່ວມຂະບວນການ ທີ່ມີສ່ວນພົວພັນມາດຳເນີນຄະດີຕາມລະບຽບກົດໝາຍ.
